قازاقستاندا العاش رەت Astana AI Film Festival ءوتىپ، بىردەن الەمدىك اۋقىمداعى شاراعا اينالدى. 125 ەلدەن تۇسكەن 8 067 ءوتىنىم ونى جاساندى ينتەللەكت كومەگىمەن جاسالعان كينو تۋىندىلارى اراسىنداعى ەڭ ءىرى حالىقارالىق بايقاۋعا اينالدىردى.

بۇگىن ەلوردادا جەڭىمپازدار جاريالاندى.

گران-پري مەن $450 مىڭدى لاتۆيادان كەلگەن Nikolay Shestak «The First Honest Day» ءفيلمى ءۇشىن يەلەندى. ءىس-ارەكەتتەرىڭىز سىرتقى كەلبەتىڭىزدى تىكەلەي وزگەرتەتىن الەمدى ەلەستەتىپ كورىڭىز: جاماندىق جاساساڭىز – اجارسىزداناسىز، جاقسىلىق جاساساڭىز – قۇلپىرا تۇسەسىز. جەڭىمپاز مۇنداي ماراپاتتى كۇتپەگەنىن، ال جۇلدە قارجىسىن جاڭا فيلمدەر تۇسىرۋگە جۇمساماق ەكەنىن ايتتى.

قازاقستاندىق مىرزاحان جۇماحان «ۇزدىك كەيىپكەر» نوميناتسياسىندا جەڭىسكە جەتتى. ونىڭ «It Was Just a Joke» كومەدياسىندا يت پەن ونىڭ يەسىنىڭ اعاسى ءبىر ءازىلدىڭ كەسىرىنەن جانجالداسىپ قالادى. وقيعانىڭ ارى قارايعى ءوربۋى ناعىز بلوكباستەردەن كەم ەمەس. اۆتوردىڭ ءوزى پرانك پەن كوڭىلدى جاقسى كورەتىنىن، سوندىقتان وسىنداي وقيعانى تۇسىرگەنىن ايتادى.

(سۋرەت:كازينفورم)

ەكىنشى ورىن جانە $200 مىڭ – ءۇندىستاننىڭ «SITARA» فيلمىنە بۇيىردى. ءۇشىنشى ورىن مەن $100 مىڭدى يسپانيالىق «Looking For Perseida» يەلەندى.

مىڭداعان ءوتىنىمنىڭ ىشىنەن فينالعا نەبارى 25 جۇمىس ءوتتى. ولاردى حالىقارالىق قازىلار القاسى باعالادى. ونىڭ قۇرامىندا يۋنەسكو-نىڭ بۇرىنعى باسشىسى ودري ازۋلە جانە ينۆەستور بالادجي سرينيۆاسان بولدى.

فەستيۆالدىڭ جالپى جۇلدە قورى – $2 ملن: ونىڭ جارتىسى جۇلدەلەرگە، قالعان جارتىسى پەرسپەكتيۆالى AI-كوماندالاردى قولداۋعا جانە قازاقستانداعى ءوندىرىستى دامىتۋعا باعىتتالادى.

جي كومەگىمەن جاسالعان فيلمدەر بۇگىندە ۇلكەن ەكراندا كورسەتىلىپ، جۇزدەگەن مىڭ دوللار كولەمىندەگى جۇلدەلەرگە يە بولىپ جاتىر. استانا مۇنداي فەستيۆالدى العاش رەت قابىلداپ، الەمنىڭ تۇكپىر-تۇكپىرىنەن كەلگەن ۇزدىك جۇمىستار تاڭدالاتىن الاڭعا اينالدى.

Abai.kz