«تازا قازاقستان» رەسپۋبليكالىق ەكولوگيالىق اكتسياسى اياسىندا جەتىسۋ وبلىسىندا «جەتىسۋدىڭ 7 قازىناسى: تامشىبۇلاق» ەكولوگيالىق اكتسياسى ۇيىمداستىرىلدى. يگى باستاما تۋعان ولكەنىڭ تابيعي مۇراسىن ساقتاۋ، قورشاعان ورتانى قورعاۋ مادەنيەتىن قالىپتاستىرۋ جانە ءوڭىردىڭ كورىكتى جەرلەرىن كەلەر ۇرپاققا امانات ەتۋ ماقساتىندا جۇزەگە اسىرىلدى.

اكتسيانىڭ نەگىزگى ماقساتى - جەتىسۋ ءوڭىرىنىڭ تابيعي مۇراسىن دارىپتەۋ، تامشىبۇلاق بۇلاعىنىڭ ەكولوگيالىق تازالىعىن ساقتاۋ، جاستاردىڭ ەكولوگيالىق مادەنيەتى مەن تابيعاتقا دەگەن جاۋاپكەرشىلىگىن ارتتىرۋ بولدى. سونىمەن قاتار قورشاعان ورتانى قورعاۋعا باعىتتالعان باستامالاردى قولداۋ، تۋعان ولكەنىڭ تابيعي بايلىقتارىنا جاناشىرلىقپەن قاراۋدى ناسيحاتتاۋ جانە جاستاردىڭ ەكولوگيالىق ماسەلەلەردى شەشۋگە بەلسەندى قاتىسۋىنا ىقپال ەتۋ كوزدەلدى.

ەكولوگيالىق اكتسيا اياسىندا جەتىسۋ وبلىسىنىڭ جاستارى تامشىبۇلاق بۇلاعىنىڭ بويىنا الما كوشەتتەرىن وتىرعىزدى. بۇل باستاما تابيعي اۋماقتى كوگالداندىرۋعا، جاسىل جەلەك كولەمىن ارتتىرۋعا جانە بۇلاق ماڭىنداعى قورشاعان ورتانى كوركەيتۋگە باعىتتالدى. اعاش وتىرعىزۋ ارقىلى جاستار تۋعان جەردىڭ تابيعاتىنا قامقورلىق تانىتىپ، ەكولوگيالىق جاۋاپكەرشىلىكتىڭ ناقتى ىسپەن كورىنىس تاباتىنىن كورسەتتى.

اكتسيانىڭ ەرەكشەلىگى - ونىڭ ناتيجەسى ءبىر كۇندىك شارامەن شەكتەلمەي، ۋاقىت وتە كەلە جەمىسىن بەرەتىن يگى ىسكە اينالۋىندا. اكتسيا بارىسىندا وتىرعىزىلعان ءاربىر الما كوشەتى الداعى جىلدارى تامىرىن تەرەڭگە جايىپ، سايالى اعاشقا اينالىپ، جەمىس بەرەدى دەپ كۇتىلەدى. جىلدار وتكەن سوڭ وسى اۋماقتا جايقالعان الما اعاشتارىن كورىپ، ولاردىڭ يگىلىگىن كەلەر ۇرپاق كورەدى. بۇل باستاما بۇگىنگى بۋىننىڭ بولاشاق الدىنداعى جاۋاپكەرشىلىگىن ءبىلدىرىپ، تابيعاتقا دەگەن جاناشىرلىقتى ناقتى ىسپەن ۇشتاستىردى.

- «جەتىسۋدىڭ 7 قازىناسى» باستاماسى ءوڭىردىڭ تابيعي مۇراسىن كەڭىنەن تانىتۋعا، ونىڭ قۇندىلىعىن ۇعىندىرۋعا جانە تۋعان ولكەنىڭ بايلىعىن قورعاۋعا قوعام نازارىن اۋدارۋعا مۇمكىندىك بەردى. ال «تازا قازاقستان» اكتسياسى اياسىندا جۇزەگە اسىرىلعان بۇل جۇمىس جاستاردىڭ قورشاعان ورتاعا دەگەن جاۋاپكەرشىلىگىن ارتتىرىپ، تابيعاتتى قورعاۋ ءاربىر ازاماتتىڭ ورتاق مىندەتى ەكەنىن ناسيحاتتادى. بۇگىن وتىرعىزىلعان الما كوشەتتەرى - كەلەشەك ۇرپاققا قالدىرىلعان يگى مۇرا. تابيعاتتى قورعاۋعا باعىتتالعان وسىنداي باستامالار تۋعان ولكەنىڭ كوركەيۋىنە ۇلەس قوسىپ، قورشاعان ورتاعا قامقورلىق جاساۋدىڭ ماڭىزىن كورسەتتى، دەدى ۆولونتەر جانە قوعام بەلسەندىسى ۆلاديمير چەپەل.

Abai.kz