قر ءىىم ۇلتتىق ۇلانىندا كوكتەمگى شاقىرۋ ناۋقانى باستالدى، ونىڭ اياسىندا 22 مامىر مەن 30 ماۋسىم ارالىعىندا قۇقىقتىق ءتارتىپ اسكەرلەرىنە 7 مىڭعا جۋىق ادامدى شاقىرۋ جوسپارلانۋدا، دەپ حابارلايدى ۇلتتىق ۇلاننىڭ ءباسپاسوز قىزمەتى.

«قازاقستان رەسپۋبليكاسى ءىىم ۇلتتىق ۇلانىندا كوكتەمگى شاقىرۋ ناۋقانى باستالدى. 2026 جىلعى 22 مامىر مەن 30 ماۋسىم ارالىعىندا قۇقىقتىق ءتارتىپ اسكەرلەرىنىڭ قاتارىنا 7 مىڭعا جۋىق ادامدى شاقىرۋ جوسپارلانۋدا. بۇل تۋرالى قر ءىىم ۇلتتىق ۇلانىنىڭ باس قولباسشىلىعىندا ۇلتتىق ۇلان باس قولباسشىسىنىڭ ءبىرىنشى ورىنباسارى — باس شتاب باستىعى گەنەرال-لەيتەنانت قايرات اقتانوۆتىڭ توراعالىعىمەن وتكەن كوكتەمگى شاقىرۋ ناۋقانىن ۇيىمداستىرۋ جانە وتكىزۋ ماسەلەلەرى جونىندەگى ۆەدومستۆوارالىق كەڭەس بارىسىندا بەلگىلى بولدى»، - دەلىنگەن دۇيسەنبىدەگى حابارلامادا.

قازىرگى ۋاقىتتا ۇلتتىق ۇلاننىڭ شاقىرۋ جانە جاساقتاۋ بولىمدەرىنىڭ وفيتسەرلەرى 17 وبلىس پەن رەسپۋبليكالىق ماڭىزى بار ءۇش قالادا جۇمىس جۇرگىزۋدە.

جاس ساربازداردىڭ نەگىزگى بولىگى قوعامدىق ءتارتىپتى كۇزەتۋ، بۇقارالىق ءىس-شارالاردىڭ قاۋىپسىزدىگىن قامتاماسىز ەتۋ، سونداي-اق ماڭىزدى مەملەكەتتىك وبەكتىلەر مەن قىلمىستىق-اتقارۋ جۇيەسى (قاج) مەكەمەلەرىن كۇزەتۋ جونىندەگى تاپسىرمالاردى ورىندايتىن اسكەري بولىمدەرگە جىبەرىلەدى.

«بۇگىندە پوليتسيا قىزمەتكەرلەرىمەن بىرلەسىپ، ۇلتتىق ۇلاننىڭ اسكەري قىزمەتشىلەرى ەلىمىزدىڭ 21 قالاسىندا قوعامدىق ءتارتىپتى قامتاماسىز ەتۋدە. كۇن سايىن قۇقىقتىق ءتارتىپتى كۇزەتۋ قىزمەتىنە 7 مىڭنان استام ۇلانشى تۇسەدى، تاعى 2 مىڭعا جۋىق اسكەري قىزمەتشى ماڭىزدى مەملەكەتتىك وبەكتىلەر مەن قاج مەكەمەلەرىن كۇزەتۋ بويىنشا قىزمەت اتقارادى»، - دەپ تولىقتىردى ۇلتتىق ۇلاننان.

اتقارىلعان جۇمىس كورسەتكىشتەرى

مالىمەتتەر بويىنشا، 2026 جىلدىڭ باسىنان بەرى قۇقىقتىق ءتارتىپ اسكەرلەرىنىڭ اسكەري قىزمەتشىلەرى:

• مىڭداعان قۇقىق بۇزۋشىلىقتىڭ الدىن الدى;
• ەسىرتكى زاتتارىن زاڭسىز ساقتاۋ جاعدايلارىن انىقتادى;
• زاڭسىز اينالىمنان 30-عا جۋىق سۋىق جانە اتىس قارۋىن تاركىلەدى.

بۇدان بولەك، اسكەري قىزمەتشىلەردىڭ جەدەل ءارى قىراعى ءىس-قيمىلدارىنىڭ ارقاسىندا ازاماتتارعا جوعالعان بالالارى مەن ۇيالى تەلەفوندارى قايتارىلدى.

«ىشكى قاۋىپسىزدىك پەن تۇراقتىلىقتى قامتاماسىز ەتۋدە استانا، الماتى جانە تۇركىستان قالالارىنداعى مەرزىمدى قىزمەتتەگى اسكەري قىزمەتشىلەرگە ەرەكشە ءرول جۇكتەلگەن. بولىمشەلەردىڭ جەكە قۇرامى كۇن سايىن قوعامدىق ءتارتىپتى كۇزەتۋگە، مەملەكەتتىك، قوعامدىق-ساياسي جانە مادەني-بۇقارالىق ءىس-شارالاردى وتكىزۋ كەزىندە قاۋىپسىزدىكتى قامتاماسىز ەتۋگە جۇمىلدىرىلادى»، - دەپ اتاپ وتىلگەن حابارلامادا.

Abai.kz