ءباسپاسوز حابارلاماسى
الماتى قالاسى 25 مامىر 2009 جىل
الماتى قالاسى 25 مامىر 2009 جىل
اقپاراتتىق قوعامعا اياق باسقان سايىن، وركەنيەت يگىلىكتەرىنىڭ ومىرشەڭدىگى كوز الدىمىزدا ءوسىپ كەلەدى. اسىرەسە، ينتەرنەت عالامدىق ماڭىزعا يە بولىپ، از ۋاقىتتا پوستيندۋستريالدى ءداۋىردىڭ ايشىعىنا اينالدى. بۇل ۇردىستەن قازاقستان دا قالىس قالماۋعا تىرىسىپ كەلەدى. تەك وتكەن جىلى عانا جاھانتوردى پايدالانۋشى قازاقستاندىقتاردىڭ ءجۇز ادامعا شاققانداعى سانى 14 ابونەنتكە دەيىن ءوستى. 2008 جىلى ەلىمىزدىڭ تەلەكوممۋنيكاتسيالىق نارىعى 379 ملرد. تەڭگەنى قۇراپ، ءجىو-ءنىڭ 3 پايىزىن قۇرادى. مامانداردىڭ ەسەبىنە سەنسەك، ۇستىمىزدەگى 2009 جىلى ينتەرنەتتى پايدالانۋشىلاردىڭ سانى 800 مىڭ ادامعا دەيىن جەتۋى ىقتيمال.
الايدا، ستاتيستيكادا ىلگەرىلەۋ بولعانىمەن، جالپى العاندا قازنەتتىڭ جاھاندىق ىرعاققا كەش ىلەسكەنى جاسىرىن ەمەس. ءالى دە بولسا، ۇلتتىق-مەملەكەتتىك مۇددەمىزدى جاھانتوردا كورسەتۋ جاعىنان وسالمىز. اسىرەسە، ورىس، اعىلشىن تىلىندەگى اقپارات اعىنىنا ءتورىمىزدى بەرىپ، ءوزىمىزدىڭ بوساعاعا قاراي ىسىرىلعانىمىز جانىمىزعا باتادى. سوندىقتان دا، قازاقى اۋديتوريانىڭ جات ەكپىندەگى، جات رۋحتاعى ماتەريالدى تۇتىنۋدان باسقا امالى بولماي تۇر. ءالى دە بولسا قازاقتىلدى قاۋىمنىڭ اقپاراتتىق قاجەتىن قاناعاتتاندىراتىن ءارتاراپتى، تولىققاندى سايتتار مەن پورتالداردىڭ ازدىعى الاڭداتادى.
قازاقتىلدى ينتەرنەتتىڭ دامۋىنا قاتىستى ماسەلەلەردىڭ ءوزىن بىرنەشە توپقا بولۋگە بولادى. ولاردىڭ ءبىرازى ۋاقىت وتە تۇزەلەتىن، ساباسىنا تۇسەتىن بولسا، ەندى ءبىرازىن بۇگىنگى كۇننىڭ وزىندە تۇزەۋگە ابدەن بولادى.
بىرىنشىدەن، بۇل ماسەلەلەر مەملەكەت پەن قوعامنىڭ قازاق تىلىنە نەمقۇرايلى قاراۋىنان تۋىنداپ وتىر. كوپتەگەن مەملەكەتتىك ورگاندار مەن كومپانيالار وزدەرىنىڭ سايتتارىن جاساپ، ولاردى سان-الۋان اقپاراتتارمەن تولىقتىرىپ وتىر. الايدا، ولاردىڭ قازاقتىلدى بەتتەرى ەش سىن كوتەرمەيدى.
ەكىنشىدەن، قازاقتىلدى ءباسپاسوزدىڭ، قوعامدىق بىرلەستىكتەردىڭ، مادەني ۇيىمدارىنىڭ وسى سالاعا نەمقۇرايلى قاراۋىنان بولىپ وتىر. ءالى كۇنگە دەيىن كوپتەگەن قازاقتىلدى گازەتتەر مەن جۋرنالداردىڭ، ۇيىمداردىڭ سايتتارى جوقتىڭ قاسى. تۇراقتى جۇمىس ىستەپ تۇرعاندارىنىڭ ءوزى ساپالىق جاعىنان العاندا تۇتىنۋشىلاردىڭ كوڭىلىنەن شىقپاي وتىر.
