قازىرگى ءبىلىم بەرۋ جۇيەسىندە جاس مامانداردىڭ كاسىبي بەيىمدەلۋى مەن پەداگوگيكالىق شەبەرلىگىن دامىتۋ – مەكتەپ جۇمىسىنىڭ ماڭىزدى باعىتتارىنىڭ ءبىرى. وسى تۇرعىدا تالىمگەرلىك جۇيەسىن ءتيىمدى ۇيىمداستىرۋ پەداگوگ كادرلاردىڭ ساپاسىن ارتتىرۋعا تىكەلەي ىقپال ەتەدى.

مەن، تەمىرحانوۆا ءاليا تەمىرحانقىزى – قوناەۆ قالاسىنداعى №2 ورتا مەكتەپ كمم مۇعالىمىمىن. «ورلەۋ» باۇو» اق الماتى وبلىسى بويىنشا كاسىبي دامۋ ينستيتۋتى ۇيىمداستىرعان «قازىرگى مەكتەپتە تالىمگەرلىكتى ۇيىمداستىرۋ» تاقىرىبىنداعى بىلىكتىلىكتى ارتتىرۋ كۋرسىنان وتۋدەمىن. بىزگە كۋرس ترەنەرى ابلەسەنوۆا سايلىگۇل عاپپارقىزى تاجىريبەلى مامان رەتىندە تالىمگەرلىكتىڭ زاماناۋي باعىتتارىن تەرەڭ ءارى جۇيەلى تۇردە تۇسىندىرۋدە.

قازىرگى تاڭدا مەكتەپتەگى تالىمگەرلىك تەك باقىلاۋ نەمەسە كەڭەس بەرۋ قىزمەتىمەن شەكتەلمەيدى. ول – جاس ماماننىڭ كاسىبي دامۋىن قولداۋعا باعىتتالعان جۇيەلى، ماقساتتى جانە سەرىكتەستىك نەگىزدەگى ۇدەرىس. تالىمگەر مەن جاس مامان اراسىنداعى ءوزارا ارەكەت سەنىمگە، اشىق قارىم-قاتىناسقا جانە ۇزدىكسىز كەرى بايلانىسقا نەگىزدەلۋى ءتيىس.

كۋرس بارىسىندا تالىمگەرلىكتىڭ بىرنەشە ءتيىمدى مودەلدەرى قاراستىرىلعان. اتاپ ايتقاندا: كلاسسيكالىق، سەرىكتەستىك جانە توپتىق تالىمگەرلىك. اسىرەسە، سەرىكتەستىك مودەل جاس ماماننىڭ ءوز بەتىنشە شەشىم قابىلداۋ قابىلەتىن دامىتىپ، كاسىبي سەنىمدىلىگىن ارتتىرۋعا مۇمكىندىك بەرەرى ءسوزسىز. ال توپتىق تالىمگەرلىك – تاجىريبە الماسۋ مەن ۇجىمدىق كاسىبي دامۋعا جول اشادى.

تالىمگەرلىكتى ءتيىمدى ۇيىمداستىرۋدا كەلەسى قاعيدالار ماڭىزدى:

*جۇيەلىلىك جانە جوسپارلىلىق;

*جاس ماماننىڭ جەكە قاجەتتىلىكتەرىن ەسكەرۋ;

*ادىستەمەلىك جانە پسيحولوگيالىق قولداۋ كورسەتۋ;

*ۇزدىكسىز كەرى بايلانىس پەن رەفلەكسيا.

سونىمەن قاتار، تالىمگەرلىك ۇدەرىس تەك ساباققا قاتىسۋمەن شەكتەلمەي، ساباق جوسپارىن بىرلەسىپ تالداۋ، كوۋچينگ وتكىزۋ، ادىستەمەلىك كومەك كورسەتۋ سياقتى كەشەندى جۇمىستاردى قامتۋى قاجەت.

قورىتىندىلاي كەلە، قازىرگى مەكتەپتەگى تالىمگەرلىك – جاس پەداگوگتىڭ كاسىبي قالىپتاسۋى مەن دامۋىنا ىقپال ەتەتىن ماڭىزدى جۇيە. دۇرىس ۇيىمداستىرىلعان تالىمگەرلىك ءبىلىم بەرۋ ساپاسىن ارتتىرىپ قانا قويماي، پەداگوگيكالىق ۇجىمنىڭ كاسىبي مادەنيەتىن دە جەتىلدىرەدى.

تەمىرحانوۆا ءاليا تەمىرحانقىزى،

قوناەۆ قالاسى، №2 ورتا مەكتەپ كمم اعىلشىن ءتىلى ءپانىنىڭ مۇعالىمى

Abai.kz