بۇگىندە 1,8 ملن بالا مەن ءجاسوسپىرىم، ياعني ولاردىڭ جالپى سانىنىڭ 34,6%-ى دەنە شىنىقتىرۋمەن جانە سپورتپەن تۇراقتى تۇردە اينالىسادى. 2029 جىلعا قاراي بۇل كورسەتكىشتى 45%-عا دەيىن جەتكىزۋ جوسپارلانىپ وتىر.

سپورت سالاسىندا جۇرگىزىلىپ جاتقان اۋقىمدى رەفورمالار اياسىندا بيىل ەنگىزىلگەن بالالار مەن جاسوسپىرىمدەر سپورت مەكتەپتەرىن (بجسم) قارجىلاندىرۋدىڭ جاڭا مودەلى ءبىر تاربيەلەنۋشىگە جۇمسالاتىن شىعىن كولەمىن جىلىنا 233 مىڭ تەڭگەدەن 415 مىڭ تەڭگەگە دەيىن ارتتىرۋعا مۇمكىندىك بەردى. 2026–2028 جىلدارى بالالار-جاسوسپىرىمدەر سپورتىن دامىتۋعا 74 ملرد تەڭگە قاراستىرىلعان. بۇل قاراجات سپورت مەكتەپتەرىن قاجەتتى قۇرال-جابدىقتارمەن قامتاماسىز ەتۋگە، سپورتتىق كيىم-كەشەك الۋعا، جارىستار مەن وقۋ-جاتتىعۋ جيىندارىن وتكىزۋگە باعىتتالادى. سونىمەن قاتار بىلىكتىلىك تەستىلەۋىنەن وتكەن بجسم جاتتىقتىرۋشىلارىنىڭ ەڭبەكاقىسى 30%-عا ارتتادى.

4 پەن 17 جاس ارالىعىنداعى 228 مىڭنان استام بالا مەملەكەتتىك سپورتتىق تاپسىرىس اياسىندا 7 مىڭنان استام سپورت سەكتسياسىنا تەگىن قاتىسادى. ونى ىسكە اسىرۋعا 50 ملرد تەڭگە قاراستىرىلعان. بۇدان بولەك، شامامەن 400 مىڭ بالا 526 بالالار-جاسوسپىرىمدەر جانە مامانداندىرىلعان سپورت مەكتەپتەرىندە سپورتپەن شۇعىلدانادى.

سونداي-اق، مەملەكەتتىك سپورتتىق تاپسىرىس تەتىگى اياسىندا ينكليۋزيۆتى، ينتەگراتسيالانعان جانە ارنايى توپتار قۇرۋ كوزدەلگەن. ۇلتتىق ينكليۋزيۆتى «جۇلدىزاي» ويىندارىن وتكىزۋ جانە وڭىرلەردە ينكليۋزيۆتى سپورت ورتالىقتارىن قۇرۋ جۇمىستارى جالعاسۋدا. 2024 جىلدىڭ قورىتىندىسى بويىنشا 16 سپورت كلۋبى مەن مۇمكىندىگى شەكتەۋلى جاندارعا ارنالعان ەكى مامانداندىرىلعان سپورت مەكتەبىندە شامامەن 7,5 مىڭ سپورتشى شىنىعادى.

سپورتتىق ينفراقۇرىلىمدى كەڭەيتۋ جۇمىستارى دا جالعاسۋدا. قازىرگى تاڭدا ەلىمىزدە 26 518 سپورت نىسانى جۇمىس ىستەيدى. حالىقتى سپورت ينفراقۇرىلىمىمەن قامتاماسىز ەتۋ دەڭگەيى 59,6%-دى، اۋىلدىق جەرلەردە 62,1%-دى قۇرايدى. 2025 جىلى 147 سپورت نىسانى، ونىڭ ىشىندە اۋىلدىق جەرلەردە 107 نىسان پايدالانۋعا بەرىلدى. 2026 جىلى تاعى 121 نىساندى، ونىڭ ىشىندە جىل سوڭىنا دەيىن 87 نىساندى پايدالانۋعا بەرۋ جوسپارلانعان.

بالالار مەن بۇقارالىق فۋتبولدى دامىتۋعا ەرەكشە كوڭىل بولىنۋدە. باعدارلاما اياسىندا جوسپارلانعان 685 فۋتبول الاڭىنىڭ 520-سى قازىردىڭ وزىندە پايدالانۋعا بەرىلدى. ونىڭ ىشىندە 378 الاڭ اۋىلدىق جەرلەردە ورنالاسقان.

تۋريزم جانە سپورت مينيسترلىگى حالىققا قولجەتىمدى سپورت ينفراقۇرىلىمىن ودان ءارى دامىتىپ، قالا مەن اۋىل اراسىنداعى الشاقتىقتى قىسقارتۋعا، سونداي-اق بالالار مەن جاسوسپىرىمدەردىڭ سپورتپەن تۇراقتى اينالىسۋىنا بارىنشا قولايلى جاعداي جاساۋعا باعىتتالعان جۇمىستاردى جالعاستىرادى.

Abai.kz