ەلوردادا ءۇنسىز ءجۇرىپ، ۇلكەن وزگەرىس جاساپ جاتقان جوبالار بار. سونىڭ ءبىرى – 2020 جىلى قۇرىلعان LikeKomek الەۋمەتتىك باستاماسى. التى جىل ىشىندە بۇل جوبا تەك قايىرىمدىلىقپەن عانا شەكتەلمەي، تۇتاس ءبىر مادەنيەتتى – سانالى تۇتىنۋ مەن تسيركۋليارلى ەكونوميكانى قالىپتاستىرۋعا ىقپال ەتىپ كەلەدى.

سۋرەت: شارا ۇيىمداستىرۋشىلارىنان الىندى.

بۇگىندە قالا كوشەلەرىندە كوزگە ءجيى تۇسەتىن ارنايى جاشىكتەردىڭ ارتىندا ۇلكەن جۇيە، ناقتى جۇمىس پەن جاۋاپكەرشىلىك تۇر. LikeKomek-ءتىڭ استانا بويىنشا شامامەن 170 قابىلداۋ پۋنكتى بار. ودان بولەك، ەكى قايىرىمدىلىق دۇكەنى تۇراقتى جۇمىس ىستەيدى. بۇل – قاجەتسىز زاتتاردى تاستاماي، قايتا اينالىمعا جىبەرۋدىڭ ناقتى جولى.
جوبانىڭ اۋقىمىن ساندار سويلەتەدى: التى جىلدا 1 ميلليون 300 مىڭ كيلوگرامم تەكستيل جينالعان. كيىم، اياق كيىم، ويىنشىق – بارلىعى دا سۇرىپتالىپ، قايتادان پايدالى ىسكە جاراتىلادى. كۇن سايىن 30-دان استام قىزمەتكەر شامامەن 3 توننا زاتتى ىرىكتەيدى. بۇل – ەكى جۇك كولىگىنە تەڭ كەلەتىن كولەم.
الايدا LikeKomek تەك جيناۋمەن اينالىسپايدى. ونىڭ باستى ميسسياسى – كومەك. اي سايىن 20-دان استام كولىككە تيەلگەن زاتتار قايىرىمدىلىق قورلارىنا، الەۋمەتتىك مەكەمەلەرگە جانە جانۋارلارعا ارنالعان پاناجايلارعا جونەلتىلەدى. استانا عانا ەمەس، سولتۇستىك قازاقستان وبلىسىنىڭ ەلدى مەكەندەرى دە نازاردان تىس قالمايدى. اسىرەسە، جانۋارلارعا ارنالعان كومەكتىڭ وزىندىك باعىتى بار – توسەنىشتەر مەن قاجەتتى بۇيىمدار تۇراقتى جەتكىزىلەدى.

سۋرەت: شارا ۇيىمداستىرۋشىلارىنان الىندى.

جوبانىڭ تاعى ءبىر ەرەكشەلىگى – قايتا وڭدەۋگە دەگەن جۇيەلى كوزقاراس. UpCycle باعىتى اياسىندا جارامسىز تەكستيل جاڭا ونىمگە اينالادى. مىسالى، ەسكى دجينس ماتالارى ديزاينەرلىك بۇيىمدارعا قايتا وڭدەلسە، اقاۋى بار توقىلعان كيىمدەر قولونەر شەبەرلەرىنە بەرىلەدى. ولار ءجىپتى تارقاتىپ، قايتا ءيىرىپ، جاڭا ءونىم جاسايدى. بۇل – تەك ۇنەم ەمەس، ەكولوگيالىق جاۋاپكەرشىلىك.

سۋرەت: شارا ۇيىمداستىرۋشىلارىنان الىندى.

جوبا جەتەكشىسى اسەمگۇل كەرەيباەۆانىڭ ايتۋىنشا، قايىرىمدىلىق جۇمىستارى دا جۇيەلى تۇردە جۇرگىزىلەدى: ءار ءۇش اي سايىن ارنايى اكتسيالار ۇيىمداستىرىلىپ، پانسيوناتتار، حوسپيستەر جانە انا ۇيلەرى تۇراقتى قولداۋ كورەدى.
LikeKomek باستاماسى مەملەكەتتىك دەڭگەيدە دە نازاردان تىس قالماعان. استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى جوبانى قولداپ، الەۋمەتتىك كاسىپكەرلىكتىڭ دامۋىنا جاعداي جاساپ وتىر. ال «تازا قازاقستان» ناۋقانى اياسىندا جاڭا سەرىكتەستىكتەر مەن باستامالار كۇتىلۋدە.

سۋرەت: شارا ۇيىمداستىرۋشىلارىنان الىندى.

ءبىر قاراعاندا، بۇل – ەسكى كيىمدى جيناۋ عانا سياقتى كورىنۋى مۇمكىن. بىراق شىن مانىندە LikeKomek – قوعامنىڭ كوزقاراسىن وزگەرتەتىن قوزعالىس. ارتىق زات – بىرەۋ ءۇشىن قاجەتتىلىك، ال جاۋاپكەرشىلىك – بارىنە ورتاق قۇندىلىق ەكەنىن دالەلدەيتىن جوبا.
ەلوردادا باستالعان بۇل باستاما بۇگىندە ۇلكەن الەۋمەتتىك ەكوجۇيەگە اينالىپ كەلەدى. ەڭ باستىسى – ءاربىر قالا تۇرعىنى وسى وزگەرىستىڭ ءبىر بولىگى بولا الادى.

Abai.kz