استانادا بىرنەشە جىلدان بەرى «JOLTAP» الەۋمەتتىك جوباسى تابىستى جۇزەگە اسىرىلىپ كەلەدى. جوبا ونداعان مىڭ قالا تۇرعىنىن جۇمىسپەن قامتۋ جانە قىسقا مەرزىمدى وقىتۋ شارالارىمەن قامتىپ وتىر. بۇگىندە ول تۇراقتى ناتيجەلەر كورسەتىپ، حالىقارالىق قاۋىمداستىقتىڭ دا قىزىعۋشىلىعىن تۋدىرىپ وتىر، دەپ حابارلايدى ەلوردا اكىمدىگىنىڭ رەسمي سايتى.

«JOLTAP» جوباسى استانادا 2023 جىلدان بەرى ىسكە اسىرىلىپ كەلەدى. ونىڭ باستى ماقساتى – قىسقا مەرزىمدى وقىتۋ مەن جۇمىسپەن قامتۋ ارقىلى حالىقتىڭ تابىسىن ارتتىرۋ. جوبا اياسىندا قىسقا ۋاقىت ىشىندە جاڭا داعدىلاردى مەڭگەرۋگە بولادى جانە ەڭبەك نارىعىنا شىعۋعا مۇمكىندىك بەرەتىن پراكتيكالىق ءتاسىل قاراستىرىلعان.

اتالعان جوبا مەملەكەت باسشىسىنىڭ تاپسىرمالارىن ورىنداۋ اياسىندا جۇزەگە اسىرىلىپ، ەلوردادا تابىس تابۋعا باعىتتالعان تۇراقتى جۇمىسپەن قامتۋ جۇيەسىن قالىپتاستىرىپ وتىر. بۇل «ادال ادام – ادال ەڭبەك – ادال تابىس» تۇجىرىمداماسىنىڭ قۇندىلىقتارىنا ساي كەلەدى.

جوبانى استانا قالاسى اكىمدىگىنىڭ «جاڭا مۇمكىندىك» قورىمەن بىرلەسىپ ىسكە اسىرۋدا.

جوبا اياسىندا ەلوردا تۇرعىندارىنا 18 ءتۇرلى كۋرس ۇسىنىلادى: ونىڭ 12-ءسى – جۇمىسشى ماماندىقتار، 6-اۋى – تسيفرلىق باعىتتار. اتاپ ايتقاندا، ناۋبايشى، ەلەكتر-گازبەن دانەكەرلەۋشى، ەلەكترومونتاجشى، تىگىنشى، سونداي-اق جاساندى ينتەللەكت نەگىزدەرى، جارنامالىق بەينەروليكتەرگە ارنالعان نەيروجەلىلەر سياقتى باعىتتار بار.

وقۋ مەرزىمى 5 كۇننەن 22 كۇنگە دەيىن سوزىلادى. باعدارلامالار پراكتيكالىق سيپاتقا يە: ساباقتار ارنايى جابدىقتالعان تسەحتاردا وتەدى جانە بارلىق قاجەتتى ماتەريال تەگىن بەرىلەدى.

وقۋ باعدارلامالارى جۇمىس بەرۋشىلەردىڭ تالاپتارىنا ساي ازىرلەنگەن. ولار جەرگىلىكتى بيزنەسپەن تىعىز بايلانىستا دايىندالعان اۆتورلىق كۋرستار بولىپ سانالادى. بۇل قاتىسۋشىلاردىڭ ەڭبەك نارىعىنا تەز بەيىمدەلۋىنە مۇمكىندىك بەرەدى.

سوڭعى 2,5 جىلدا 18,8 مىڭنان استام ادام وقۋدان وتكەن. ولاردىڭ 10 مىڭنان استامى قالا كاسىپورىندارىنا جۇمىسقا ورنالاسقان.

ەلورداداعى وندىرىستىك جانە يندۋستريالىق سەكتورداعى كادرلارعا دەگەن سۇرانىس كوبىنە وسى جوبا تۇلەكتەرى ەسەبىنەن قامتاماسىز ەتىلىپ وتىر.

سونىمەن قاتار جوبا تۇلەكتەرىنىڭ شامامەن 1,5 مىڭى جەكە كاسىپ باستاپ كەتكەن. ولار تىگىن شەبەرحانالارىن، اياق كيىم جوندەۋ ورىندارىن، شاعىن كوفەحانالار، ءۇي جانىنداعى دۇكەندەر، اۆتوسەرۆيستەر اشقان.

وسىلايشا جوبا قاتىسۋشىلارىنىڭ تابىسى ارتىپ قانا قويماي، جاڭا جۇمىس ورىندارى قۇرىلىپ، وزگە ادامدارعا دا تابىس تابۋ مۇمكىندىگى پايدا بولۋدا.

جۇمىسشى ماماندىقتاردان بولەك، تسيفرلىق كۋرستار دا تۇرعىندار اراسىندا ۇلكەن سۇرانىسقا يە. اسىرەسە «ساۋدا مەن بيزنەسكە ارنالعان جاساندى ينتەللەكت» جانە «جارنامالىق بەينەلەرگە ارنالعان نەيروجەلىلەر» كۋرستارىنا قىزىعۋشىلىق جوعارى.

مۇنداي كۋرستاردىڭ ەنگىزىلۋى حالىق سۇرانىسىنىڭ ارتۋىمەن، سونداي-اق ەل ەكونوميكاسىندا جاساندى ينتەللەكت پەن تسيفرلىق قۇرالداردىڭ ءرولىنىڭ كۇشەيۋىمەن بايلانىستى.

«JOLTAP» جوباسى تۇلەكتەردى جۇمىسپەن قامتۋعا ەرەكشە ءمان بەرەدى. JUMYSTAP.KZ پلاتفورماسىندا 4 مىڭنان استام جۇمىس بەرۋشى تىركەلىپ، 5 مىڭنان استام وزەكتى بوس جۇمىس ورنى جاريالانعان.

وقۋىن اياقتاعاننان كەيىن تۇلەكتەر جوبا اياسىندا قۇرىلعان كاسىبي قاۋىمداستىقتارعا قوسىلادى. بۇل جەردە ولار تاجىريبە الماسىپ، كەڭەس بەرىپ، بىرلەسكەن تاپسىرىستاردى ورىنداۋعا مۇمكىندىك الادى.

جوبا شەتەلدىك ۇيىمداردىڭ دا قىزىعۋشىلىعىن تۋدىرىپ وتىر. اتاپ ايتقاندا، تۇركيانىڭ جۇمىسپەن قامتۋ ۇلتتىق اگەنتتىگى (İŞKUR), كاسىبي بىلىكتىلىك ورگانى (MYK), سونداي-اق وزبەكستاننىڭ ءبىلىم مينيسترلىگى مەن ۇلتتىق بىلىكتىلىك جۇيەسىن دامىتۋ ينستيتۋتىنىڭ وكىلدەرى ارنايى ساپارمەن كەلگەن.

حالىقارالىق ساراپشىلار جوبانىڭ جوعارى دەڭگەيدە ۇيىمداستىرىلعانىن، ونىڭ پراكتيكالىق باعىتىن جانە قىسقا مەرزىمدە ناقتى داعدىلاردى قالىپتاستىرۋداعى تيىمدىلىگىن اتاپ وتكەن.

جوباعا كەز كەلگەن ادام قاتىسا الادى. سونىمەن قاتار كەڭەس بەرۋ نۇكتەلەرى ارقىلى وقۋعا جازىلىپ، جۇمىسقا ورنالاسۋ بويىنشا كومەك الۋعا بولادى.

Abai.kz