قازاقستان رەسپۋبليكاسىنىڭ كونستيتۋتسيالىق سوتى "الاتاۋ قالاسىنىڭ ارنايى قۇقىقتىق رەجيمى تۋرالى" كونستيتۋتسيالىق زاڭنىڭ كونستيتۋتسياعا سايكەستىگىن تەكسەردى. قاراۋ قورىتىندىسى بويىنشا كونستيتۋتسيالىق سوت اتالعان زاڭدى قازاقستان رەسپۋبليكاسىنىڭ كونستيتۋتسياسىنا تولىق سايكەس دەپ تانىدى.

اتالعان زاڭدى قازاقستان پارلامەنتى 2026 جىلعى 27 ناۋرىزدا قابىلداپ، 31 ناۋرىزدا مەملەكەت باسشىسىنىڭ قول قويۋىنا ۇسىنعان.

كونستيتۋتسيالىق سوت زاڭنىڭ كونستيتۋتسيادا بەلگىلەنگەن راسىمدەرگە ساي، پارلامەنت پالاتالارىنىڭ بىرلەسكەن وتىرىسىندا جانە ونىڭ قۇزىرەتى شەڭبەرىندە قابىلدانعانىن اتاپ ءوتتى.

سونداي-اق سوت بۇل قۇجاتتاعى نورمالاردىڭ باسىم بولىگى 2026 جىلعى 15 ناۋرىزدا وتكەن رەسپۋبليكالىق رەفەرەندۋمدا قابىلدانعان كونستيتۋتسيا ەرەجەلەرىن ەسكەرە وتىرىپ، كەزەڭ-كەزەڭىمەن ەنگىزىلەتىنىن كورسەتتى. اتالعان كونستيتۋتسيا جاڭا قۇقىقتىق نورمالارعا نەگىز بولاتىن تەتىكتەردى قامتيدى.

كونستيتۋتسيالىق باقىلاۋ ورگانى جاڭا كونستيتۋتسيادا بەكىتىلگەن مەملەكەت ەگەمەندىگى مەن تاۋەلسىزدىگىن قورعاۋ، ادام مەن ازاماتتىڭ قۇقىقتارى مەن بوستاندىقتارىن ساقتاۋ، زاڭ ۇستەمدىگى مەن ءتارتىپتى قامتاماسىز ەتۋ قاعيداتتارىنا ەرەكشە نازار اۋداردى. بۇل تالاپتار الاتاۋ قالاسى اكىمدىگى مەن ونىڭ ورگاندارى قابىلدايتىن بارلىق نورماتيۆتىك-قۇقىقتىق اكتىلەردە قاتاڭ ساقتالۋى ءتيىس.

ءبىرىنشى كەزەڭدە ەنگىزىلەتىن وتپەلى ەرەجەلەر بۇرىن جاسالعان ينۆەستيتسيالىق كەلىسىمدەرگە، كەلىسىمشارتتارعا جانە جەر قويناۋىن پايدالانۋ ليتسەنزيالارىنا قاتىستى. ولار قۇقىقتىق ايقىندىق پەن تۇراقتىلىقتى قامتاماسىز ەتۋگە باعىتتالعان جانە قولدانىستاعى كونستيتۋتسياعا قايشى كەلمەيدى.

Abai.kz