الماتى وبلىسىنىڭ ورتالىعى قوناەۆ قالاسىندا وتكەن «ءۇيدى باسقارۋ: جاۋاپكەرشىلىك، سەنىم، ناتيجە» اتتى اۋقىمدى فورۋم وڭىردەگى تۇرعىن ءۇي-كوممۋنالدىق شارۋاشىلىعى سالاسىنا جاڭا سەرپىن بەرگەن ماڭىزدى شارا بولدى.

«Amanat» پارتياسىنىڭ «TURGYNDAR AMANATY» جوباسى اياسىندا ۇيىمداستىرىلعان بۇل جيىن كوپقاباتتى تۇرعىن ۇيلەردى باسقارۋداعى قوردالانعان تۇيتكىلدەردى تارقاتىپ، كوممۋنالدىق ينفراقۇرىلىمدى جاڭعىرتۋ مەن تۇرعىنداردىڭ قاۋىپسىزدىگىن قامتاماسىز ەتۋدىڭ ناقتى جولدارىن ايقىنداپ بەردى. فورۋمنىڭ باستى ەرەكشەلىگى – بيلىك وكىلدەرى مەن مۇلىك يەلەرى بىرلەستىكتەرى (ميب) جانە پاتەر يەلەرى كووپەراتيۆتەرى (پيك) باسشىلارىنىڭ تىكەلەي ديالوگقا شىعىپ، ماسەلەلەردى اشىق تالقىلاۋىندا بولدى. جيىنعا قاتىسقان پارتيا حاتشىسى ەرجان جىلقىباەۆ پەن وبلىس اكىمى مارات سۇلتانعازيەۆتەن باستاپ، ءماجىلىس پەن ءماسليحات دەپۋتاتتارى، قۇقىق قورعاۋ ورگاندارىنىڭ باسشىلارى بۇل سالاداعى رەفورمالاردىڭ حالىقتىڭ كۇندەلىكتى تۇرمىسىنا تىكەلەي اسەر ەتەتىنىن اتاپ ءوتتى.

پارتيا حاتشىسى ەرجان جىلقىباەۆ ءوز سوزىندە «TURGYNDAR AMANATY» جوباسىنىڭ نەگىزگى ماقساتى تەك ماسەلەنى ءتىزىپ شىعۋ ەمەس، ولاردى شەشۋدىڭ جۇيەلى تەتىگىن قالىپتاستىرۋ ەكەنىنە توقتالدى. بۇگىندە وبلىس اۋماعىندا ەكى مىڭنان استام كوپپاتەرلى تۇرعىن ءۇي كوندومينيۋم نىسانى رەتىندە زاڭداستىرىلعانىمەن، تاريف بەلگىلەۋ، اۋلالاردى اباتتاندىرۋ، ليفت شارۋاشىلىعى مەن ينتەرنەت ساپاسى سياقتى ماسەلەلەر ءالى دە وزەكتى بولىپ قالىپ وتىر. وسى ولقىلىقتاردىڭ ورنىن تولتىرۋ ءۇشىن ميب جانە پيك توراعالارىن كاسىبي تۇرعىدا وقىتۋ، دەپۋتاتتىق كورپۋسپەن كەرى بايلانىستى نىعايتۋ جانە «حالىق قاتىساتىن بيۋدجەت» جوباسىن ءتيىمدى پايدالانۋ كوزدەلۋدە. بۇعان دەيىن ەلىمىزدىڭ جەتى وڭىرىندە وڭ ناتيجە كورسەتكەن بۇل جوبا ەندى الماتى وبلىسىندا دا ءوز جەمىسىن بەرمەك. ماسەلەن، استانا قالاسىندا اشىلعان ارنايى جوبالىق فرونت-وفيس از ۋاقىت ىشىندە جۇزدەگەن ءوتىنىشتى قابىلداپ، تۇرعىندارعا ناقتى كومەك كورسەتكەن. ءدال وسىنداي ورتالىقتى الماتى وبلىسىندا دا اشۋ ۇسىنىلدى، بۇل قادام ازاماتتاردىڭ ءوز ماسەلەلەرىن «ءبىر تەرەزە» قاعيداتىمەن جەدەل شەشۋىنە جول اشادى.

الماتى وبلىسىنىڭ اكىمى مارات سۇلتانعازيەۆ تۇرعىن ءۇي-كوممۋنالدىق شارۋاشىلىعىنىڭ تەك شارۋاشىلىق ەمەس، حالىقتىڭ الەۋمەتتىك كوڭىل-كۇيىن انىقتايتىن ستراتەگيالىق سالا ەكەنىن ەرەكشە اتاپ ءوتتى. اكىمنىڭ پايىمىنشا، قازىرگى ۋاقىتتا جاڭادان پايدالانۋعا بەرىلگەن جۇزدەگەن تۇرعىن ءۇي كەشەندەرى باسقارۋدىڭ مۇلدە جاڭا مادەنيەتىن تالاپ ەتەدى. ەسكىشە جۇمىس ىستەۋدىڭ ۋاقىتى وتكەنىن، ەندىگى كەزەكتە اشىقتىق پەن تسيفرلاندىرۋدىڭ ماڭىزى زور ەكەنىن ايتتى. تۇرعىندار جينالعان قاراجاتتىڭ قايدا، قالاي جانە قانداي ماقساتقا جۇمسالىپ جاتقانىن انىق بىلگەندە عانا ميب پەن پيك جۇمىسىنا دەگەن سەنىم ارتادى. بۇل رەتتە ءۇي باسقارۋ ءىسى كاسىبي مەنەدجمەنت دەڭگەيىنە كوتەرىلۋى ءتيىس. كوپقاباتتى ۇيلەردى جاي عانا ۇستاپ تۇرۋ ەمەس، ولاردىڭ زاماناۋي تالاپتارعا ساي قىزمەت كورسەتۋىن قامتاماسىز ەتۋ – باستى باسىمدىق.

