الماتىدا IV Almaty Circus Festival حالىقارالىق تسيرك ونەرى فەستيۆالى مارەسىنە جەتتى. بۇل قازاق مەملەكەتتىك تسيركىنىڭ مانەجىندە الەمنىڭ ءار ەلىنەن كەلگەن ۇزدىك تسيرك ارتيستەرىن توعىستىرعان جىلدىڭ ەڭ ايتۋلى مادەني مادەني وقيعالارىنىڭ ءبىرى بولدى. بىرنەشە كۇن بويى كورەرمەندەر زاماناۋي تسيرك ونەرىنىڭ بيىك دەڭگەيىن ايشىقتاعان بىرەگەي قويىلىمداردى، كۇردەلى تريۋكتەر مەن تۇساۋكەسەر نومىرلەردى تاماشالادى.

وتكەن جىلدار ىشىندە Almaty Circus Festival مانەج شەبەرلەرى، جاس دارىندار، جەتەكشى تسيرك ۇيىمدارىنىڭ باسشىلارى، پروديۋسەرلەر مەن بەدەلدى حالىقارالىق فەستيۆالدەردىڭ ۇيىمداستىرۋشىلارى توعىساتىن بەدەلدى حالىقارالىق الاڭعا اينالدى. بۇگىندە فەستيۆال الەمدىك تسيرك ونەرىنىڭ ماڭىزدى فورۋمدارىنىڭ قاتارىنان ويىپ تۇرىپ ورىن الىپ، ارتيستەرگە كاسىبي تۇرعىدان دامۋعا، حالىقارالىق ىنتىماقتاستىقتى نىعايتۋعا جاڭا مۇمكىندىكتەر اشىپ كەلەدى.

بايقاۋ باعدارلاماسىنا الەمدىك تسيرك ونەرىنىڭ تانىمال قايراتكەرلەرى، ءىرى تسيرك ۇيىمدارى، حالىقارالىق فەستيۆالدەر مەن پروديۋسەرلىك كومپانيالاردىڭ جەتەكشىلەرى ەنگەن حالىقارالىق قازىلار القاسى تورەلىك ەتتى.

فەستيۆالدىڭ ەڭ جوعارى ماراپاتى – باس جۇلدە قىتايدىڭ Hebei Wuqiao Acrobatic Arts School ونەر مەكتەبىنىڭ ارتيستەرى چجان حاو مەن لي تيان مەن ورىنداعان «Double Wire Act» («ەركىن سىم – كەرىلگەن ارقان») نومىرىنە بۇيىردى. قوس ونەرپازدىڭ جوعارى تەحنيكالىق شەبەرلىگى، تەپە-تەڭدىكتى ءمىنسىز ساقتاي ءبىلۋى، اسا كۇردەلى تريۋكتەردى ورىنداۋداعى كاسىبيلىگى مەن كوركەمدىك شەشىمى قازىلار القاسىنىڭ جوعارى باعاسىنا يە بولىپ، بايقاۋدىڭ شارىقتاۋ شەگىنە اينالدى.

التىن جۇلدەگە فرانتسيادان كەلگەن تۋربەلين ماتەو انتۋان مەن ساۆاري ەليانىڭ جۇپتىق ديابولو ونەرىن پاش ەتكەن «Venus» ءنومىرى، موڭعوليانىڭ ۋرانگوو چينباتار جەتەكشىلىك ەتەتىن «Selenge» ترۋپپاسى، سونداي-اق بەلارۋس مەملەكەتتىك تسيركىنىڭ تراپەتسياداعى اۋە گيمناستارى ەگور مەن اناستاسيا كوۆالەنكونىڭ «Legend» ءنومىرى لايىق دەپ تانىلدى.

كۇمىس جۇلدە ۆەنگريانىڭ Kriko دۋەتىنە (زوي كريۆانەك پەن بەنتسە كوللار) اۋە بەلدىكتەرىندەگى شەبەر ونەرى ءۇشىن، رەسەيلىك ارتيست ولگا روجكوۆسكايانىڭ «اۋە ارقانى» نومىرىنە جانە شۆەيتساريانىڭ Janine & Fabien دۋەتى ورىنداعان اۋە اداجيوسىنا تابىستالدى.

