الماتىدا سانجار بوقاەۆقا، ونىڭ جيەنى ماديار قالمەنوۆكە جانە جەكە بەينەوپەراتورى ۇلان نۇسىپقوجاعا قاتىستى قىلمىستىق ءىس بويىنشا سوت تالقىلاۋى جالعاسىپ جاتىر.

بوقاەۆ پەن وزگە دە فيگۋرانتتار بىرقاتار قىلمىستىق قۇقىق بۇزۋشىلىق جاسادى دەگەن كۇدىكپەن ايىپتالىپ وتىر. ءىس قىلمىستىق كودەكستىڭ بىرنەشە بابى (190, 218, 340, 188 جانە 274-باپتار) بويىنشا قارالىپ جاتىر.

العاشقى سوت وتىرىسىندا توراعالىق ەتۋشى سۋديا پروتسەسكە قاتىسۋشىلارعا ءىستىڭ ءمانى بويىنشا، ونىڭ ىشىندە باق پەن الەۋمەتتىك جەلىلەر ارقىلى سۋبەكتيۆتى پايىمداۋلار مەن پىكىرلەردى جاريا تۇردە بىلدىرۋگە جول بەرىلمەيتىنىن جانە مۇنداي ارەكەتتەر سوتقا قىسىم كورسەتۋ رەتىندە باعالاناتىنىن ەسكەرتتى.

الايدا بىرنەشە رەت ەسكەرتۋ جاسالعانىنا قاراماستان، بوقاەۆتىڭ ادۆوكاتتارىنىڭ ءبىرى رادمير وتەپوۆ قارالىپ جاتقان قىلمىستىق ىسكە قاتىستى ءوزىنىڭ جەكە باعالاۋلارى مەن سۋبەكتيۆتىك بولجامدارىن باق پەن الەۋمەتتىك جەلىلەردە تاراتقان.

ونىڭ ۇستىنە، ءتيىستى بەينەۇندەۋ سوت پروتسەسكە قاتىسۋشىلارعا مۇنداي ارەكەتتەرگە جول بەرىلمەيتىنى تۋرالى قايتالاپ ەسكەرتكەننەن كەيىن جاريالانعان.

بۇگىن سوت وتىرىسىنىڭ باسىندا مەملەكەتتىك ايىپتاۋشى ادۆوكاتتىڭ كوپشىلىك الدىنداعى ارەكەتتەرىنىڭ زاڭدىلىعىنا قاتىستى قاۋلى شىعارۋ تۋرالى سوتقا ءوتىنىشحات جولدادى.

پروكۋرور سوت بەلگىلەگەن شەكتەۋلەر قىلمىستىق ءىستىڭ وبەكتيۆتى، جان-جاقتى جانە بەيتاراپ قارالۋىن قامتاماسىز ەتۋگە، سوتقا كەز كەلگەن قىسىم كورسەتۋدىڭ الدىن الۋعا جانە سوت تورەلىگىن جۇزەگە اسىرۋعا ارالاسۋعا جول بەرمەۋگە باعىتتالعانىن اتاپ ءوتتى.

سوت پروكۋروردىڭ ۋاجدەرىمەن كەلىسىپ، ادۆوكاتتىڭ توراعالىق ەتۋشى سۋديانىڭ وكىمدەرىن ەلەمەگەنىن، سونداي-اق سوتقا قۇرمەتپەن قاراۋدى جانە سوت ءىسىن جۇرگىزۋ ءتارتىبىن ساقتاۋدى كوزدەيتىن كاسىبي ادەپ تالاپتارىن بۇزعانىن اتاپ ءوتتى.

«سوت پروتسەسى اشىق تۇردە ءوتىپ جاتىر. كەز كەلگەن ادام سوت وتىرىسىنا كەلىپ، قاتىسا الادى. سونداي-اق باق وكىلدەرى مەن تىڭداۋشىلار ءۇشىن ترانسلياتسيا قامتاماسىز ەتىلگەن. بۇعان دەيىن پروتسەسكە قاتىسۋشىلارعا باق-تا پىكىر ءبىلدىرۋ جانە الەۋمەتتىك جەلىلەردە جاريالانىمدار تاراتۋ ارقىلى سوتقا قىسىم كورسەتۋگە جاعداي جاساۋعا جول بەرىلمەيتىنى ەسكەرتىلگەن بولاتىن. سوعان قاراماستان، ادۆوكات وتەپوۆ بۇل ەسكەرتۋدى ەكى رەت بۇزدى. قورعاۋ تاراپىنىڭ قۇقىقتارى شەكتەلگەن جوق. كاسىبي مامان رەتىندە سىزدەر ءوز سەنىم بىلدىرۋشىلەرىڭىزدىڭ مۇددەلەرىن مەديا كەڭىستىكتەگى بەلسەندىلىك ارقىلى ەمەس، سوت زالىندا قورعاۋعا مىندەتتىسىزدەر»، – دەدى سۋديا.

وسىلايشا، ادۆوكاتتىڭ ارەكەتتەرى كوپشىلىك اراسىندا سوت تەرگەۋىنىڭ بارىسى تۋرالى بۇرمالانعان تۇسىنىك پەن قاتە پىكىر قالىپتاستىرىپ، سوتقا قىسىم كورسەتۋگە العىشارتتار جاسايدى.

ءوتىنىشحاتتى قاراۋ ناتيجەسىندە الماتى قالالىق ادۆوكاتتار القاسىنىڭ اتىنا جەكە قاۋلى شىعارىلدى. ەندى قورعاۋشىنىڭ ارەكەتتەرى زاڭناما مەن كاسىبي ادەپ تالاپتارىنىڭ ساقتالۋى تۇرعىسىنان تەكسەرىلەتىن بولادى.

Abai.kz