جەتىسۋ وبلىس قۇرىلعاننان بەرى ءبىلىم بەرۋ نىساندارىنىڭ 41,8% جاڭعىرتىلدى. بيىل 5 جاڭا مەكتەپ پايدالانۋعا بەرىلىپ، 2 ءبىلىم وشاعى كۇردەلى جوندەۋدەن ءوتتى.

سولاردىڭ ءبىرى - دارىندى بالالارعا ارنالعان «ءبىلىم-يننوۆاتسيا» مامانداندىرىلعان ليتسەي-ينتەرناتىنىڭ 300 ورىندى زاماناۋي جاڭا وقۋ عيماراتى رەسپۋبليكا كۇنى قارساڭىندا پايدالانۋعا بەرىلدى. تالدىقورعان قالاسىندا ورنالاسقان بۇل ءبىلىم ورداسىنىڭ اشىلۋ سالتاناتىنا وبلىس اكىمى بەيبىت يساباەۆ، ارداگەر ۇستازدار، مەكتەپ ۇجىمى، وقۋشىلار مەن اتا-انالار قاتىستى.

ءوڭىر باسشىسى كوپشىلىكتى ايتۋلى جاڭالىقپەن قۇتتىقتادى:

-  سوڭعى ءۇش جىلدا جەتىسۋلىق وقۋشىلار حالىقارالىق وليمپيادالار مەن زياتكەرلىك كونكۋرستاردا 73 مەدال يەلەندى. اتالعان ماراپاتتاردىڭ 27-ءسى، ياعني 40% تىكەلەي وسى ليتسەي شاكىرتتەرىنە تيەcىلى. بۇل ايتۋلى كورسەتكىش – ليتسەيدە قالىپتاسقان ساپالى ءبىلىم بەرۋ ءداستۇرى مەن ۇستازداردىڭ كاسىبي ەڭبەگىنىڭ ايقىن كورىنىسى. بۇگىنگى وقۋشى – ەرتەڭگى ەل تىرەگى. سوندىقتان ءبىز جاستاردىڭ تەرەڭ ءبىلىم الۋىنا، جەكە تۇلعا رەتىندە جان-جاقتى دامۋىنا قاجەتتى جاعداي جاساۋدى جالعاستىرامىز، - دەدى ب.يساباەۆ.

مەكتەپتىڭ لەنتاسى قيىلىپ، جينالعان كوپشىلىك عيماراتتىڭ ىشكى مۇمكىندىكتەرىمەن تانىستى. وبلىس باسشىسى گەوگرافيا، تاريح، قازاق ءتىلى، روبوتتەحنيكا كابينەتتەرىن ارالاپ كوردى. سول سياقتى فوەدە قويىلعان ليتسەي وقۋشىلارى جەتىستىكتەرىنىڭ كورمەسىمەن تانىستى. وسى جەردە حالىقارالىق ءپان وليمپيادالارىنىڭ جەڭىمپازدارىمەن تىلدەستى. «مەملەكەت باسشىسى پاراساتتى، وقيتىن، ىزدەنىمپاز، تەحنولوگيانى، جاساندى ينتەللەكتتى مەڭگەرگەن، زەردەلى ۇرپاق قالىپتاستىرۋعا بارلىق جاعداي جاساۋ تۋرالى مىندەت قويىپ وتىر. سوعان ساي ەل كولەمىندە، سونىڭ ىشىندە وبلىستا دا ۇلكەن جوبالار ىسكە اسىرىلىپ جاتىر. سىزدەر دە وسى ۇردىستەن قالماي، رەسپۋبليكاداعى ەڭ بەدەلدى، ءوزىنىڭ تاريحى بار مەكتەپ ليتسەيىندە جاقسى وقىپ، ۇلكەن جەتىستىكتەرگە جەتە بەرىڭدەر، ۇلكەن ازامات بولىپ وسىڭدەر»، - دەدى وبلىس باسشىسى.

وسى كۇنى ليتسەي وقۋشىلارىنا «كىتاپ وقيتىن ۇلت» جوباسىنا ەنگىزىلگەن كىتاپتار تىزىمىندەگى 60 جيناق سىيعا تارتىلدى.

مەكتەپ ديرەكتورى ايبەك اشيرمەتوۆتىڭ ايتۋىنشا، «تالدىقورعان دارىندى بالالارعا ارنالعان «ءبىلىم-يننوۆاتسيا» مامانداندىرىلعان مەكتەپ-ليتسەيى 1993 جىلى قۇرىلعان.