فورۋم بارىسىندا تەك بيلىك وكىلدەرى عانا ەمەس، جەرگىلىكتى جەردەگى ناقتى ماسەلەلەرمەن بەتپە-بەت كەلىپ جۇرگەن ماماندار دا ءسوز الدى. ىلە اۋدانىنان كەلگەن زارينا ابيبوۆا ەسكى تۇرعىن ءۇي قورىنداعى ينجەنەرلىك جەلىلەردىڭ توزۋى، اپاتتىق جۇمىستارعا قاجەتتى ارنايى تەحنيكانىڭ تاپشىلىعى سياقتى اششى شىندىقتى كوتەردى. سونداي-اق تۇرعىنداردىڭ كوممۋنالدىق قارىزدارى جانە پاتەر ساتۋ-ساتىپ الۋ كەزىندەگى قۇقىقتىق شيكىلىكتەر ميب جۇمىسىنا ايتارلىقتاي كەدەرگى كەلتىرىپ وتىرعانىن جەتكىزدى. وسىعان بايلانىستى وبلىستىق دەڭگەيدە باسقارۋشى ۇيىمداردىڭ باسىن بىرىكتىرەتىن قاۋىمداستىق قۇرۋ جانە نوتاريۋستار ءۇشىن ورتاق قاعيدالار ەنگىزۋ قاجەتتىلىگى ايتىلدى. بۇل ۇسىنىستاردىڭ بارلىعى حالىقتىڭ قۇقىقتىق ساۋاتىن ارتتىرۋعا جانە تولەم ءتارتىبىن جاقسارتۋعا باعىتتالعان.

جيىندا تابيعي اپاتتار كەزىندەگى ءوزارا كومەك پەن جاۋاپكەرشىلىك تاقىرىبى دا اينالىپ وتپەدى. «اسەم قاپشاعاي» كووپەراتيۆىنىڭ ءتورايىمى نادەجدا الفەروۆا قوناەۆ قالاسىندا بولعان جويقىن داۋىل كەزىندەگى قيىندىقتاردى ەسكە الدى. سەكۋندىنا 27 مەترگە دەيىن جەتكەن جەل ونداعان ءۇيدىڭ شاتىرىن ۇشىرىپ، ەلەكتر جەلىلەرىن ىستەن شىعارعاندا، «جاستار رۋحى» بەلسەندىلەرى ءبىرىنشى بولىپ كومەككە كەلگەن. جاستاردىڭ مۇنداي سىن ساعاتتا تۇرعىندارمەن بىرگە بولىپ، تازالىق پەن قالپىنا كەلتىرۋ جۇمىستارىنا اتسالىسۋى – جاڭا باسقارۋ مادەنيەتىنىڭ عانا ەمەس، قوعامدىق ىنتىماقتاستىقتىڭ دا كورىنىسى. بۇل مىسال كەز كەلگەن تۇيتكىلدىڭ تەك بىرلەسكەن كۇش-جىگەرمەن عانا شەشىلەتىنىن تاعى ءبىر مارتە دالەلدەدى.

فورۋمنىڭ سوڭى ءموبيلدى قوعامدىق قابىلداۋ الاڭىنا ۇلاستى. مۇندا 200-گە جۋىق تۇرعىن ءوز ماسەلەلەرىن جاۋاپتى ماماندارعا تىكەلەي قويۋعا مۇمكىندىك الدى. قابىلداۋعا تەك اكىمدىك قىزمەتكەرلەرى ەمەس، سونىمەن قاتار پوليتسيا، سالىق ورگاندارى، «الاتاۋ جارىق كومپانياسىنىڭ» وكىلدەرى، زاڭگەرلەر مەن پروكۋراتۋرا ماماندارى قاتىستى. ءاربىر ءوتىنىش بويىنشا زاڭ اياسىندا تۇسىنىكتەمە بەرىلىپ، كەيبىر ماسەلەلەر سول جەردە-اق وڭ شەشىمىن تاپتى. وسىلايشا، قوناەۆتا وتكەن بۇل شارا قۇرعاق ەسەپ بەرۋ ەمەس، ناقتى ءىستىڭ، اشىق ديالوگتىڭ جانە ورتاق ماقساتقا بىرىگۋدىڭ الاڭىنا اينالدى. الماتى وبلىسىنىڭ ءاربىر تۇرعىنى ءۇشىن قاۋىپسىز، قولايلى ءارى ساپالى ءومىر ءسۇرۋ ورتاسىن قالىپتاستىرۋ – پارتيانىڭ عانا ەمەس، بۇكىل قوعامنىڭ مىندەتى ەكەنى ايقىن سەزىلدى. مۇنداي فورۋمدار مەن «TURGYNDAR AMANATY» جوباسى الداعى ۋاقىتتا تۇرعىن ءۇي سالاسىنداعى كوپتەگەن كۇرمەۋلى ماسەلەلەردىڭ شەشىلۋىنە نەگىز بولارى ءسوزسىز. ەكولوگيالىق تازا اۋلا، جارىق پودەزد، قاۋىپسىز ليفت جانە اشىق باسقارۋ – بۇل ءاربىر وبلىس تۇرعىنىنىڭ لايىقتى قۇقىعى جانە سول جولداعى جۇمىستار جۇيەلى تۇردە جالعاسا بەرمەك.

Abai.kz