جۇما, 20 قاراشا 2026
جاڭالىقتار 140 0 پىكىر 20 قاراشا, 2026 ساعات 20:37

جەتىسۋدا اۋىلدىق مادەنيەت ءۇيى ەسىگىن اشتى

سۋرەتتەردى تۇسىرگەن: جۇماباي مۇسابەكوۆ.

جەتىسۋ وبلىسىنىڭ تاعى ءبىر اۋىلىندا مادەني-سپورتتىق ورتالىق قولدانىسقا بەرىلدى.

ەسكەلدى اۋدانىنداعى باقتىباي اۋىلدىق مادەنيەت ءۇيىنىڭ كۇردەلى جوندەۋى وبلىس قۇرىلعانعا دەيىن باستالىپ، قۇرىلىسى ۇزاققا سوزىلعان پروبلەمالىق نىسانداردىڭ قاتارىندا بولاتىن. وبلىس باسشىلىعىنىڭ ءجىتى باقىلاۋىنان كەيىن قۇرىلىس قايتا جاندانىپ، «ساقالدى» قۇرىلىس اياقتالدى. وسىلايشا 7 مىڭعا جۋىق تۇرعىنى بار اۋىلدا جيىرما جىلدان استام ۋاقىتتان بەرى بەيىمدەلگەن عيماراتتا وتىرعان مادەنيەت ءۇيىنىڭ قىزمەتكەرلەرى جاڭا نىساندا جۇمىسقا كىرىستى.

اۋدان اكىمدىگىنىڭ مالىمەتىنشە، مادەنيەت ءۇيى مەن كىتاپحانا بۇعان دەيىن اۋىلدىق اكىمدىك عيماراتىنىڭ 1-قاباتىندا وتىرعان ەدى. بۇل ەلەۋلى قولايسىزدىقتار تۋعىزاتىن. سوندىقتان توزىعى جەتكەن ەسكى مادەنيەت ءۇيىنىڭ عيماراتىن جاڭعىرتۋ اۋىل تۇرعىندارى ءۇشىن دە، مادەنيەت سالاسى قىزمەتكەرلەرى ءۇشىن دە ايتۋلى جاڭالىق بولدى.

اتاپ وتسەك، جاڭارعان عيماراتتىڭ اۋدانى - 4500 شارشى مەتر. 340 ادامعا ارنالعان ۇلكەن كورەرمەن زالى بار. ىشىندە اۋىلدىق كىتاپحانا ورنالاسقان. ونداعى كىتاپ قورى – 20 مىڭنان استام.

بۇل ورتالىقتا ۇيىرمەلەر مەن سەكتسيالار جۇمىس ىستەيدى، بۇقارالىق-مادەني ءىس-شارالار، كونتسەرتتەر، كەزدەسۋلەر وتكىزىلەدى.

- مادەنيەت ءۇيى تولىققاندى جۇمىسىن باستادى. بۇگىندە مۇندا بالالاردىڭ دا، ەرەسەكتەردىڭ دە شىعارماشىلىقپەن اينالىسۋىنا بارلىق جاعداي جاسالعان. اركىم وزىنە ۇنايتىن ىسپەن شۇعىلدانا الادى. مۇندا «مەرەيلى اجەلەر» كلۋبى، ەسترادالىق ءان، دومبىرا، بي، قولونەر، ۆەلوسپورت، فۋتبول، كۇرەس سياقتى مادەني جانە سپورتتىق سەگىز ۇيىرمە بار. ءبىزدىڭ باستى مىندەتىمىز – بۇل مەكەمەنى اۋىلدىڭ ناعىز مادەني ءومىرىنىڭ ورتالىعىنا اينالدىرۋ. مۇندا ءار تۇرعىن ءوز تالانتىن شىڭداپ، جاڭا ءبىلىم الىپ، بوس ۋاقىتىن ءتيىمدى ءارى قىزىقتى وتكىزە الاتىنداي جاعداي تۋعىزۋ. ول ءۇشىن الداعى ۋاقىتتا جۇمىس باعىتتارىن كەڭەيتەمىز، جاڭا ۇيىرمەلەر اشىپ، تۇرعىنداردى بارىنشا كوپتەپ تارتامىز دەگەن جوسپارىمىز بار، – دەدى مادەنيەت ءۇيىنىڭ ديرەكتورى قانات وسپانوۆ.

