ساراپشىلار مەن الەمدىك باق «اقش-تىڭ اراعايىندىعى ناتيجە بەرە مە؟»، «ۋكراينا مەن رەسەي ءبىتىم جاساسا ما؟» دەگەندى ىزۋ-قىزۋ تالقىلاپ جاتقاندا، ۋكراينا اسكەرى قارىمتا شابۋىلدارعا شىققانىن مالىمدەۋدە.

كەشە ۋكراينا قارۋلى كۇشتەرىنىڭ (ۋقك) ءۇشىنشى ارميالىق كورپۋسى 15 قىركۇيەك تاڭەرتەڭ دونەتسك وبلىسىنىڭ سولتۇستىگىندە شابۋىل وپەراتسياسىنىڭ باستالعانىن مالىمدەدى.

وپەراتسيا – «ۆيۆالدي» دەگەن اتاۋعا يە بولدى. كورپۋستىڭ مالىمەتىنشە، ۋكراين كۇشتەرى رەسەيلىك اسكەردىڭ كىرىگۋ (ينفيلتراتسيا) وشاقتارىن جويىپ، 75 كم² اۋماقتى تازارتقان. تاعى 10 كم² جەردى وككۋپاتسيادان بوساتقان. كورپۋس وكىلدەرى رەسەيدىڭ 20-شى جانە 25-ءشى ارميالارىنا سوققى بەرىلگەنىن مالىمدەدى.

وسى كەزەڭدەگى باسقىنشى اسكەردىڭ شىعىنى – 1,5 مىڭعا جۋىق اسكەري قىزمەتشىنى، 12 مىڭنان استام دروندى، سونداي-اق جۇزدەگەن برونيتەحنيكا، ارتيللەريا جانە اۆتوكولىك تەحنيكاسىن قۇراعان.

ۋكراينانىڭ درون اسكەرى سونىمەن قاتار رەسەيلىك لوگيستيكالىق باعىتتاردىڭ جولىن كەسكەن. كورپۋس وكىلدەرى رەسەي وتىن جەتكىزۋ جۇيەسىن ۋكراينا اۋماعىنان تىس جەرگە — ۆورونەج وبلىسىنا ىعىستىرعانىن، سويتە تۇرا ول جاقتا دا رەسەيدىڭ قۇبىرلارى مەن قويمالارىنا تىنىشتىق بەرمەي جاتقانىن مالىمدەدى.

قازىر بۇل وپەراتسياعا ۋكراينا قارۋلى كۇشتەرىنىڭ 60-شى جانە 125-ءشى بريگادالارىنىڭ، 3-ءشى شابۋىلداۋشى بريگاداسىنىڭ، 3-ءشى جەكە بارلاۋ باتالونىنىڭ جانە باسقا دا بولىمشەلەردىڭ كۇشتەرى، سونداي-اق قورعانىس مينيسترلىگى بارلاۋ باس باسقارماسىنىڭ (گشب/گۋر) «ارتان» ارنايى بولىمشەسى مەن «دوزور» 10-شى ءموبيلدى شەكارا وتريادى جۇمىلدىرىلعان.

ءۇشىنشى كورپۋستىڭ كومانديرى اندرەي بيلەتسكي شابۋىلدىڭ تۇپكىلىكتى ماقساتى، سونىڭ ىشىندە چەرنىي جەرەبەتس وزەنىنە شىعۋ ەكەنىن ايتتى. ونىڭ ايتۋىنشا، «ۆيۆالدي» وپەراتسياسى 4 نەگىزگى «مەزگىلدەن» تۇرادى، ال قازىرگى كەزەڭ — تەك العاشقىسى.

Abai.kz