بۇگىن بالالار كونتەنتىن دامىتۋ – جاي عانا مادەني ماسەلە ەمەس، ۇلتتىڭ ەرتەڭىن ايقىندايتىن ستراتەگيالىق مىندەت. ويتكەنى بالانىڭ ساناسى بوس كەڭىستىك ەمەس: ول كۇن سايىن كورگەنىن، ەستىگەنىن بويىنا ءسىڭىرىپ، سول ارقىلى دۇنيەتانىمىن قالىپتاستىرادى.

مەملەكەت تە بۇل ماسەلەگە نازار اۋدارىپ، وسكەلەڭ ۇرپاققا ارنالعان وتاندىق، ساپالى ءارى ۇلتتىق قۇندىلىقتارعا نەگىزدەلگەن ونىمدەردى كوبەيتۋدىڭ ماڭىزىن كوتەرىپ كەلەدى. پرەزيدەنت قاسىم-جومارت توقاەۆ بالالارعا ارنالعان قازاقتىلدى كونتەنتتىڭ تاپشىلىعىنا نازار اۋدارىپ، وتاندىق انيماتسيا مەن بالالارعا ارنالعان شىعارمالاردى دامىتۋ قاجەتتىگىن بىرنەشە رەت اتاپ وتكەن.

بۇل – ۋاقىت كۇتتىرمەيتىن ماسەلە. ويتكەنى بۇگىن بالاعا ساپالى دۇنيە ۇسىنباساق، ەرتەڭ ونىڭ اقپاراتتىق كەڭىستىگىن وزگە مادەنيەتتەر مەن تىلدەر تولتىرادى. وسى باعىتتا Abai.kz اقپاراتتىق  پورتالى بالالارعا ارنالعان «بالالارعا بازارلىق» ايدارى ارقىلى قازاق تىلىندەگى شىعارمالاردى تۇراقتى تۇردە ۇسىنىپ، ۇلتتىق ادەبيەت پەن بالالار اۋديتورياسىنىڭ اراسىن جالعاپ كەلەدى.

بۇگىن ءبىز بەلگىلى قالامگەر، اقىن، جازۋشى اراسانباي ەستەنوۆتىڭ بالالارعا بازارلىق توپتاماسىن ۇسىنامىز...

بالالارعا ارنالعان ساپالى كونتەنت كوبەيگەن سايىن قازاق ءتىلىنىڭ دە قولدانىس اياسى كەڭەيىپ، جاس ۇرپاقتىڭ رۋحاني يممۋنيتەتى كۇشەيە تۇسەدى.

كىرپى

-كىرپى، كىرپى، شىقشى ۇيدەن
ءتۇرپى، ءتۇرپى تۇيرەم،
كەرەك بىزگە ينەڭ.

الگى ىسمەر ءتيىن،
تىكپەكشى ەكەن كيىم.
تەنتەك قويان ءداۋىڭ،
جاماۋ كەرەك  اۋىن...

كىرپى سوندا كۇڭك  ەتتى:
«جەپ قويادى تۇلكى ەپتى
ۇلەستىرسەم ينەمدى!»
دەپ دوستارىن كۇلكى ەتتى:

«قوشاقان مەن تۇلكى»
(قوزعالىس ويىنى)

تۇلكى:
قوشاقانىم،
قوڭىرىم،
سەنى جاۋدان
قورىدىم.
جان دوسىمسىڭ
زور باعاڭ.
ءجۇر وينايىق،
ەر ماعان.

قوشاقان:
تۇلكىشەگىم،
تۇلەنىم،
قۋلىعىڭدى
بىلەمىن.
دوستىق ەمەس
تىلەگىڭ.
سەزەر ونى
جۇرەگىم.

سۋسار بوركى اتامنىڭ

قىراۋ شالعان باسىنا
سۋسار بوركى جاراسار،
اتامىزدىڭ جاسىنا
اۋىلدا كىم تالاسار؟..

بايتەرەككە تەڭەلگەن
اتام جۇرتقا سىيلى ادام.
شىعىس حالقى ەجەلدەن
بورىكتىنى سىيلاعان.

اقساقالى اتاندى
كەڭ پەيىلدى كوركىمەن.
سونادايدان اتامدى
تانيدى اۋىل بوركىنەن.          

مەن وقۋشى اتاندىم

ۇقساتپا مەنى باسقاعا،
ەسەيدىم، التى جاستامىن.
قوش ايتىپ ەندى باقشاعا،
مەكتەپكە جولدى باستادىم.

قايىرماسى:

ەركەسى ەدىم اتامنىڭ،
ەركەسى ەدىم اپامنىڭ،
تولىپ بيىل التىعا
مەن وقۋشى اتاندىم.

