ترامپتىڭ سايلاۋ تۋرالى ريتوريكالارىنان سوڭ الەمدىك ساراپشىلار: «ۋكراينانى زەلەنسكيدەن سوڭ كىم باسقارۋى مۇمكىن» دەگەن سۇراققا جاۋاپ ىزدەي باستادى.

بولجالدى ۇمىتكەرلەر دە بەلگىلى. ولاردىڭ بارلىعى دەرلىك الا-بوتەن ادامدار ەمەس. ۋكراينا ءۇشىن ايانباي ەڭبەك ەتكەن، ۋكراينا قوعامىندا ابىروي-بەدەلى بار تۇلعالار. «Newsweek» ساراپشىلارى زەلەنسكيدىڭ ورنىن باسۋى مۇمكىن نەمەسە وعان باسەكەلەس بولۋى مۇمكىن 4 باستى تۇلعانى اتاپ جازىپتى. ولار:

بولجالدى ۇمىتكەر – ۆالەري زالۋجنىي

زالۋجنىي ەڭ ىقيمال تۇلعالاردىڭ كوشىن باستاپ تۇر. ۋكراينانىڭ بۇرىنعى باس قولباسشىسى (2021-2024 جىلدار ارالىعى). رەسەي باسقىنشىلىعى باستالعان ساتتەن باستاپ جاۋمەن تابانداپ كۇرەسكەن، كيەۆ تۇبىنە جەتكەن باسقىنشىلاردىڭ بەتىن قايتارعان ادام. ۋكراينانىڭ «ۇلت باتىرى». قازىر ۋكراينانىڭ ۇلىبريتانياداعى ەلشىسى قىزمەتىندە ءجۇر.

ءارتۇرلى رەيتينگتەردە قازىرگى پرەزيدەنت زەلەنسكيگە باستى وپپونەنت رەتىندە ءدال وسى زالۋجنىي اتالىپ ءجۇر. دەسە دە، رەيتينگتەگى ليدەر زەلەنسكي بولىپ قالۋدا. ال بولجالدى ۇمىتكەرلەردىڭ ىشىندە زالۋجنىيدىڭ كورسەتكىشتەرى زەلەنسكيگە جەتەقابىل.

زالۋجنىي دا رەسەي ءۇشىن قولايلى تۇلعا دەي المايمىز. ءوزى دە اسكەردى تىزگىندەپ تۇرعاندا: «رەسەي – ۋكراينانىڭ باستى جاۋى. ال جاۋمەن ەڭ اياعىنا دەيىن سوعىسىپ قانا جەڭۋگە بولادى»، - دەپ ايتقان. دە-فاكتو – زالۋجنىيدى رەسەيدىڭ اسكەري-ساياسي بيلىگى «جاۋ» دەپ سانايدى.

بولجالدى ۇمىتكەر – كيريلل بۋدانوۆ

ونان سوڭ رەيتينگتە تۇرعان ادام – كيريلل بۋدانوۆ. قازىر بۋدانوۆ ۋكراينا پرەزيدەنتى كەڭسەسىنىڭ باستىعى. بۇعان دەيىن سىرتقى بارلاۋدى باسقارعان. رەسپوندەنتتەردىڭ 53 پايىزعا جۋىعى بۋدانوۆقا سەنەتىندىكتەرىن ايتقان. دەسە دە، سالىستىرمالى تۇردە بۋدانوۆتىڭ مۇمكىندىگى زەلەنسكي مەن زالۋجنىيدان اجەپتاۋىر تومەن.

بۋدانوۆ تا قاراجاياۋ ادام ەمەس. رەسەيگە قارسى تەڭدەسسىز اسكەري وپەراتسيالاردى ۇيىمداستىرعان. ۇيىمداستىرىپ قانا قويماي، سول وپەراتسيالارعا ءوزى تىكەلەي قاتىسقان. سولاردىڭ ءبىرسىپىراسى:

«قىرىمعا جاسالعان جورىقتارعا» ءوزى قاتىسقان. وككۋپاتسياداعى قىرىمدا ورنالاسقان جاۋدىڭ «س-400» سەكىلدى جويقىن قارۋلارىن تالقانداپ، قىرىم كوپىرىن سوققىلاپ، ديۆەرسيالىق شابۋىلدار جاساعان. «قارا تەڭىز وپەراتسياسى» كەزىندە تەڭىز دروندارى ارقىلى رەسەيدىڭ قارا تەڭىز فلوتىنا شابۋىلداعان. رەسەيدىڭ تىلىنا دروندارمەن شابۋىلداپ، «تۋ-22م3» نەمەنە «درلو ا-50» سەكىلدى رەسەيدىڭ قىمبات ءارى جويقىن تەحنيكالارىن ورتەگەن. رەسەيگە قارسى ونداعان جويقىن وپەراتسيانى جوسپارلاپ، ازىرلەپ، ىسكە اسىرعان بۋدانوۆتى كرەملدەگىلەر زەلەنسكي مەن زالۋجنىيدان دا قاتتى جەك كورەتىنىن جاسىرمايدى.

