رەسەيدەگى جاعدايعا بايلانىستى قازاقستاندىق فەرمەرلەر ءۇشىن ديزەل قىمباتتاي ما؟ اۋىل شارۋاشىلىعى مينيسترلىگى نە دەيدى؟

رەسەيدەن ديزەل وتىنىن ەكسپورتتاۋعا سالىنعان تىيىمنان فەرمەرلەر زارداپ شەكپەيدى — ولار ءۇشىن باعا وسپەيدى.

بۇل تۋرالى اۋىل شارۋاشىلىعى ۆيتسە-ءمينيسترى ازات سۇلتانوۆ مالىمدەدى. ونىڭ ايتۋىنشا، اۋىل شارۋاشىلىعى تاۋارىن وندىرۋشىلەر تاراپىنان 402 مىڭ توننا ديزەل وتىنىنا ءوتىنىم تۇسكەن. بۇل جانارماي رەسەيدەن يمپورتتالادى. قازىردىڭ وزىندە وڭىرلەرگە جەتكىزۋ جۇمىستارى باستالىپ كەتتى.

«اۋىل شارۋاشىلىعى وندىرۋشىلەرى تاراپىنان ەگىن جيناۋ جۇمىستارىن جۇرگىزۋگە ارنالعان ارزانداتىلعان ديزەل وتىنىنا سۇرانىس 402 مىڭ توننانى قۇرادى. ەنەرگەتيكا مينيسترلىگى بۇل كولەمدى تولىعىمەن قولداپ، جەتكىزۋ كەستەسىن بەكىتتى، قازىر وڭىرلەرگە جونەلتۋ جۇمىستارى باستالدى. اگرارشىلار وتىنىمگە سايكەس قاجەتتى جانار-جاعارماي ماتەريالدارىنىڭ (ججم) تولىق كولەمىمەن قامتاماسىز ەتىلدى. باعا ەلدەگى اۆتوجانارماي قۇيۋ ستانتسيالارىنداعى ديزەل وتىنىنىڭ قازىرگى قۇنىنان 12–15% تومەن بولادى»، — دەپ ءتۇسىندىردى سۇلتانوۆ.

ول سونداي-اق ديزەلدىڭ بوساتۋ باعاسى قىمباتتاعان كۇننىڭ وزىندە، شارۋالار ءۇشىن قۇنى وزگەرىسسىز قالاتىنىن اتاپ ءوتتى.

Abai.kz