استانا كۇنى مەرەكەسىنە وراي ۇيىمداستىرىلعان «ELORDA CUP» رەسپۋبليكالىق ارنايى جوباسىندا ۇلتتىق سپورت وكىلدەرى تۇڭعىش رەت ونەر كورسەتتى. جايدارمان ساحناسىندا العاش رەت پالۋاندار قاۋىمىنىڭ اتىنان «Baluan tas» ۇلتتىق سپورت تۇرلەرى جانە مادەنيەتى اكادەمياسىنىڭ وكىلدەرى قۇرعان «بالۋانTAS» كومانداسى قاتىسىپ، وزدەرىنىڭ ەرەكشە ءازىل-وسپاعىمەن، ۇلتتىق قۇندىلىقتاردى ناسيحاتتايتىن مازمۇندى قويىلىمدارىمەن كورەرمەننىڭ ىستىق ىقىلاسىنا بولەندى.

«ارنايى جوبامىزدا ارنايى كوماندالار بار. ارنايىلاپ جايدارمان سايىستارىنا قاتىسقالى وتىر. سولاردىڭ ءبىرى – ورتادا «بالۋانTAS» باتىرلار قۇراماسى»، – دەدى «قازاقستان كۆن وداعى» رجقب پرەزيدەنتى، كەش جۇرگىزۋشىسى ەسەن ەلەۋكەن.

جوبا بەيبىتشىلىك جانە كەلىسىم سارايىندا ءوتىپ، ەلىمىزدىڭ ءار وڭىرىنەن جينالعان ۇزدىك جايدارمانشىلاردىڭ باسىن قوستى. ولاردىڭ قاتارىندا سەيفۋللين، باق، ۇلتتىق ۇلان، مادمۋازەل، مەديا، سانات، تۇمار، سمارت، ەمبى، قىزىلوردا، دجەكي، شاڭىراق، اقىندار كوماندالارى. وسىنداي بەدەلدى رەسپۋبليكالىق ساحنادا ۇلتتىق سپورت سالاسىنىڭ اتىنان العاش رەت باق سىناعان «بالۋانTAS» كومانداسىنىڭ ونەرى كورەرمەندەر مەن قازىلار القاسىنىڭ جوعارى باعاسىنا يە بولىپ، ۇزدىكتەر قاتارىنان كورىندى.

سايىستىق تىزىمگە تۇركىستان وبلىسى وتىرار اۋدانى اتىنان تىركەلگەن كوماندانىڭ باستى ەرەكشەلىگى – قازاق كۇرەسى، ۇلتتىق سپورت، پالۋاندىق ءداستۇر، ەلدىك رۋح جانە ۇلتتىق مادەنيەتتى ءازىل ارقىلى دارىپتەۋى. بۇل باستاما ۇلتتىق سپورتتىڭ زاماناۋي مادەني كەڭىستىكتە جاڭا فورماتتا ناسيحاتتالۋىنا تىڭ سەرپىن بەردى.

تاعى ءبىر ەرەكشەلىگى قاتىسۋشىلاردىڭ بارلىعى دا تۇلعالى ءىرى جىگىتتەر – بويى 190 سانتيمەتردەن 2 مەتر 10 سانتيمەتر ارالىعىنداعى الىپتار. ەرنار رزاليەۆ (توپ جەتەكشىسى), ەرنۇر سادۋاقاس، سونداي-اق ماقسات نۇرقاليەۆ، جانسەرىك بەكنازار، دارحان بەگايدار، ەرنۇر جومارت، مۇحامەدجان كەڭەسبەك جانە قوسالقىدا گيمناست-دزيۋدوشى وقۋشى ەدىل مامىرايحان بولدى.

بۇل ورايدا «Baluan tas» ۇلتتىق سپورت تۇرلەرى جانە مادەنيەتى اكادەمياسىنىڭ پرەزيدەنتى ابىلايحان قالنازاروۆ:

«ءبىز قازاق كۇرەسى فەدەراتسياسى مەن فەدەراتسيالارى، اسسوتسياتسيالارى، جالپى ۇلتتىق سپورت تۇرلەرى فەدەراتسيالارى مەن اسسوتسياتسيالارى، تىپتەن تۋريزم جانە سپورت مينيسترلىگى جاساماعان قادام جاسادىق. ءوز ۇلگىمىزبەن بارشاعا جول كورسەتىپ، ۇندەۋ جاساپ وتىرمىز. تۇڭعىش رەت كۇش يەلەرى ساحىنادا ونەر كورسەتتى جانە جاي ونەر كورسەتپەي، ءوز قۇندىلىعىن يۋمور تىلىنە بايلاپ كورەرمەنگە جەتكىزدى. قازىر زامان تالابى باسقاشا. جاستارعا ءوز يدەولوگياڭدى ءسىڭىرۋ ءۇشىن ولاردىڭ سۇرانىسىنا بەيىمدەلۋىڭ كەرەك. بۇل جاعىنان «بالۋانTAS» تۇڭعىش جولاشار جانە مۇزجارعىش بولدى»، – دەپ اتاپ ءوتتى ول.