بولجالدى ۇمىتكەر – ميحايل فەدوروۆ

ۋكراينانىڭ بۇرىنعى قورعانىس ءمينيسترى. الدىڭعى ۇشتىكپەن سالىستىرعاندا فەدوروۆتى قولداۋشىلار سانى ازداۋ. دەگەنمەن، ۋكراينا پرەزيدەنتتىگىنە ۇمىتكەرلەردىڭ ءبىرى سانالادى.

فەدوروۆ – «درون سوعىسىنىڭ ارحۋتەكتۋرى» سانالادى. ۋكراينا ارمياسىن جاپپاي روبوتتاندىرۋعا ءباس قويعان دا، «درون ارمياسىن» جاساقتاعان دا ءدال وسى ميحايل فەدوروۆ. ول باستاپ، قولعا العان درون اسكەرى – قازىر ۋكراينانىڭ باستى كوزىرلەرىنىڭ بىرىنە اينالىپ وتىر. سول ءۇشىن دە كرەمل كيەۆتىڭ باس كەڭسەسىنەن كورگىسى كەلمەيتىن، كرەمل ءۇشىن قولايسىز ادامداردىڭ ءبىرى – وسى ميحايل فەدوروۆ.

بولجالدى ۇمىتكەرى – پەتر پوروشەنكو

پەتر پوروشەنكو ۋكراينانىڭ بۇرىنعى پرەزيدەنتى. زەلەنسكيگە دەيىن ەلدى وسى پوروشەنكو باسقارعان. زەلەنسكيمەن سايلاۋعا ءتۇسىپ، ەكى تۋردا ايقاسقان. اقىرى زەلەنسكي جەڭىپ، پوروشەنكو جوعارعى رادا دەپۋتاتى اتانعان.

سوعىس باستالعالى-بەرى پوروشەنكو اسكەردى ءبىر كىسىدەي-اق قولداپ كەلەدى. ارنايى قور قۇرىپ، اسكەرگە قاجەتتى كەرەك-جاراقتار مەن تەحنيكالار جەتكىزىپ بەرۋدە. ءتۇرلى تيپتەگى دروندار، راديوەلەكتروندى كۇرەس قۇرالدارى مەن بارلاۋعا كەرەك تەحنيكالار، جۇك كولىكتەرى، بروندى تەحنيكالار ت.ب. ساتىپ الىپ، ارمياعا بەرۋدە. بۇدان بولەك، ۋكراينا قالالارىن جىلىتقىش گەنەراتورلارمەن جابدىقتاۋدا.

پەتر پوروشەنكو دا قاتاڭ انتيرەسەيلىك پوزيتسياداعى ادام. ول پرەزيدەنت بولىپ تۇرعان كەزدە دە، جوعارعى رادا دەپۋتاتى بولعان كەزدە دە رەسەيگە ساياسي-ەكونوميكالىق قىسىمدى ارتتىرۋدى تابانداپ تۇرىپ تالاپ ەتكەن.

پوروشەنكو «ەۋروينتەگراتسيا» جولىن ۇستانۋشى. رەسەيمەن ۋكريانا اراسىنداعى اسكەري بايلانىستاردى العاش بولىپ ۇزگەن دە، ۋكراينا-رەسەي اراسىنداعى ارىپتەستىك شارتىن توقتاتقان دا، ۋكراينا شىركەۋىن ماسكەۋ پاتريارحاتىنان ءبولىپ العان دا، ۋكرايناداعى باق-تا العاش بولىپ ورىس تىلىنە شەكتەۋ ەنگىزگەن دە وسى پوروشەنكو ەدى.

وسىلاردى ەسكەرە وتىرىپ، الەمدىك ساراپشىلار: «ۋكراينادا زەلەنسكيدەن كەيىن كىم پرەزيدەنت بولسا دا، ۋكراينا ەندى رەسەيگە قايتا باس يمەيدى»، - دەگەن قورىتىندىنى ايتادى.

نۇرگەلدى ابدىعانيۇلى

Abai.kz