ەۋروپا تاعى دا قازاقستانعا سانكتسيا سالدى: بۇل جولى ساۋدا كومپانياسى شەكتەۋگە ىلىكتى...

ەۋروپالىق وداق رەسەيگە قارسى جاڭا سانكتسيالار پاكەتىنە قازاقستاندىق كومپانيانى قوستى. ەندى شەكتەۋلەر ساۋدا تاسىمالىمەن اينالىساتىن بيزنەسكە دە اسەر ەتتى.

ەو كەڭەسى رەسەي فەدەراتسياسىنا قارسى 20-شى سانكتسيالار پاكەتىن بەكىتتى. بريۋسسەلدىڭ مالىمدەۋىنشە، جاڭا شارالار رەسەيدىڭ ەنەرگەتيكا، اسكەري-ونەركاسىپتىك كەشەنى، ساۋدا، قارجى سەكتورى مەن كريپتوۆاليۋتا سالالارىنا باعىتتالعان. پاكەتكە بارلىعى 120 جاڭا سانكتسيالىق پوزيتسيا ەندى، بۇل — سوڭعى ەكى جىلداعى ەڭ ءىرى جيىنتىق.

بۇل تىزىمدە قازاقستان ناقتى ءبىر كومپانيا ارقىلى اتاپ وتىلگەن. ەو كەڭەسىنىڭ رەسمي حابارلاماسىندا قىتاي، ءباا، وزبەكستان، قازاقستان جانە بەلارۋس ەلدەرىنەن جيىنتىعى 16 ۇيىمنىڭ شەكتەۋگە ىلىككەنى ايتىلعان. بريۋسسەلدىڭ نۇسقاسى بويىنشا، ولار رەسەيدىڭ اسكەري-ونەركاسىپتىك كەشەنىنە قوس ماقساتتاعى تاۋارلاردى نەمەسە قارۋ-جاراق جۇيەلەرىن جەتكىزگەن.

Reuters اگەنتتىگىنىڭ مالىمەتىنشە، ءسوز قازاقستاندىق United Trading Group كومپانياسى مەن نەمىستىڭ UrSeCo Handels كومپانياسىنىڭ ەكى قىزمەتكەرى تۋرالى بولىپ وتىر. ەو ولاردى رەسەيگە جارتىلاي وتكىزگىش پلاستينالارىن وندىرۋدە قولدانىلاتىن حلورلى سۋتەك جەتكىزدى دەپ ايىپتايدى.

بۇل قازاقستاندىق قۇرىلىمداردىڭ ەۋروپالىق وداق تاراپىنان شەكتەۋگە ۇشىراعان العاشقى جاعدايى ەمەس. بۇعان دەيىن ەو-نىڭ 19-شى سانكتسيالار پاكەتىنە رەسەيلىك ۆتب بانكىنىڭ قازاقستاندىق ەنشىلەس ۇيىمى ەنگەن بولاتىن.

Abai.kz