«كيىز ءۇي / The Kazakh Yurt» - قازاق مادەنيەتىن الەمگە تانىتاتىن جاڭا باسىلىم! «اتامۇرا» باسپاسىنان جارىق كورگەن بۇل باسىلىم قازاق حالقىنىڭ ءداستۇرلى باسپاناسى – كيىز ءۇيدىڭ تاريحىن، قۇرىلىمىن، جاسالۋ تەحنولوگياسىن جانە مادەني-رۋحاني ماڭىزىن جان-جاقتى تانىستىرادى.

كيىز ءۇي – كوشىپ-قونۋعا ىڭعايلى باسپانا عانا ەمەس، قازاق حالقىنىڭ دۇنيەتانىمىن، تابيعاتپەن ۇيلەسىمدى ءومىر ءسۇرۋ مادەنيەتىن، شاڭىراقتىڭ بەرەكە-بىرلىگىن، ۇرپاق ساباقتاستىعىن، ۇلتتىق قۇندىلىقتاردى، قولونەرى مەن تۇرمىس-سالتىن ايقىندايتىن ۇلتتىق مۇرا. ونىڭ قۇرىلىمى حالقىمىزدىڭ تابيعات زاڭدىلىقتارىن تەرەڭ ءتۇسىنىپ، ءومىر تاجىريبەسىن شەبەر پايدالانعانىن كورسەتەدى.

كىتاپتا كيىز ءۇيدىڭ تۇرلەرى مەن قۇرىلىمدىق ەرەكشەلىكتەرى، كەرەگە، ۋىق، شاڭىراق جاساۋ تاسىلدەرى، كيىز باسۋ، ءۇي جابدىقتارىن ازىرلەۋ جولدارى كەڭىنەن باياندالادى. سونىمەن قاتار شي توقۋ، ورمەك توقۋ، باسقۇر، باۋ، ارقان ەسۋ ونەرى، تەكەمەت، سىرماق، الاشا، كىلەم جانە تۇسكيىز سياقتى ۇلتتىق قولونەر تۋىندىلارىنىڭ جاسالۋ ەرەكشەلىكتەرى سيپاتتالادى.

باسىلىمدا كيىز ءۇيدى تىگۋ ءتاسىلى، ىشكى جاساۋى، جيھازدارى، تۇرمىستىق بۇيىمدار مەن ۇلتتىق ىدىس-اياق تۇرلەرى تۋرالى دا تولىق مالىمەت بەرىلگەن.

كىتاپتىڭ اعىلشىن تىلىندە جارىق كورۋى قازاق مادەنيەتى مەن وركەنيەتىن شەتەل وقىرمانىنا تانىستىرۋعا مۇمكىندىك بەرەدى. بۇل باسىلىم ۇلتتىق مۇرامىزدى حالىقارالىق دەڭگەيدە ناسيحاتتاپ، مادەني بايلانىستى نىعايتا تۇسەدى.

«كيىز ءۇي» كىتابى بىرنەشە حالىقارالىق كورمەگە قاتىسىپ، كىتاپسۇيەر قاۋىمنىڭ سۇرانىسىنا يە بولدى. 2025 جىلى تۇركسوي حالىقارالىق ۇيىمى ۇيىمداستىرعان بايقاۋدا باس جۇلدەنى يەلەندى.

«اتامۇرا» باسپاسىنىڭ كىتاپ دۇكەنىندە وتكەن بۇل ءىس-شارا بارىسىندا كىتاپتىڭ مازمۇنى مەن ەرەكشەلىكتەرى تانىستىرىلىپ، ۇلتتىق مادەني مۇرانى ساقتاۋ مەن دارىپتەۋدىڭ ماڭىزى ءسوز بولدى.

Abai.kz