بۇگىنگى كۇنى جاڭا نىساندا ءتۇرلى ۇيىرمەلەرگە كەلۋشىلەر قاتارى كوپ.  سونىڭ ىشىندە كۇرەس ۇيىرمەسىنە دەگەن قىزىعۋشىلىق تا ارتىپ كەلەدى. قازىر بۇل ۇيىرمەگە 180 بالا قاتىسۋدا.

- بۇل جاڭارعان عيماراتتا گرەك-ريم كۇرەسىنە ۇلكەن زال قولدانىسقا بەرىلدى. بۇعان دەيىن جاتتىعۋلاردى مەكتەپتىڭ سپورت زالىندا، دالادا وتكىزەتىنبىز، كوبىنە بۇل بىزگە قولايسىز بولاتىن. قازىرگى زال ىڭعايلى، كەڭ. بالالار ءۇش اۋىسىمدا جاتتىعادى. قاتارىمىزعا جاڭادان قوسىلعان جاسى كىشى بالالار تاڭەرتەڭنەن، ورتا بۋىن جاسوسپىرىمدەر تۇستەن كەيىن، ۇلكەندەر توبى كەشكە جاتتىعادى. قازىر وقۋشىلاردىڭ ىشىندە رەسپۋبليكالىق تۋرنيرلەردە توپ جارىپ جۇرگەندەر دە بار. الداعى ۋاقىتتا وسى كۇرەس زالىنان چەمپيوندار شىعادى دەپ سەنەمىز، - دەيدى جاتتىقتىرۋشى ادىلەت نۇعىمانوۆ.

مادەنيەت ءۇيىنىڭ اشىلعانىنا تۇرعىندار دا ءدان ريزا.

– ءبىز وسى كۇندى ۇزاق كۇتتىك. مۇندا بالالار ءتۇرلى ۇيىرمەلەرگە قاتىسىپ، ەرەسەكتەر مادەني ءىس-شارالار وتكىزىپ، كونتسەرت تاماشالايدى. جاڭارتىلعان عيمارات ءار بۋىن وكىلدەرى ىقىلاسپەن كەلەتىن ورتاق مادەني نىسانعا اينالدى، - دەيدى اۋىل تۇرعىنى قايرات مامراەۆ.

اتاپ وتسەك، باقتىباي اۋىلدىق مادەنيەت ءۇيىنىڭ عيماراتىنا كۇردەلى جوندەۋ جۇمىستارى 2020 جىلدىڭ مامىر ايىندا باستالىپ، 2021 جىلدىڭ ماۋسىمىندا اياقتاۋ جوسپارلانعان بولاتىن. الايدا مەردىگەر ۇيىمنىڭ جاۋاپسىزدىعىنان بەلگىلەنگەن مەرزىم بىرنەشە رەت كەيىنگە شەگەرىلىپ، وسىعان بايلانىستى مەردىگەرگە قاتىستى زاڭنامادا كوزدەلگەن شارالار قابىلدانعان جانە ءتيىستى سوت شەشىمى شىققان بولاتىن.

جەتىسۋ وبلىسى قۇرىلعاننان كەيىن پروبلەمالىق نىساننىڭ قۇرىلىسىن اياقتاۋ ماسەلەسى ءوڭىر باسشىلىعىنىڭ ەرەكشە باقىلاۋىنا الىنىپ، قۇرىلىس بارىسىندا جۇمىستىڭ ساپاسىنا ءجىتى نازار اۋدارىلدى. ءسويتىپ، عيماراتتىڭ جوندەۋى اياقتالىپ، بۇل نىسان اۋىلدىڭ مادەني ومىرىنە تىڭ سەرپىن بەرىپ وتىر.

جالپى، وبلىس قۇرىلعالى بەرى وڭىردەگى الەۋمەتتىك نىسانداردى جاڭعىرتۋ دەڭگەيى 55,8% جەتتى.

Abai.kz

0 پىكىر