قۇرالدارىم بەك كەرىم،
مىنە، سىنىپ، مەكتەبىم.
ءتىسىم كەتىك بولعانمەن،
بىلەتىنىم كوپ مەنىڭ.

توقىلداق

تۇمسىعى – «قايلاسى»،
قۇرت بىتكەن جايل(ى) اسى.
جاعىمدى جاقسى قۇس،
ەلگە كوپ پايداسى.

اۋەنى: «توق-توق، توق!
قۇرتقا جول جوق-جوق، جوق!»
توقىلداق، توقىلدات،
«قايلاڭدى» سوق-سوق، سوق!

تابيعات جاقتاسى،
زيانكەس - جاقپاسى.
نۋ ورمان-توعايدىڭ
تازالىق پاتشاسى.

اۋەنى: «توق-توق، توق!
قۇرتقا جول جوق-جوق، جوق!»
توقىلداق، توقىلدات،
«قايلاڭدى» سوق-سوق، سوق!

ءبىز  عارىشكەر بولامىز

ارمانى بار ءبىر عانا،
تالابى زور بالامىز.
شىنىعۋمەن شىڭدالا،
تەز-اق ءوسىپ، تولامىز.

جۇلدىزداردى جاعالاي،
ايعا بارىپ قونامىز.
تۇڭعىش توقتار اعاداي
ءبىز عارىشكەر بولامىز.

تاسباقا-نيندزيا

نامىس وتىن جاۋعا بەرمەس،
جەكپە-جەكتە كەلمەس تەڭدەس.
باتىلداردى دوسقا بالار،
جاۋجۇرەكتى تاسباقالار.

قايىرماسى:

ميكي، لەو، دوني، رافا،
دوستىق ءۇشىن بولماس قاپا.
قولدارىنان كەلەر ءبارى،
شەبەرلەردىڭ شەبەرلەرى.

ءبىرىن-ءبىرى قوشتاپ-قوستار،
تاتۋ-ءتاتتى باتىل دوستار.
قارسىلاسىن جاسقاپ الار،
سەگىز قىرلى تاسباقالار.

پينگۆيندەر ءانى

ۇشپاسام دا قالىقتاي،
سۋدا جۇزەم بالىقتاي.
مۇزدا ەشبىر تايمايتىن
تابانىم بار شارىقتاي.

تىرشىلىكتە كۇي-كەرۋەن،
جالىقپاس ەش بيلەۋدەن،
مەنەن كورىپ ادامدار
فراك كيۋدى ۇيرەنگەن.

انتاركتيدا ­– مەكەنىم،
وتە، شالعاي شەتتەمىن.
جاياۋ ءجۇرىپ ادامشا-اق،
ماقساتىما جەتكەمىن.

ارىستان

جەلمەن جۇيرىك
جارىسقان،
اڭ پاتشاسى –
ارىستان.

ايباتتى دا
قىراعى.
ىستىق ولكە
تۇراعى.

سوندا ماڭگى
تۇرادى،
پاتشالىعىن
قۇرادى.

ناۋرىز تويى 

اق كوبەيەر –
سارى ۋىز،
كەلدى قۇتتى
ناۋىرىز.

ناۋرىز تويى –
جىل باسى،
ناۋرىز باتا –
جىر باسى.

كوكتەم

قاردان ارشىپ
بەلەستى،
جىلى-جىلى
جەل ەستى.
اسىر سالىپ
وينايمىز،
ناۋرىز تويىن
تويلايمىز.

جاۋ، جاڭبىر

جاۋ-جاۋ، جاڭبىر، جاۋ جاڭبىر،
قىرلارىمدى جانداندىر.
ءششولىن باسىپ بالاۋسا،
بوي كوتەرسىن الۋان گۇل.

جاۋ-جاۋ، جاڭبىر، جاۋا بەر.
ماۋقىن باسسىن قارا جەر.
اۋامىزدى تازارتىپ،
دالامىزعا داۋا بەر.

توك اياماي قۇنارىڭ،
باسسىن دالا قۇمارىن.
ەگىستىكتەر جەلكىلدەپ،
شومىلتسىن كول قۇراعىن.

مامىر مەرەكەسى

كۇي قالىقتاپ قالامدا،
جەلبىرەيدى كوك تۋىم.
جۇرت جينالعان الاڭدا
قىزىل شارلار كوپ بۇگىن.

شىرقالادى اۋەنى
ۇلىستاردىڭ سان الۋان.
مەرەكە بۇل ادەمى
بىرلىك كۇنى سانالعان.

شاتتىق اندەر شارىقتاپ،
تىلدەسكەندەي كوك پەن جەر.
توبەمىزدە قالىقتاپ،
شاتتانادى كەپتەرلەر.

اراسانباي ەستەنوۆ

Abai.kz