DATAmetrics كومپانياسى 2026 جىلعى 13 ماۋسىم مەن 2 شىلدە ارالىعىندا قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ تاپسىرىسى بويىنشا جۇرگىزىلگەن زەرتتەۋ ناتيجەلەرىن ۇسىندى.

«Face-to-face» فورماتىندا، ياعني بەتپە-بەت سۇحبات تۇرىندە وتكەن ساۋالناماعا قازاقستاننىڭ بارلىق وڭىرىنەن، سونداي-اق استانا، الماتى جانە شىمكەنت قالالارىنان 18 جاستان اسقان 8000 تۇرعىن قاتىستى.

قوعامدىق كوڭىل-كۇيدىڭ نەگىزگى ينديكاتورلارىنىڭ ءبىرى — ازاماتتاردىڭ ەلىمىزدىڭ دامۋ باعىتىنا بەرگەن جالپى باعاسى. بۇل كورسەتكىش حالىقتىڭ مەملەكەتتىك ساياساتتى قابىلداۋ دەڭگەيىن كورسەتەدى.

— زەرتتەۋ ناتيجەلەرى حالىق مەملەكەتتىڭ ساياسي باعىتىن جوعارى دەڭگەيدە قولدايتىنىن ايقىندادى. اتاپ ايتقاندا، ساۋالناماعا قاتىسقانداردىڭ 87,8%-ى قازاقستان دۇرىس باعىتتا دامىپ كەلەدى دەپ كورسەتكەن، — دەلىنگەن حابارلامادا.

ازاماتتىق بەلسەندىلىكتىڭ ماڭىزدى ينديكاتورى — حالىقتىڭ سايلاۋدا داۋىس بەرۋگە دەگەن ىنتاسى.

ساۋالناما جۇرگىزىلگەن كەزدە قر قۇرىلتايىنىڭ سايلاۋى وتەتىن كۇن ءالى جاريالانعان جوق ەدى. سوندىقتان رەسپوندەنتتەرگە: «ەگەر الداعى جەكسەنبىدە قۇرىلتاي (پارلامەنت) سايلاۋى وتسە، ءسىز داۋىس بەرۋگە بارار ما ەدىڭىز؟» دەگەن سۇراق قويىلدى.

— زەرتتەۋ ناتيجەسىنە سايكەس، ازاماتتاردىڭ باسىم بولىگى الداعى قۇرىلتاي سايلاۋىندا داۋىس بەرۋگە دايىن. رەسپوندەنتتەردىڭ 75,6%-ى سايلاۋ ۋچاسكەسىنە بارۋعا نيەتتى ەكەنىن ايتقان. ونىڭ ىشىندە 44,2%-ى داۋىس بەرەتىنىن ناقتى اتاپ كورسەتسە، 31,4%-ى داۋىس بەرۋى ىقتيمال ەكەنىن جەتكىزگەن، — دەلىنگەن حابارلامادا.

پارتيالارعا دەگەن كوزقاراستى انىقتاۋ ءۇشىن رەسپوندەنتتەرگە: «ەگەر جاقىن اراداعى جەكسەنبىدە قۇرىلتاي سايلاۋى وتسە، ءسىز قاي ساياسي پارتياعا داۋىس بەرەر ەدىڭىز؟» دەگەن سۇراق قويىلدى.

— ساۋالناما قورىتىندىسى بويىنشا «ادىلەت» پارتياسى ەڭ جوعارى قولداۋعا يە بولعان. بۇل پارتياعا رەسپوندەنتتەردىڭ 54,2%-ى داۋىس بەرۋگە دايىن ەكەنىن بىلدىرگەن. ەكىنشى ورىندا 7,3% كورسەتكىشپەن «اۋىل» پارتياسى تۇر. «اق جول» پارتياسى 4,6% كورسەتكىشپەن ءۇشىنشى ورىنعا شىققان. «Respublica» پارتياسىن قولداۋ دەڭگەيى 3,4%-دى قۇراعان. جالپىۇلتتىق سوتسيال-دەموكراتيالىق پارتياعا ساۋالناماعا قاتىسۋشىلاردىڭ 2,4%-ى داۋىس بەرۋگە دايىن. قازاقستان حالىق پارتياسىن رەسپوندەنتتەردىڭ 2,1%-ى قولداعان. «بايتاق» پارتياسىن ساۋالناماعا قاتىسۋشىلاردىڭ 1,1%-ى تاڭداعان. «بارلىعىنا قارسىمىن» نۇسقاسىن رەسپوندەنتتەردىڭ 2,3%-ى بەلگىلەگەن، — دەلىنگەن حابارلامادا.

سونىمەن قاتار، سايلاۋالدى ۇگىت-ناسيحات بارىسىندا ساياسي پارتيالار ءۇشىن تارتىس نىساناسى جەتكىلىكتى ەكەنى انىقتالدى — سايلاۋشىلاردىڭ ەداۋىر بولىگى ءوز تاڭداۋىن ءالى جاساعان جوق. زەرتتەۋ ناتيجەسىنە سايكەس، ازاماتتاردىڭ 22,6%-ى، ياعني شامامەن ءاربىر بەسىنشى سايلاۋشى قاي پارتياعا داۋىس بەرەتىنى جونىندە شەشىم قابىلداماعان.

جالپى، زەرتتەۋ ناتيجەلەرى قوعامدا ەلدىڭ ساياسي باعىتىن قولداۋ دەڭگەيى جوعارى ەكەنىن جانە ازاماتتاردىڭ سايلاۋ پروتسەسىنە قاتىسۋعا دايىن ەكەنىن كورسەتتى.

ىرىكتەۋ قازاقستان رەسپۋبليكاسى حالقىنىڭ نەگىزگى الەۋمەتتىك-دەموگرافيالىق سيپاتتامالارىنا، اتاپ ايتقاندا تۇرعىلىقتى جەرىنىڭ تۇرىنە (قالا/اۋىل), جىنىسى مەن جاسىنا قاراي رەپرەزەنتاتيۆتى. سەنىمدىلىك ىقتيمالدىعى 95% بولعان جاعدايدا ىرىكتەمەنىڭ ستاتيستيكالىق قاتەلىك شەگى ±1,1%-دان قۇرايدى.

DATAmetrics كومپانياسى بۇل زەرتتەۋ ناتيجەلەرىن قر ورتالىق سايلاۋ كوميسسياسىنىڭ 2026 جىلعى 3 شىلدەدەگى № وسك-11-07/زت-ك-29 حابارلاماسى نەگىزىندە جاريالاپ وتىر.

Abai.kz