پرەزيدەنت جولداۋىن جۇزەگە اسىرۋ: ەلىمىزدىڭ كولىك جۇيەسى قالاي وزگەرۋدە?

ۇكىمەت مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا بەرگەن وڭىرلىك كولىك بايلانىسىن دامىتۋ جونىندەگى تاپسىرمالارىن ورىنداۋ اياسىندا اۆتوموبيل، تەمىرجول، اۆياتسيا جانە تەڭىز ينفراقۇرىلىمىن جاڭعىرتۋعا، سونداي-اق لوگيستيكالىق باعىتتاردى دامىتۋعا باعىتتالعان كەشەندى شارالاردى جۇزەگە اسىرۋدا.

باسىم باعىتتار – وڭىرلەر اراسىنداعى كولىك بايلانىسىن نىعايتۋ، جول ءجۇرۋ ۋاقىتىن قىسقارتۋ جانە نەگىزگى حالىقارالىق دالىزدەردەگى جۇك اعىنىن جەدەلدەتۋ.

ءۇش جىلدا 19,1 مىڭ شاقىرىم جول سالىنىپ، جوندەلدى

2023–2025 جىلدارى قازاقستاندا 19,1 مىڭ شاقىرىم اۆتوموبيل جولى سالىندى، رەكونسترۋكتسيالاۋ جۇمىستارى جۇرگىزىلىپ، جوندەلدى. 2026 جىلى رەسپۋبليكالىق جانە جەرگىلىكتى ماڭىزى بار 11 مىڭ شاقىرىمنان استام جول رەكونسترۋكتسيالاۋ، قۇرىلىس جانە جوندەۋ جۇمىستارىمەن قامتىلدى.

2029 جىلعا دەيىن رەسپۋبليكالىق ماڭىزى بار جولداردىڭ 97%-ىن نورماتيۆتىك جاعدايعا كەلتىرۋ جوسپارلانىپ وتىر.

2026 جىلدىڭ سوڭىنا قاراي نورماتيۆتىك تالاپتارعا ساي كەلەتىن رەسپۋبليكالىق ماڭىزى بار جولداردىڭ ۇلەسى 2023 جىلعى 92%-دان 95%-عا، ال جەرگىلىكتى ماڭىزى بار جولداردىڭ ۇلەسى 86%-دان 92%-عا دەيىن ارتۋى ءتيىس. 2029 جىلعا قاراي بۇل كورسەتكىشتەردى تيىسىنشە 97% جانە 94%-عا جەتكىزۋ كوزدەلگەن.

جەكەلەگەن باعىتتاردا جول ءجۇرۋ ۋاقىتى ەكى ەسەدەن استام قىسقاردى

باتىس قازاقستان وبلىسىندا قازتالوۆ، جانىبەك جانە بوكەي ورداسى اۋداندارىن وبلىس ورتالىعىمەن بايلانىستىراتىن 245 شاقىرىم جولدى رەكونسترۋكتسيالاۋ جانە كۇردەلى جوندەۋ جۇمىستارى اياقتالدى. 54 مىڭ تۇرعىن ءۇشىن ورالعا دەيىنگى جول ءجۇرۋ ۋاقىتى 12–14 ساعاتتان 5–6 ساعاتقا دەيىن قىسقاردى.

بۇگىندە تاعى 800 شاقىرىم تەمىرجول سالىنىپ جاتىر

سوڭعى بەس جىلدا ەلىمىزدە 911 شاقىرىم جاڭا تەمىرجول سالىندى. قازىر تاعى 800 شاقىرىم تەمىرجولدىڭ قۇرىلىسى جۇرگىزىلىپ، قولدانىستاعى 2,6 مىڭ شاقىرىمعا جۋىق تەمىرجول جاڭعىرتىلۋدا.

ىشكى اۋە رەيستەرىنىڭ سانى اپتاسىنا 890-عا جەتتى 2026 جىلى ارقالىق اۋەجايى قالپىنا كەلتىرىلىپ، استانا، الماتى جانە قوستانايمەن اۋە قاتىناسى قايتا جانداندى. جىل سوڭىنا دەيىن زايسان، قاتونقاراعاي جانە كەندىرلى كۋرورتتىق ايماعىنداعى جاڭا اۋەجايلاردىڭ قۇرىلىسىن اياقتاۋ جوسپارلانىپ وتىر. 2026 جىلعى قىركۇيەكتەگى جاعداي بويىنشا ىشكى اۋە قاتىناسى 60-قا جۋىق باعىتتى قامتىپ، اپتاسىنا 890 رەيس ورىندالادى.

تسيفرلاندىرۋ جولاۋشىلار مەن جۇك تاسىمالىن جەدەلدەتەدى

تەمىرجولدا پويىزداردىڭ قوزعالىسىن ناقتى ۋاقىت رەجيمىندە باقىلاۋعا مۇمكىندىك بەرەتىن GPS-ترەكەرلەر نەگىزىندەگى «پويىزدار قوزعالىسىنىڭ ونلاين-تابلوسى» سەرۆيسى ەنگىزىلدى. OneWeb جانە Starlink سپۋتنيكتىك ينتەرنەتىن دامىتۋ جۇمىستارى جالعاسۋدا. ترانسكاسپي حالىقارالىق كولىك باعىتىندا Digital Trade Corridor پلاتفورماسى ەنگىزىلىپ، Tez Customs ءمودۋلى كەدەندىك راسىمدەۋ ۋاقىتىن 8 ساعاتتان 30 مينۋتقا دەيىن قىسقارتتى. كەشەندى شارالاردىڭ ناتيجەسىندە تحكب بويىنشا جۇكتەردى جەتكىزۋ مەرزىمى 38 تاۋلىكتەن 13–17 تاۋلىككە دەيىن قىسقاردى.

كولىك جۇيەسىن دامىتۋ اياسىندا اۆتوموبيل، تەمىرجول، اۆياتسيا جانە تەڭىز ينفراقۇرىلىمىن جاڭارتۋ تاسىمالدى تسيفرلاندىرۋمەن قاتار جۇرگىزىلۋدە. بۇل وڭىرلەر اراسىنداعى كولىك بايلانىسىن نىعايتىپ، جول ءجۇرۋ ۋاقىتىن قىسقارتادى جانە قازاقستاننىڭ ترانزيتتىك مۇمكىندىكتەرىن ارتتىرادى.

Abai.kz