- وسى ۋاقىتتان بەرى ءبىلىم مەكەمەسىن 1,5 مىڭعا جۋىق تۇلەك ءبىتىرىپ شىقتى. وتكەن جىلى بىتىرگەن 48 وقۋشىنىڭ ءبارى جوعارى وقۋ ورىندارىنا وقۋعا ءتۇستىن. مۇندا وقىتۋ قازاق، ورىس، اعىلشىن، تۇرىك تىلدەرىندە جۇرەدى. بۇگىنگى اشىلىپ وتىرعان جاڭا عيماراتتا 37 كابينەت بار، سونىڭ ىشىندە لينگۆيستيكالىق كابينەت جانە زەرتحانالار جابدىقتالعان. بۇل وقۋشىلاردىڭ جەتىستىكتەرىن ەسەلەي تۇسۋگە ۇلكەن ىقپال ەتەدى، - دەيدى ا.اشيرمەتوۆ.

مەكتەپتە 100-دەن استام ادام جۇمىس ىستەسە، سونىڭ 37-ءسى – پەداگوگ. سولاردىڭ ءبىرى جاس مامان ميراس مەدەتۇلى ەلەۋلى قۋانىشقا وراي پىكىر ءبىلدىردى:

- مەن وسى ءبىلىم مەكەمەسىنە بيىلعى وقۋ جىلىندا جاس مامان بولىپ كەلىپ وتىرمىن. بيولوگيا پانىنەن ساباق بەرەمىن. بۇل مەكتەپتە جاراتالىستانۋ پاندەرى اعىلشىن تىلىندە وتەدى، سوندىقتان بيولوگيا ءپانى دە اعىلشىن تىلىندە جۇرەدى. ءوزىم وسكەمەن قالاسىنداعى «ءبىلىم-يننوۆاتسيا» مەكتەپ-ليتسەيىن ءبىتىردىم، كەيىن ءى. جانسۇگىروۆ اتىنداعى جەتىسۋ ۋنيۆەرسيتەتىندە وقىدىم. العاشقى ەڭبەك جولىمدى وسى ليتسەيدەن باستاپ جاتقانىما قۋانىشتىمىن، - دەدى ول.

جاڭا وقۋ عيماراتىنىڭ اشىلعانىنا اتا-انالار دا ريزا.

- بۇگىن ءبىز ءۇشىن ەرەكشە كۇن. «ءبىلىم-يننوۆاتسيا» مەكتەبىنىڭ جاڭا عيماراتى اشىلدى. مەنىڭ ۇلىم جايدار ەسكەندىر  باستاۋىشتا قالاداعى اباي اتىنداعى №1 مەكتەپتە، 5-6 سىنىپتاردى № 20 ليتسەيدە وقىدى، سول العان ساپالى ءبىلىمىنىڭ ارقاسىندا  7 سىنىپتا وسى مەكتەپكە قابىلداندى. قازىر 11 سىنىپتا، بۇل وتە جاۋاپتى كەزەڭ. وسى جىلدا جاڭا وقۋ كورپۋسى قولدانىسقا بەرىلگەنىنە قۋانىشتىمىن. ءىشىن ارالاپ كوردىك ادەمى، جايلى، كەڭ، ۇلكەن عيمارات. جاڭا كورپۋستىڭ قۇرىلىسىنا اتسالىسقان بارشا ازاماتتارعا اتا-انالار اتىنان العىس ايتامىز، - دەدى شىنار احماديەۆا.

اتاپ وتسەك، مەكتەپ-ليتسەيدە 266 وقۋشى وقيدى. سونىڭ ءبىرى - ادىلەت بەكمولدا.

- مەن 7 سىنىپتان بەرى وسى مەكتەپتە وقيمىن. الدىڭعى جىلى ليتسەي پرەزيدەنتى بولدىم. ليتسەي ومىرىنە بەلسەنە قاتىسامىن. رەسپۋبليكالىق وليمپيادالار مەن عىلىم جوبالار بايقاۋىنىڭ ءۇش مارتە جۇلدەگەرىمىن. بۇگىن ليتسەي تاريحىنىڭ جاڭا بەلەسى باستالدى دەپ بىلەمىز. وتىز جىلدان استام ۋاقىتتا قالىپتاسقان ءبىلىم مەن تاربيە قۇندىلىقتارى جاڭا عيماراتتا جالعاسىن تابادى. مەنىڭ ويىمشا، بىزدەن كەيىنگى ءوسىپ كەلە جاتقان ىنىلەرىمىز ءۇشىن بۇل عيمارات كەرەمەت مۇمكىندىكتەر بەرەدى. بولاشاقتا وسى جەردەن العان ءبىلىمىمدى ەلدىڭ يگىلىگىنە ارنايمىن دەپ ويلايمىن، - دەيدى  ادىلەت بەكمولدا.

ەسكە سالساق، بۇل «ءبىلىم-يننوۆاتسيا» مامانداندىرىلعان ليتسەي-ينتەرناتىنىڭ وقۋ عيماراتىنىڭ قۇرىلىسى 2025 جىلى مامىردا باستالعان بولاتىن.

Abai.kz