قازاقستاندا ءماسليحات دەپۋتاتتارىنىڭ كەزەكتەن تىس سايلاۋىن وتكىزۋگە 35,8 ملرد تەڭگە بولىنەدى. قاراجاتتىڭ باسىم بولىگى سايلاۋ كوميسسيالارى مۇشەلەرىنىڭ ەڭبەكاقىسىن تولەۋگە جۇمسالادى.

سايلاۋعا ارنالعان شىعىن كولەمى قارجى جانە ۇلتتىق ەكونوميكا مينيسترلىكتەرىمەن كەلىسىلگەن. بۇل تۋرالى بريفينگتە ورتالىق سايلاۋ كوميسسياسىنىڭ مۇشەسى ميحايل بورتنيك مالىمدەدى.

ونىڭ ايتۋىنشا، الداعى ناۋقان اۋقىمى جاعىنان قۇرىلتاي سايلاۋىمەن سالىستىرۋعا كەلەدى.

ءماسليحات سايلاۋىنا قوسىمشا 3 022 وكرۋگتىك كوميسسيا تارتىلىپ، ولاردىڭ قۇرامىندا 15 110 ادام جۇمىس ىستەيدى. بيۋدجەتتىڭ شامامەن 70%-ى، ياعني 25 ملرد تەڭگەگە جۋىق قاراجات ۋچاسكەلىك سايلاۋ كوميسسيالارى مۇشەلەرىنىڭ ەڭبەكاقىسىن تولەۋگە باعىتتالادى.

قاراجاتتىڭ ءبىر بولىگى كانديداتتارعا دا قاراستىرىلعان. ولار مەملەكەتتىك قارجىنى بۇقارالىق اقپارات قۇرالدارىندا وزدەرىنىڭ سايلاۋالدى باعدارلامالارىن جاريالاۋعا جۇمساي الادى.

تولەم مولشەرى كانديداتتىڭ قاي ماسليحاتقا تۇسەتىنىنە بايلانىستى:

• وبلىستىق ءماسليحات كانديداتتارىنا – 700 مىڭ تەڭگەدەن;
• استانا جانە وبلىستىق ماڭىزى بار قالالار ءماسليحاتىنا كانديداتتارعا – 650 مىڭ تەڭگەدەن;
• اۋداندىق ءماسليحات كانديداتتارىنا – 500 مىڭ تەڭگەدەن.

2023 جىلعى سايلاۋمەن سالىستىرعاندا بۇل سومالار وسكەن. ول كەزدە تولەم مولشەرى شامامەن ءبىر جارىم ەسە از بولعان.

– ايىرماشىلىقتىڭ ەداۋىر ەكەنىن كورىپ وتىرسىزدار. بۇل ەكونوميكادا بولعان وزگەرىستەردى بارىنشا ەسكەرەدى، – دەپ ءتۇسىندىردى بورتنيك.

مەملەكەتتىك قولداۋدان بولەك، كانديداتتار سايلاۋ ناۋقانىنا ارنالعان قاراجاتتى سايلاۋ قورلارى ارقىلى جيناي الادى. پارتيالار ءۇشىن شەكتى سوما – 255 ملن تەڭگە، وبلىستىق ءماسليحات كانديداتتارى ءۇشىن – 25,5 ملن تەڭگە، ال قالالىق جانە اۋداندىق ءماسليحات كانديداتتارى ءۇشىن شامامەن 12,7 ملن تەڭگە.

ماسليحاتتارداعى دەپۋتاتتىق ورىندارعا 10 971 كانديدات ۇمىتكەر بولىپ وتىر. ولاردىڭ 1 219-ى 99 پارتيالىق تىزىمگە ەنگىزىلگەن. تاعى 9 752 كانديدات 3 113 ءبىرمانداتتى وكرۋگ بويىنشا تىركەلگەن. ورتا ەسەپپەن ءبىر دەپۋتاتتىق مانداتقا ءۇش كانديداتتان كەلەدى.

سايلاۋالدى ۇگىت 1 قاراشا كۇنى كەشكە باستالىپ، 28 قاراشادا ءتۇن ورتاسىندا اياقتالادى. داۋىس بەرۋ قارساڭىندا جانە سايلاۋ كۇنى ۇگىت جۇرگىزۋگە تىيىم سالىنادى. سونداي-اق داۋىس بەرۋگە بەس كۇن قالعاندا سايلاۋ ناتيجەلەرىنە قاتىستى ساۋالنامالار مەن بولجامداردى جاريالاۋعا بولمايدى.

ءماسليحات سايلاۋى 29 قاراشادا وتەدى.

دەرەككوزى: qaz.ulysmedia.kz

Abai.kz