Almaty SuperSki كلاستەرىنىڭ قۇرىلىسى قارقىندى ءجۇرىپ جاتىر
قازاقستان پرەمەر-ءمينيسترى ولجاس بەكتەنوۆ Kazakh Tourism Development Ltd. كومپانياسى ديرەكتورلار كەڭەسىنىڭ وتىرىسىن وتكىزدى.
جيىندا Almaty SuperSki جوباسىن جۇزەگە اسىرۋ بارىسى قارالدى. Kazakh Tourism Development Ltd. باس اتقارۋشى ديرەكتورى ەرجان ەركىنباەۆ قۇرىلىس الاڭىنداعى جۇمىستار بەلسەندى كەزەڭگە وتكەنىن جانە بەكىتىلگەن كەستەگە سايكەس جۇرگىزىلىپ جاتقانىن باياندادى.
بۇگىنگى تاڭدا Pوما فرانتسۋز كومپانياسىمەن بىرلەسىپ، اسپالى جولداردىڭ ىرگەتاسىن قۇيۋ جۇمىستارى باستالدى. سونىمەن قاتار Almaty SuperSki جوباسىنىڭ جەكە تەحنيكالىق تالاپتارىن ەسكەرە وتىرىپ، اسپالى جولداردىڭ جابدىقتارىن دايىنداۋ جۇمىستارى قاتار جۇرگىزىلۋدە. جوبانى جۇزەگە اسىرۋعا وتاندىق كومپانيالار تارتىلۋدا. اتاپ ايتقاندا، Almaty SuperSki جوباسى اياسىندا 11 اسپالى جول سالاتىن POMA كومپانياسى الەۋەتتى جەرگىلىكتى وندىرۋشىلەرگە باعالاۋ جۇرگىزدى. تالداۋ قورىتىندىسى بويىنشا اسپالى جولداردىڭ جەكەلەگەن قۇرىلىمدىق ەلەمەنتتەرىن ەۋروپالىق ساپا جانە قاۋىپسىزدىك ستاندارتتارىنا سايكەس ءوندىرۋ ءۇشىن قازاقستاندىق كاسىپورىن ىرىكتەلدى. بۇل ءتاسىل وتاندىق ونەركاسىپتە تەحنولوگيالاردىڭ قاجەتتى ترانسفەرتىن قامتاماسىز ەتىپ، جاڭا قۇزىرەتتەر قالىپتاستىرۋعا مۇمكىندىك بەرەدى.
ديرەكتورلار كەڭەسى قىزمەت كورسەتۋ بويىنشا جاريالانعان اشىق كونكۋرستىڭ ناتيجەلەرىن تىڭداپ، تەحنولوگيالىق جانە ەكونوميكالىق كورسەتكىشتەردىڭ كەڭ اۋقىمىن سارالادى. ماسەلەن، Foster+Partners بيۋروسى ازىرلەگەن ارحيتەكتۋرالىق تۇجىرىمدامانى جۇزەگە اسىرۋعا تارتۋ ءۇشىن يندۋسترياداعى الەمدىك كوشباسشى سانالاتىن كەلەسىدەي كومپانيالار تاڭدالىپ الىندى: شۆەيتساريالىق Blumer-Lehmann كومپانياسى جوبانىڭ بازالىق جانە جوعارعى ستانسالارى عيماراتتارىنىڭ اعاش تىرەك كونسترۋكتسيالارىن جوبالاۋدى، دايىنداۋدى، جەتكىزۋدى، مونتاجداۋدى تەحنيكالىق سۇيەمەلدەۋدى جۇزەگە اسىرادى.
دانيالىق Bjarke Ingels Group كومپانياسى 24 حالىقارالىق كومپانيانىڭ اراسىندا وتكەن بايقاۋ قورىتىندىسى بويىنشا تاۋداعى اۋىل تۇجىرىمداماسىن ازىرلەۋمەن اينالىساتىن بولدى. بيۋرونىڭ ۇسىنىستارىنىڭ ىشىندەگى باستى ارتىقشىلىقتارىنىڭ ءبىرى – Almaty SuperSki جوباسى بويىنشا جۇمىسقا تاۋ شاڭعىسى ماستەر-جوسپارلارى مەن كۋرورتتاردىڭ ۇزدىك جوبالاۋشىلارىنىڭ ءبىرى سانالاتىن، 46 ەلدە 1 مىڭنان استام جوبانى جۇزەگە اسىرعان جانە تۋريستىك ينفراقۇرىلىمدى تاۋ شاڭعىسى كەشەندەرىنە كەدەرگىسىز لوگيستيكا مەن ski-in/ski-out تۇجىرىمداماسىن قۇرا وتىرىپ ينتەگراتسيالاۋ تاجىريبەسى بار كانادالىق Ecosign كومپانياسىن قوسۋ. سونداي-اق Bjarke Ingels Group بريتاندىق ساۋلەتشىلەر كومپانياسىمەن تىعىز جۇمىس جۇرگىزىلۋدە، ولاردىڭ پورتفوليوسىندا فينلياندياداعى كۋرورتتىق اۋىل، شۆەيتساريا تاۋلارىنداعى كەشەن، دانياداعى توبەسىندە شاڭعى تراسساسى بار عيمارات سياقتى بىرەگەي جوبالار بار.
وتىرىس قورىتىندىسى بويىنشا پرەمەر-مينيستر جوبا ۇزدىك الەمدىك ستاندارتتار بويىنشا جۇزەگە اسىرىلىپ جاتقانىن جانە ءتۋريزمنىڭ دامۋىنا ەلەۋلى سەرپىن بەرەتىنىن اتاپ ءوتتى. قۇرىلىس جۇمىستارىنىڭ قارقىنىن جەدەلدەتۋ جانە كۋرورتتىڭ 2028 جىلدىڭ جەلتوقسانىندا ىسكە قوسىلۋىن قامتاماسىز ەتۋ تاپسىرىلدى. ديرەكتورلار كەڭەسىنىڭ كەلەسى وتىرىسى ەكى اپتادان كەيىن وتەدى، وندا تاۋ شاڭعىسى كۋرورتى قۇرىلىسىنىڭ بارىسى تۋرالى جاۋاپتى تۇلعالاردىڭ ەسەپتەرى تىڭدالادى.
Abai.kz