بۇگىن – قازاقستان رەسپۋبليكاسىنىڭ بىتىمگەرلەر كۇنى. بيىلدان باستاپ ەلىمىزدە بەكىتىلگەن بۇل كاسىبي مەرەكە بۇۇ-نىڭ حالىقارالىق بىتىمگەرلەر كۇنىمەن تۇسپا-تۇس كەلىپ وتىر.

بۇۇ-نىڭ بىتىمگەرلىك قىزمەتىنە قاتىسۋ – قازاقستاننىڭ سىرتقى ساياساتىنىڭ ماڭىزدى باعىتتارىنىڭ ءبىرى. بۇل ەلىمىزدىڭ حالىقارالىق بەدەلىن نىعايتىپ، الەمدىك قاۋىمداستىق تاراپىنان سەنىمدى ارتتىرۋعا ىقپال ەتەدى.

حالىقارالىق مىندەتتەمەلەردى ىسكە اسىرۋ اياسىندا 2014 جىلدان بەرى 900-دەن اسا اسكەري قىزمەتشى بۇۇ-نىڭ ءتۇرلى ميسسيالارى قۇرامىندا قىزمەت اتقاردى.

قازىرگى تاڭدا 154 قازاقستاندىق اسكەري قىزمەتشى تاياۋ شىعىس پەن افريكا قۇرلىعىنداعى بۇۇ-نىڭ 11 ميسسياسىنىڭ 7-ۋىنە قاتىسۋدا. بىتىمگەرلەر باتىس ساحارادا، ورتالىق افريكا رەسپۋبليكاسىندا، كونگو دەموكراتيالىق رەسپۋبليكاسىندا، ليۆان رەسپۋبليكاسىندا جانە وڭتۇستىك سۋداندا اسكەري باقىلاۋشى جانە شتاب وفيتسەرلەرى رەتىندە قىزمەت اتقارىپ ءجۇر.

قورعانىس مينيسترلىگى مەملەكەت باسشىسىنىڭ قازاقستاندىق بىتىمگەرلەردىڭ بۇۇ ميسسيالارىنا قاتىسۋ اۋقىمىن كەڭەيتۋ جانە ونى ءارتاراپتاندىرۋ جونىندەگى تاپسىرماسىن جۇيەلى تۇردە جۇزەگە اسىرىپ كەلەدى.

وسىلايشا، 2024 جىلدان باستاپ ۇلتتىق كونتينگەنت گولان جوتالارىنداعى «بۇۇ-نىڭ بولىنگەن اۋماقتى باقىلاۋ جونىندەگى كۇشتەرى» ميسسياسى اياسىندا مىندەتتەرىن ورىنداۋدا. كونتينگەنتتى ورنالاستىرۋ الدىندا اسكەري قىزمەتشىلەر بۇۇ ستاندارتتارىنا سايكەس كەشەندى دايارلىق پەن باعالاۋدان ءوتتى.

ميسسيا اتقارۋ ءۇشىن قىزمەتكە قاجەتتى جابدىقتارىمەن، زاماناۋي قارۋ-جاراق جانە اسكەري تەحنيكا ۇلگىلەرىمەن جان-جاقتى قامتاماسىز ەتۋ بويىنشا كەشەندى جۇمىستار ىسكە اسىرىلدى. اسكەري قىزمەتشىلەردى دايارلاۋ قورعانىس مينيسترلىگى بىتىمگەرلىك وپەراتسيالار ورتالىعىنىڭ بازاسىندا جۇرگىزىلەدى. بىتىمگەرلەر حالىقارالىق گۋمانيتارلىق قۇقىقتى، اعىلشىن ءتىلىن، اسكەري مەديتسينانى، ميناسىزداندىرۋ نەگىزدەرىن مەڭگەرىپ، پاترۋلدەۋ مەن توسقاۋىل بەكەتتەرىندە قىزمەت اتقارۋ ماشىقتارىن پىسىقتايدى.

قازاقستان بۇۇ-دان بىتىمگەرلىك ميسسياعا قاتىسۋعا دەربەس ماندات العان پوستكەڭەستىك كەڭىستىكتەگى العاشقى ءارى جالعىز مەملەكەت.

گولان جوتالارىندا العاشقى ۇلتتىق كونتينگەنتتىڭ ورنالاستىرىلۋى قارۋلى كۇشتەرىمىزدىڭ قۇزىرەتتىلىگى، جاۋاپكەرشىلىگى جانە جوعارى دايىندىق دەڭگەيىنىڭ حالىقارالىق دەڭگەيدە مويىندالعانىنىڭ ايقىن دالەلى بولدى.

ميسسيا قولباسشىلىعى دا ءوز تاراپىنان قازاقستاندىق اسكەري قىزمەتشىلەردىڭ جوعارى كاسىبيلىگى مەن بىتىمگەرلىك قىزمەتكە قوسقان ۇلەسىن جوعارى باعالادى.

قر قورعانىس مينيسترلىگى

Abai.kz