قولا جۇلدەنى وزبەكستاننىڭ Sky Angels «Infinity Aliyeva» ۇجىمى، ۋكراينا مەن ارمەنيا اتىنان ونەر كورسەتكەن جونگلەر داۆيد ەميشيان، سونداي-اق نادەجدا ەفيمەنكو جەتەكشىلىك ەتەتىن شىمكەنت تسيركىنىڭ «اسپان ارۋلارى» اۋە گيمناستارى يەلەنىپ، قازاقستاننىڭ ابىرويىن اسقاقتاتتى.

فەستيۆالدىڭ جابىلۋ سالتاناتىندا حالىقارالىق قازىلار القاسىنىڭ ارنايى سىيلىقتارى ءداستۇرلى تۇردە تابىستالدى. بۇل ماراپاتتار كوپتەگەن ونەرپاز ءۇشىن الەمنىڭ جەتەكشى تسيرك ارەنالارىنا، ايتۋلى حالىقارالىق فەستيۆالدەرگە جول اشىپ، جاڭا شىعارماشىلىق جوبالارعا قاتىسۋعا مۇمكىندىك بەرەدى.

IV حالىقارالىق Almaty Circus Festival الماتىنىڭ زاماناۋي تسيرك ونەرىنىڭ حالىقارالىق ورتالىقتارىنىڭ ءبىرى رەتىندەگى جوعارى مارتەبەسىن تاعى ءبىر مارتە ايقىندادى. قاتىسۋشىلار ءۇشىن بۇل فەستيۆال كاسىبي شەبەرلىك باسەكەسى عانا ەمەس، الەمدىك دەڭگەيدەگى فەستيۆالدەرگە شاقىرتۋ الىپ، حالىقارالىق كەلىسىمشارتتار جاساۋعا جانە تسيرك يندۋسترياسىنىڭ جەتەكشى وكىلدەرىنە ونەرىن تانىتۋعا مۇمكىندىك بەرگەن ماڭىزدى شىعارماشىلىق الاڭ بولدى.

فەستيۆال تاعى ءبىر مارتە تسيرك ونەرىنىڭ ءتىلى ەشقانداي اۋدارمانى قاجەت ەتپەيتىن امبەباپ ونەر ەكەنىن دالەلدەدى. باتىلدىق پەن تالانت، ادام مۇمكىندىگىنىڭ شەكسىزدىگى مەن ىسىنە دەگەن ادالدىق الەمنىڭ ءار قيىرىنان كەلگەن ارتيستەردى ءبىر مانەجدە توعىستىرىپ، كورەرمەنگە ۇمىتىلماس اسەر مەن الەمدىك تسيرك ونەرىنىڭ شىنايى مەرەكەسىن سىيلادى. قازىردىڭ وزىندە IV Almaty Circus Festival قازاقستاننىڭ مادەني ومىرىندەگى ەڭ جارقىن وقيعالاردىڭ بىرىنە اينالىپ، وتاندىق تسيرك ونەرىنىڭ حالىقارالىق بەدەلىن ارتتىرۋ جولىنداعى ماڭىزدى بەلەس بولعانىن نىق سەنىممەن ايتۋعا بولادى.

ەسكە سالا كەتەيىك، IV حالىقارالىق Almaty Circus Festival فەستيۆالىنىڭ مەرەكەلىك گالا-كونتسەرتى 23 تامىزعا دەيىن جالعاسادى. الماتى تۇرعىندارى مەن قالا قوناقتارى الەمنىڭ جەتەكشى تسيرك ارتيستەرى ورىنداۋىنداعى بىرەگەي قويىلىمداردى، تاڭعاجايىپ تريۋكتەردى جانە فەستيۆالدىڭ ۇزدىك نومىرلەرىن تاماشالاي الادى.

Abai.kz