جەتىسۋ وبلىسىنىڭ اكىمى بەيبىت يساباەۆ XXV جازعى سۋردليمپيادا ويىندارىنىڭ گرەك-ريم كۇرەسىنەن قولا جۇلدەگەرى، بيىلعى قازاقستان چەمپيونى رامازان ءابدراسىل مەن جاتتىقتىرۋشىسى ءالىمجان بازاربەكتى قابىلدادى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ءوڭىر باسشىسى سپورتشىنى جوعارى جەتىستىگىمەن قۇتتىقتاپ، ونىڭ توكيو قالاسىندا وتكەن XXV سۋردليمپيادا ويىندارىنداعى جەڭىسى تەك جەتىسۋ ءۇشىن عانا ەمەس، بۇكىل ەل ءۇشىن ماڭىزدى وقيعا بولعانىن جەتكىزىپ، جىلى لەبىزىن ءبىلدىردى.

- رامازان ءابدراسىل جاقىندا شىمكەنت قالاسىندا وتكەن سۋردو گرەك-ريم كۇرەسىنەن ەل كۋبوگىنىڭ چەمپيونى اتاندى. رامازاننىڭ جوعارى جەتىستىكتەرى كوپجىلدىق قاجىرلى ەڭبەكتىڭ، سونداي-اق جاتتىقتىرۋشىسىنىڭ كاسىبيلىگى مەن تىنىمسىز جۇمىسىنىڭ ناتيجەسى. وسىعان وراي جاتتىقتىرۋشى ءالىمجان بازاربەكۇلىنا وسىنداي تالانتتى سپورتشى مەن ەلىمىزدىڭ ناعىز پاتريوتىن دايىنداعانى ءۇشىن، سونداي-اق وتاندىق سپورتتىڭ دامۋىنا قوسقان ۇلەسى ءۇشىن شىن جۇرەكتەن العىسىمدى بىلدىرەمىن، – دەگەن ب.يساباەۆ چەمپيونعا تالدىقورعان قالاسىنىڭ جاڭا شاعىن اۋدانىندا ورنالاسقان تۇرعىن ۇيدەن ءبىر بولمەلى پاتەردىڭ كىلتىن، جاتتىقتىرۋشىسىنا اقشالاي سىيلىق سەرتيفيكاتىن تاپسىردى.

كەزدەسۋ بارىسىندا وبلىس اكىمى سپورتتىق ينفراقۇرىلىمدى دامىتۋ ماسەلەسىنە دە نازار اۋداردى. ول مەملەكەت باسشىسى قاسىم-جومارت توقاەۆتىڭ ينكليۋزيۆتى سپورت نىساندارىن سالۋ تۋرالى تاپسىرماسىنا وراي تالدىقورعان قالاسىندا «قازاقستان حالقىنا» قورىنىڭ قولداۋىمەن ينكليۋزيۆتى سپورت ورتالىعىنىڭ قۇرىلىسى باستالعانىن اتاپ ءوتتى.

كەزدەسۋ بارىسىندا پالۋان مەن جاتتىقتىرۋشىسى وڭىردە سپورتتى دامىتۋدا جاسالىپ جاتقان جاعدايلار ءۇشىن وبلىس باسشىلىعىنا ريزاشىلىعىن ءبىلدىردى.

- بىزگە جان-جاقتى قولداۋ كورسەتكەندەرىڭىزگە شىن جۇرەكتەن العىس ايتامىن. ءتورت جىلدان كەيىن سۋردليمپيادا ويىندارىندا توپ جارىپ شىعامىن دەگەن سەنىمىم بار. سوعان بار كۇش-جىگەرىمدى سالامىن، - دەدى رامازان ءابدراسىل.

كەزدەسۋ سوڭىندا ءوڭىر باسشىسى جاس پالۋانعا الداعى ازيا-تىنىق مۇحيتى ويىندارىندا ۇزدىك ونەر كورسەتىپ، الەمدىك ارەنادا ەل ابىرويىن اسقاقتاتاتىنىنا سەنىم ءبىلدىردى.

اتاپ وتسەك، بىلتىر قاراشا ايىندا توكيو قالاسىندا وتكەن XXV جازعى سۋردليمپيادا ويىندارىندا ر. ءابدراسىل قولا جۇلدە يەلەنسە، بيىل 14-16 ءساۋىر كۇندەرىندە شىمكەنت قالاسىندا وتكەن قازاقستان رەسپۋبليكاسىنىڭ كۋبوگىندا ءى ورىن يەلەنىپ، ازيا-تىنىق مۇحيتى ويىندارىنا جولداما العان بولاتىن.

جالپى، جەتىسۋ وبلىسىندا «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى» كمم-دا ەستۋ مۇشەسى زاقىمدالعان (سۋردو) سپورتشىلار اراسىندا گرەك-ريم كۇرەسىمەن 21 سپورتشى شۇعىلدانادى. اتالعان ورتالىقتا 3 جاتتىقتىرۋشى جۇمىس ىستەيدى. 2025 جىلدان بەرى سۋردو گرەك-ريم كۇرەسىنەن 1 حالىقارالىق دارەدەگى سپورت شەبەرى، 2 قازاقستان رەسپۋبليكاسىنىڭ سپورت شەبەرى، 11 سپورت شەبەرىنە ۇمىتكەر دايىندالعان.

 Abai.kz