ۇلتتىق قاۋىپسىزدىك كوميتەتىنىڭ (ۇقك) ءباسپاسوز قىزمەتى حابارلاعانداي، 30 قازاندا اتىراۋدا ەكسترەميستىك توپ قۇرۋ جانە ونىڭ قىزمەتىنە قاتىسۋ، تەرروريزمدى ناسيحاتتاۋ جانە ءدىني ارازدىقتى قوزدىرۋ كۇدىگىمەن 10 ادام ۇستالدى.

«2026 جىلعى 30 قازاندا ۇقك پروكۋراتۋرا ورگاندارىنىڭ ۇيلەستىرۋىمەن اتىراۋ قالاسىندا سوتقا دەيىنگى تەرگەپ-تەكسەرۋ شەڭبەرىندە ءبىر مەزگىلدە 10 ادامدى ۇستادى. ولار ەكسترەميستىك توپتى قۇردى، وعان باسشىلىق ەتتى جانە قىزمەتىنە قاتىستى، سونداي-اق تەرروريزمدى ناسيحاتتادى جانە ءدىني ارازدىقتى قوزدىردى دەگەن كۇدىككە ءىلىندى»، — دەلىنگەن حابارلامادا.

تەرگەۋ مالىمەتتەرى بويىنشا، توپ قاتىسۋشىلارى قازاقستاننىڭ باتىس وڭىرىندە كونستيتۋتسيالىق قۇرىلىس نەگىزدەرىن كۇشپەن وزگەرتۋدى كوزدەگەن.

كۇدىكتىلەردىڭ تۇرعىلىقتى جەرلەرىن ءتىنتۋ بارىسىندا اتىس قارۋى، ەسىرتكى زاتتارى، ءدىني اتريبۋتيكا، ادەبيەتتەر جانە باسقا دا زاتتاي دالەلدەمەلەر تابىلىپ، تاركىلەندى.

بۇدان بولەك، توپ قاتىسۋشىلارى بالالار مەن جاسوسپىرىمدەردى وقىتۋ ءۇشىن قۇرعان 3 استىرتىن وقۋ ورتالىعىنىڭ قىزمەتى توقتاتىلدى.

ناقتىلانعانداي، كەيبىر فيگۋرانتتار بۇعان دەيىن تەرروريستىك جانە جالپى قىلمىستىق قۇقىق بۇزۋشىلىقتار ءۇشىن قىلمىستىق جاۋاپكەرشىلىككە تارتىلعان.

قر قىلمىستىق-پروتسەستىك كودەكسىنىڭ 201-بابىنا سايكەس باسقا مالىمەتتەر جاريا ەتۋگە جاتپايدى.

Abai.kz