قر ساۋدا جانە ينتەگراتسيا ءمينيسترى ا. شاققاليەۆتىڭ سكوپە قالاسىنا ساپارى بارىسىندا قازاقستان مەن سولتۇستىك ماكەدونيا اراسىندا ىسكەرلىك كەڭەس قۇرۋ تۋرالى كەلىسىمگە قول قويىلدى.

مەملەكەت باسشىسىنىڭ تاپسىرمالارىن ورىنداۋ اياسىندا، اتاپ ايتقاندا 2025 جىلعى مامىردا Astana International Forum 2025 الاڭىندا قازاقستان رەسپۋبليكاسى پرەزيدەنتى مەن سولتۇستىك ماكەدونيا رەسپۋبليكاسى پرەزيدەنتى اراسىندا وتكەن كەلىسسوزدەردىڭ قورىتىندىسى بويىنشا، قر ساۋدا جانە ينتەگراتسيا ءمينيسترى ارمان شاققاليەۆ ەكى ەل اراسىنداعى ساۋدا-ەكونوميكالىق ىنتىماقتاستىقتى دامىتۋ ماقساتىندا سكوپە قالاسىنا جۇمىس ساپارىمەن باردى.

ساپار بارىسىندا سولتۇستىك ماكەدونيا رەسپۋبليكاسىنىڭ پرەزيدەنتى گ. سيليانوۆسكا-داۆكوۆا قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى ا. شاققاليەۆتى قابىلدادى. كەزدەسۋ بارىسىندا پرەزيدەنتكە ساۋدا-ەكونوميكالىق ىنتىماقتاستىقتىڭ دامۋى جانە ونى كەڭەيتۋ پەرسپەكتيۆالارى تۋرالى اقپارات ۇسىنىلدى.

گ. سيليانوۆسكا-داۆكوۆا 2025 جىلعى مامىردا استاناعا جاساعان ساپارىن جىلى ەسكە الىپ، قازاقستان پرەزيدەنتى قاسىم-جومارت توقاەۆقا جانە قازاقستان حالقىنا ىزگى تىلەكتەرىن جەتكىزدى. سونداي-اق مەملەكەت باسشىلارىنىڭ جاقىندا انتاليا ديپلوماتيالىق فورۋمى الاڭىندا وتكەن كەزدەسۋىن اتاپ ءوتىپ، حالىقارالىق ديالوگتى ودان ءارى دامىتۋدىڭ ماڭىزدىلىعىن ەرەكشە ايتتى.

ساپار باعدارلاماسىنىڭ ماڭىزدى بولىگى رەتىندە مينيستر ا. شاققاليەۆتىڭ سىرتقى ىستەر جانە سىرتقى ساۋدا ءمينيسترى تيمچو مۋتسۋنسكيمەن كەلىسسوزدەرى ءوتتى. تاراپتار ەكىجاقتى ساۋدانىڭ قازىرگى جاعدايى مەن دامۋ پەرسپەكتيۆالارىن جان-جاقتى تالقىلادى. تاۋار اينالىمىنىڭ تۇراقتى وسۋىنە جاعداي جاساۋ ماسەلەسىنە ەرەكشە نازار اۋدارىلدى.

100-دەن استام ماكەدونيالىق جانە بىرقاتار قازاقستاندىق كومپانيالار (سونىڭ ىشىندە «QazTrade»، «KazakhInvest») قاتىسقان بيزنەس-فورۋم قورىتىندىسى بويىنشا قازاقستاننىڭ سىرتقى ساۋدا پالاتاسى مەن سولتۇستىك ماكەدونيانىڭ ەكونوميكالىق پالاتاسى اراسىندا ىسكەرلىك كەڭەس قۇرۋ تۋرالى كەلىسىمگە قول قويىلدى. سونداي-اق «QazTrade» ساۋدا ساياساتىن دامىتۋ ورتالىعى» اق مەن سولتۇستىك ماكەدونيانىڭ ينۆەستيتسيالار تارتۋ جانە ەكسپورتتى ىلگەرىلەتۋ اگەنتتىگى اراسىندا بىرلەسكەن بيزنەس-جوبالاردى ىسكە اسىرۋعا باعىتتالعان ىنتىماقتاستىق تۋرالى مەموراندۋمعا قول قويىلدى.

بۇدان بولەك، بيزنەس-فورۋم قورىتىندىسى بويىنشا شامامەن 500 ملن تەڭگە سوماسىنا كوممەرتسيالىق قۇجاتتارعا قول قويىلدى.

سكوپە قالاسىنا ساپار بارىسىندا مينيستر ا. شاققاليەۆ «Bunardzik» كەشەنىنە (TIDZ تەحنولوگيالىق جانە ونەركاسىپتىك دامۋ ايماعى) بارىپ، ەكولوگيالىق تازا ءوندىرىس پەن وزىق تەحنولوگيالارعا مامانداندىرىلعان ورتالىقتىڭ جۇمىسىمەن تانىستى.

ساپاردىڭ جالعاسى رەتىندە ستامبۋل قالاسىندا ءىرى تۇرىك بيزنەسىنىڭ وكىلدەرىمەن كەزدەسۋلەر ءوتتى. ولاردىڭ قاتارىندا Orzax Group (بيولوگيالىق بەلسەندى قوسپالار ءوندىرىسى), Roz Metal (مەتاللۋرگيا، اليۋميني جانە مىس ونىمدەرى) جانە Safi Holding (تاماق ونەركاسىبى، سونىڭ ىشىندە قانت ءوندىرىسى) بار. كەلىسسوزدەر بارىسىندا اتالعان كومپانيالار قازاقستانداعى قاتىسۋىن كەڭەيتۋگە، ينۆەستيتسيالىق جوبالاردى ىسكە اسىرۋعا، وندىرىستەردى جەرگىلىكتەندىرۋگە جانە ونەركاسىپتىك كووپەراتسيانى دامىتۋعا قىزىعۋشىلىق ءبىلدىردى.

Abai.kz