بەيسەنبى, 19 قاراشا 2026
107 0 پىكىر 18 قاراشا, 2026 ساعات 23:33

«تازا قازاقستان»: كەلەسى جىلى تالدىقورعانداعى ورتالىق ساياباق جاڭعىرتىلادى

سۋرەت: gov.kz سايتىنان الىندى

«تازا قازاقستان» جالپىۇلتتىق باعدارلاماسى اياسىندا جەتىسۋ وبلىسىندا ساياباقتار مەن سكۆەرلەردى اباتتاندىرۋ جانە جاڭعىرتۋ جۇمىستارى جۇيەلى تۇردە جۇرگىزىلۋدە. بۇل رەتتە جاسىل جەلەكتەردى ساپالى كۇتىپ-باپتاۋ ءۇشىن اۆتوماتتى سۋارۋ جۇيەلەرىن ورناتۋعا ەرەكشە كوڭىل بولىنەدى. اتاپ ايتقاندا، وبلىس قۇرىلعاننان بەرى اۋدان ورتالىقتارىنداعى جاسىل ايماقتار كەزەڭ-كەزەڭىمەن اباتتاندىرىلىپ كەلەدى. ال كەلەسى جىلى تالدىقورعان قالاسىنداعى ورتالىق ساياباقتا كۇردەلى جوندەۋ جۇمىستارى جۇرگىزىلەدى. بۇل تۋرالى وبلىس اكىمى بەيبىت يساباەۆتىڭ وبلىس ورتالىعىنداعى قۇرىلىس نىساندارىن ارالاۋى بارىسىندا بەلگىلى بولدى.

بيىل تالدىقورعان قالاسىنداعى ءۇش ساياباقتا: «جاستار» ساياباعىندا، ارداگەرلەر ساياباعىندا جانە قاراتال وزەنىنىڭ جاعالاۋىندا اۆتوماتتى سۋارۋ جۇيەسى ورناتىلدى. وبلىس اكىمى جۇمىس ساپارى بارىسىندا ارداگەرلەر ساياباعىندا اتقارىلعان جۇمىستاردىڭ بارىسىمەن تانىستى.

مەردىگەر ۇيىم وكىلىنىڭ ايتۋىنشا، اۆتوماتتى سۋارۋ جەلىلەرىنىڭ جالپى ۇزىندىعى 6,8 كم. سونىمەن قاتار كوگالداندىرۋ جۇمىستارى جۇرگىزىلىپ، 200-گە جۋىق قىلقان جاپىراقتى جانە جاپىراقتى اعاش وتىرعىزىلعان.

جالپى، بيىل تالدىقورعان قالاسىندا 13 مىڭ اعاش وتىرعىزۋ جوسپارلانسا، بۇگىنگى تاڭدا ونىڭ 12 400-ءى ەگىلدى. قالعان 600 اعاش قاراشا ايىنىڭ سوڭىنا دەيىن وتىرعىزىلادى.

- مەملەكەت باسشىسىنىڭ باستاماسىمەن قولعا الىنعان «تازا قازاقستان» جالپىۇلتتىق باعدارلاماسى اياسىندا جەتىسۋ وبلىسىندا بارلىق دەرلىك اۋدان ورتالىقتارىندا زاماناۋي ساياباقتار كەزەڭ-كەزەڭىمەن سالىنىپ، قولدانىستاعى جاسىل ايماقتار جاڭعىرتىلۋدا. ساياباقتارداعى جاسىل جەلەكتەردى كۇتىپ-باپتاپ، ۋاقىتىلى سۋارۋ قاجەت بولعاندىقتان، اۆتوماتتى سۋارۋ جۇيەلەرى دە ەنگىزىلۋدە. سونىمەن قاتار كەلەسى جىلى تالدىقورعان قالاسىنداعى ورتالىق ساياباقتا كۇردەلى جاڭعىرتۋ جۇمىستارى جۇرگىزىلەدى. سونىڭ ناتيجەسىندە مۇلدەم جاڭا ساياباق پايدا بولادى. قالانى كوگالداندىرۋ باعىتىندا دا اۋقىمدى جۇمىستار اتقارىلادى. اسىرەسە، قالاعا كىرەبەرىستەگى اركادان باستاپ اينالما جولعا دەيىنگى اۋماق اباتتاندىرىلادى. جولدىڭ وڭ جانە سول جاعىنا كوگال توسەلىپ، اعاشتار وتىرعىزىلادى، سۋارۋ جۇيەسى مەن جارىقتاندىرۋ ورناتىلادى. سونداي-اق ورىندىقتار، دەمالىس ورىندارى مەن سپورت الاڭدارى سالىنادى، - دەپ اتاپ ءوتتى وبلىس اكىمى بەيبىت يساباەۆ.

ارداگەرلەر ساياباعىن ارالاۋ قورىتىندىسى بويىنشا وبلىس اكىمى ورىندىقتاردى، كىرەبەرىستى رەتكە كەلتىرىپ، كوگالداندىرۋ جۇمىستارىن جالعاستىرۋدى تاپسىردى.

Abai.kz

0 پىكىر