بۇدان بولەك ا.قالنازاروۆ:

«بىزدە ولارداعىداي بيۋدجەت جوق. ونداي الاپات بيۋدجەت بولعاندا كوسموسقا راكەتا ۇشىرىپ، الدەقاشان مارسقا قونۋشى ەدىك. بۇگىن ءازىل كۇنى عوي»، –  دەپ ازىلدەدى.

الايدا ابىلايحان مامىرايحانۇلىنىڭ ايتۋى ءبىر بۇل عانا ەمەس، ونىڭ ايتۋىنشا، رەسەيلىك كۆن-گە لايىقتى بالاما ەتىپ، قازاق جاستار يۋمور سالاسىن الەمدىك دەڭگەيگە كوتەرگەن ەسەن ەلەۋكەندى دە پالۋان قاتارىنا جاتقىزۋعا بولادى. ياعني ول دا بالۋانتاسشىلار ۇعىمىمەن ايتقاندا، «سيمۆولدىق بالۋان تاس كوتەرگەن پالۋان». «ونىڭ كوتەرگەنى نە؟» دەگەندە، ايتىس ونەرىن كوتەرگەن ءجۇرسىن ەرمان سەكىلدى قازاق ءازىل-وسپاعى مەن جاستار جايدارمانىنىڭ بالۋان تاسىن ەڭسەرىپ، كوتەرىپ تۇعىرلى ورنىنا قويدى.  

ويىن بارىسىندا توپ جەتەكشىسى ەرنار رزاليەۆتىڭ «بالۋان تاس دەگەن نە؟» دەگەن ساۋالىنا، «بالۋانTAS» كومانداسىنىڭ بەلدى مۇشەسى ماقسات نۇرقاليەۆ: «بالۋان تاس دەگەنىمىز – قاجىمۇقان مەن بالۋان شولاق اتالارىمىزدىڭ قولىنىڭ تابى قالعان كيەلى جادىگەر. بۇرىن اقىندار مۇنى جىرلاسا، حالىق اۋىزدان-اۋىزعا تاراتىپ، «ەرلىك – ەردىڭ ءىسى، ال سول ەرلىكتىڭ كۋاگەرى – بالۋان تاس» دەگەن»، – دەپ جاۋاپ بەردى.

ايتسا ايتقانداي،. «Baluan tas» اكادەمياسى الداعى ۋاقىتتا دا ۇلتتىق سپورتتىڭ قۇندىلىقتارىن جاستار اراسىندا كەڭىنەن دارىپتەپ، شىعارماشىلىق جوبالار ارقىلى قازاقتىڭ كۇشتىك-رۋحاني مۇراسىن جاڭعىرتۋ باعىتىنداعى جۇمىستارىن جالعاستىرا بەرەدى.

اكادەميا – قازاق كۇرەسى، بايگە، ساداق اتۋ، تەڭگە ءىلۋ، كوكپار، جامبى اتۋ، اۋدارىسپاق، قۇسبەگىلىك، توعىزقۇمالاق، اسىق اتۋ، ارقان تارتۋ سەكىلدى ۇلتتىق سپورت تۇرلەرىن تاريحي-مادەني جانە عىلىمي تۇرعىدان جۇيەلەۋگە، ولاردىڭ يدەيالىق-مەنتالدىق ءمانىن اشۋعا، سونداي-اق حالىق اراسىندا ۇلتتىق بىرەگەيلىكتى نىعايتۋعا باعىتتالعان عىلىمي-تانىمدىق ورتالىق. قۇرىلعان كۇنىنەن بەرى «ۇلتتىق سپورت كىتاپتارى» سەرياسىن، «قازاق كۇشىنىڭ كارتاسى»، «كۇش لەكتسياسى» «بالۋان تاس ساپارى» ەكسپەديتسياسى، «الىپتار مۋزەيىن اشۋ» سياقتى جالپىرەسپۋبليكالىق جوبالاردى جۇزەگە اسىرىپ كەلەدى. ەندى مىنە ولاردىڭ قاتارىنا جاستارعا باعدارلانعان جاڭا جوبا – «بالۋانTAS» كومانداسى قوسىلىپ وتىر.

ايتا كەتەيىك، اكادەميا جىل باسىنان بەرى ءنازىر تورەقۇلوۆ مۋزەيىن اشۋ مەن دەرەكتى ءفيلمىن ءتۇسىرۋ،

قاجىمۇقان دراماسىن قويۋ (جاستارمەن كوللابوراتسيا), تۇركىستان وبلىسىنا بالۋان تاس ەكسپەديتسياسىن ۇيىمداستىرۋ، كونە بالۋان تاس ءراسىمىن جاڭعىرتۋ، «بالۋان تاس» عىلىمي جۇمىسى (جاس عالىمدار) سىندى بىرقاتار ىستەردى اتقارىپ، 20-دان اسا «كۇش» لەكتسيالارىن وتكىزىپ ۇلگەردى. قازىرگى تاڭدا تاقىرىپتىق 2 مۋزەي اشۋدى جوسپارلاۋدا.

Abai.kz