ۇشىنشىدەن، قازاقتىلدى ينتەرنەتتىڭ دامۋى نەگىزىنەن ازداعان عانا ىنتالى توپتىڭ ءىس-ارەكەتىنە بايلانىستى بولدى. قازاقتىلدى ينتەرنەت ساياسات، ەكونوميكا، بيزنەس تۇرعىسىنان العاندا ءورىستىلدى ينتەرنەتكە قاجەتى شامالى قوسىمشا دەڭگەيدە قالىپ كەلەدى. قازاقتىلدى تۇتىنۋشىلار ۇنەمى شەت قالىپ، ساياسي ىقپالى، بەدەلى بار كۇش رەتىندە ەسەپكە الىنباۋدا.
وسىعان بايلانىستى، ءبىز، قازاقتىڭ ءبىر توپ جاس ساياساتكەرلەرى، جۋرناليستەرى، عالىمدارى مەن كاسىپكەرلەرى قازاقتىلدى ينتەرنەت-كەڭىستىگىن دامىتۋ تۇرعىسىندا بىرنەشە جاڭا باستامالاردى جاريالاۋدى ءجون كورىپ وتىرمىز.
ءبىزدىڭ ويىمىزشا، بۇگىنگى كۇنى قازاقتىلدى ينتەرنەت-پايدالانۋشىلاردىڭ (اسىرەسە جاستاردىڭ) سانى كۇن ساناپ ارتىپ كەلەدى. ولارعا الەمدىك ۇردىستەرگە ساي، باسەكەلەستىككە قابىلەتتى قازاقتىلدى ينتەرنەت-رەسۋرستار قاجەت دەپ سانايمىز.
بۇل ءۇشىن بىزدەر باسقا ۇيىمدارمەن بىرىگىپ، رەسپۋبليكالىق جانە ايماقتىق مەملەكەتتىك ورگانداردىڭ قازاقتىلدى سايتتارىنىڭ قوعامدىق رەيتينگىسىن جاساپ، ونى باسپاسوزگە، مەملەكەتتىك ورگاندار مەن قوعامدىق ۇيىمدارعا تاراتامىز. ءدال وسىنداي رەيتينگىلەر قازاقستاننىڭ ساياسي پارتيالارىنىڭ، قوعامدىق بىرلەستىكتەرىنىڭ، ءباسپاسوز قۇرالدارىنىڭ اراسىندا دا جۇرگىزىلەدى.
ءبىز الداعى ۋاقىتتا قازاقتىلدى ينتەرنەتتى دامىتۋ ماقساتىندا ورىسشا-قازاقشا ينتەرنەت تەرميندەردىڭ سوزدىگىن جاساۋعا كىرىسىپ، ينتەرنەتتىڭ بارىنشا مەملەكەتتىك تىلدە سويلەۋىنە ات سالىسامىز.
قازاقتىلدى ينتەرنەتتىڭ الەمدىك دارەجەدە دامىپ، باسەكەلەستىكە قابىلەتتى بولۋى حاقىندا ءار-ءتۇرلى قوعامدىق شارالار وتكىزىپ، مەملەكەتتىك وگاندار مەن قوعامدىق بىرلەستىكتەرگە ءوز ۇسىنىستارىمىزدى دايىنداپ، جەتكىزىپ تۇرامىز.
وسى ايتقاندلارىمىزدىڭ باسى رەتىندە بىزدەر كەڭ-بايتاق وتانىندا باسىم ۇلتقا اينالعان قازاق جۇرتشىلىعىنا ارناپ «اباي.كz» اقپاراتتىق پورتالىن اشىپ، ەلىنىڭ بۇگىنى مەن بولاشاعىن ويلاعان ازاماتتاردىڭ بارلىعىن وسى رەسۋرستىڭ اينالاسىنا بىرىگىپ، ەركىن وي مەن پاراساتتى پىكىر ايتۋعا شاقىرامىز.
