الماتى وبلىسىندا «ءمولدىر بۇلاق» ەكولوگيالىق اكتسياسى كەڭ كولەمدە ۇيىمداستىرىلىپ، ءوڭىردىڭ تابيعي سۋ كوزدەرىن ساقتاۋ مەن جاڭعىرتۋعا باعىتتالعان اۋقىمدى جۇمىس جۇرگىزىلدى. يگى باستاماعا 1500-گە جۋىق ادام قاتىسىپ، 300-دەن استام اعاش كوشەتى وتىرعىزىلدى.

اكتسيا بارىسىندا وڭىردەگى بىرنەشە ماڭىزدى بۇلاق كوزى اشىلدى. اتاپ ايتقاندا، ەڭبەكشىقازاق اۋدانى ەڭبەك اۋىلىندا ورنالاسقان، جەرگىلىكتى حالىق اۋىز سۋ رەتىندە پايدالاناتىن بۇلاق تازارتىلىپ، اۋماعىن اباتتاندىرۋ، اعاش وتىرعىزۋ جانە قورشاۋ ورناتۋ جۇمىستارى قولعا الىندى. مالىباي اۋىلدىق وكرۋگىنە قاراستى تاۋدىڭ ەتەگىندە ورنالاسقان ءشيلى باستاۋ بۇلاعىنىڭ باستاۋى مەن ارناسى تازارتىلىپ، نەگىزىنەن مال سۋارۋعا پايدالانىلاتىن سۋ كوزىنىڭ تابيعي قالپى جاقسارتىلدى. قاراجوتا اۋىلدىق وكرۋگىندەگى تاريحي ماڭىزى بار ديىرمەن بازى بۇلاعىندا دا تازالاۋ جۇمىستارى جۇرگىزىلىپ، بۇلاقتىڭ باستاۋى مەن سۋ جۇرەتىن ارناسى رەتكە كەلتىرىلدى. تاۋقاراتۇرىق اۋىلىنا جاقىن ورنالاسقان قۇرتتى بۇلاعىنىڭ كوزى اشىلىپ، سانيتارلىق جۇمىستار اتقارىلدى. سونىمەن قاتار تالعار اۋدانىنداعى كيەلى ورىنداردىڭ ءبىرى سانالاتىن المەرەك بابا بۇلاعى دا نازاردان تىس قالعان جوق. ونىڭ تابيعي ءارى رۋحاني ماڭىزىنا ەرەكشە كوڭىل ءبولىندى.

«ىلە-الاتاۋ» مەملەكەتتىك ۇلتتىق تابيعي پاركi تۇرگەن شاتقالىنداعى «كيەلى» بۇلاعىنىڭ اشىلۋ راسىمىنە الماتى وبلىسىنىڭ اكىمى مارات سۇلتانعازيەۆ تە قاتىسىپ، بۇلاق كوزىن اشۋ، اعاش وتىرعىزۋ جۇمىسىنا اتسالىستى.

مارات ەلەۋسىزۇلى بۇل مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «تازا قازاقستان» جالپىۇلتتىق باعدارلاماسى اياسىنداعى يگى شارا ەكەنىن اتاپ ءوتتى.

«ءبىز بۇگىن اتا-بابامىزدان قالعان «بۇلاق كورسەڭ، كوزىن اش» دەگەن اسىل اماناتتى جۇزەگە اسىرۋ ماقساتىندا جينالىپ وتىرمىز. سۋ - تىرشىلىك كوزى. جەرىمىزدىڭ بەرەكەسى مەن ىرىسى. اسىرەسە كوپتەگەن ەلدى مەكەنى تاۋ ەتەگىندە ورنالاسقان الماتى وبلىسى ءۇشىن ءاربىر باستاۋ مەن قاينار - ستراتەگيالىق ماڭىزعا يە.

بۇگىنگى تاڭدا تىرشىلىك ءنارىن ۇنەمدەۋ جانە ولاردى تازا ۇستاۋ – مەملەكەتتىك دەڭگەيدەگى وزەكتى ماسەلە. وسى شارادا بىزبەن بىرگە يىق تىرەسە ەڭبەكتەنەتىن ءوڭىر تۇرعىندارىنىڭ بەلسەندىلىگى قۋانتادى.

بۇل جۇمىستار تەك ءبىر كۇندىك ناۋقانمەن شەكتەلمەيدى. ءبىز ءاربىر بۇلاقتىڭ باسىن قورشاپ، اعاش وتىرعىزىپ، سانيتارلىق جاعدايىن باقىلاۋدا ۇستايتىن بولامىز، – دەگەن وبلىس اكىمى قاتىسۋشىلارعا العىسىن ءبىلدىرىپ، ساۋاپتى ءىستىڭ ۇلىستىڭ ۇلى كۇنى – ناۋرىز مەيرامىمەن تۇسپا-تۇس كەلۋىن جاقسى ىرىمعا بالادى.

«قازسۋشار» رەسپۋبليكالىق مەملەكەتتىك كاسىپورنىنىڭ باس ديرەكتورى ءانۋار ۇسكەنباەۆ ءداستۇردى تۇردە وتكىزىلەتىن اكتسيا بيىل كەڭ اۋقىمدا ۇيىمداستىرىلعانىن ايتىپ، سۋدى ۇنەمدەۋ، تابيعاتتى قورعاۋ ورتاق جاۋاپكەرشىلىك ەكەنىنەن جەتكىزدى.

شاراعا ەگدە جاستاعى تۇرعىنداردان باستاپ، جاستارعا دەيىن بەلسەندى اتسالىسىپ، تابيعاتقا جاناشىرلىقتىڭ ۇلگىسىن كورسەتتى. اتقارىلعان جۇمىستىڭ ارقاسىندا بۇلاق سۋى جەرگىلىكتى حالىقتىڭ يگىلىگىنە اينالىپ، شارۋاشىلىعىنا سەپتىگىن تيگىزەتىن بولادى.

ەكولوگيالىق شارا تابيعاتقا قامقورلىق كورسەتۋ عانا ەمەس، سونداي-اق ادام جانىنىڭ دا تازارۋى، جۇرەك كوزىنىڭ اشىلۋى. سوندىقتان مۇنداي شارالار الماتى وبلىسىندا جوسپارعا ساي جۇيەلى تۇردە جالعاسادى.

Abai.kz