اقپاراتتىق پورتالدىڭ باستى مىندەتتەرى بولىپ:
اقپارات نارىعىنداعى قازاق جۋرناليستيكاسىنىڭ ورىنىن انىقتاپ، قوعامدىق پىكىرگە ىقپالدىلىعىن ارتتىرۋ;
قازاقتىلدى جاڭا اقپارات قۇرالدارىنىڭ سانى مەن ساپاسىن ارتتىرۋعا قىزمەت ەتۋ;
قازاق جۋرناليستەرىن ورتاق ماقساتقا جۇمىلدىرىپ، ولاردىڭ بەيرەسمي كلۋبىن كۇرۋ;
قازاقتىلدى جۋرناليستيكانىڭ الدىڭعى قاتارلى، پاراساتى بيىك تالقىلار مەن ديسكۋرستە ءومىر ءسۇرىپ جاتقاندىعىن دالەلدەۋ;
ەلىمىزگە ەسىم-سويى بەلگىلى ۇزدىك رەسپۋبليكالىق جانە ايماقتىق جۋرناليستەردىڭ باسىن قوسىپ، ولاردىڭ ماقالالارىن جۇرت نازارىنا ۇسىنۋ، ناسيحاتتاۋ;
قازاقتىلدى ماتەريالداردىڭ ۇزدىگىن ورىس، اعىلشىن تىلدەرىنە اۋدارىپ، باسقا توپتارعا كونتينگەنتكە قازاق باسىلىمدارىنىڭ باسەكەگە قابىلەتتىلىگىن، كاسىبي تۇرعىدان بىلىكتىلىگىن كورسەتۋ.
جوبانىڭ تاعى ءبىر ماقساتى – ايماقتاعى جۋرناليستەردىڭ باسىن قوسۋ، سول ارقىلى ءبىرتۇتاس ۇلتتىق اقپاراتتىق كەڭىستىك قۇرۋعا ىقپال ەتۋ. ايماقتا كوتەرىلىپ جاتقان ماسەلەلەردى ورتالىق ءباسپاسوز وكىلدەرىنە جەتكىزۋ. وسى ارقىلى ورتاق مۇددەلەستىك، ورتاق اقپاراتتىق ورتا قالىپتاستىرۋ. ايماقتارداعى جۋرناليستەردى بىر–بىرىمەن تانىستىرۋ، ولاردىڭ ارالاسۋىنا، وي بولىسۋىنە مۇمكىندىك تۋعىزۋ.
پورتالدىڭ «تالقى» تاراۋىندا اپتا سايىن رەسپۋبليكا جۋرناليستەرىنىڭ پىكىرتالاسى، ساۋالنامالار جارىق كورىپ وتىرادى. بارشاعا بەلگىلى، ءورىستىلدى «زونا.كز»، «تسەنتر تياجەستي» سايتتارىنداعى سياقتى اي سايىن بەلگىلى ساياساتكەرلەر، مادەنيەت قايراتكەرلەرى اشىق الاڭعا شىعىپ، ينتەرنەتشىلەردىڭ سۇراقتارىنا جاۋاپ بەرىپ جاتادى. سايتقا جينالاتىن ماتەريالدار نەگىزىندە سان-الۋان دايدجەستەر جاسالىپ، «اباي—ينفورم» دەگەن ايدارمەن قازاقستاندىق جانە شەتەلدىك تۇتىنۋشىلارعا تاراتىلادى. پورتالدا جۋرناليستەرگە قاجەتتى اقپاراتتار، سىلتەمەلەر، «اباي» جانە «الاشوردا» كىتاپحانالارى، مۋلتيمەديالىق تاراۋلار ورنالاسادى. سونىمەن قاتار الداعى ۋاقىتتا جۋرناليستەر ءۇشىن قازاقتىلدى بلوگتار جۇرگىزۋ مۇمكىندىگى اشىلادى.
