قازاق تەلەۆيزياسى دەگەندە، كوپشىلىكتىڭ كوز الدىنا كەشەگى تەلەۆيزيانىڭ «التىن عاسىرىنا» بالانعان كەزەڭ ەلەستەيدى. سەبەبى ول كەزەڭدە تەلەديدار ەلدىڭ اقىلشىسىنا، باتاگوي ابىزىنا، تىنىسى مەن قامقورشىسىنا اينالعان ەدى.

مۇنداي دارەجەگە كەنجەبولات شالاباەۆ، كامال سمايىلوۆ، شەرحان مۇرتازا، ساعات اشىمباەۆ سىندى بىلىكتى ماماندار قاتىسۋىمەن دايىندالعان تەلەونىمدەردىڭ ارقاسىندا جەتكەن بولاتىن. ال بۇگىنگى قازاق تەلەديدارى حالىق جۇرەگىن جاۋلاماق  تۇگىل، كورەرمەندى وتاندىق باعدارلا­مالارعا زار قىلىپ قويدى. تەلەارنا­لارىمىزدىڭ اكتسيا پاكەتتەرى سىرتقا ساتىلىپ، ەكرانىمىزدى مەنتاليتەتى مەن مادەنيەتى، ءتىلى مەن ءدىلى، وزەگى مەن ءوڭى باسقا دۇنيەلەر  جاۋلاپ الدى.

قازاق تەلەۆيزياسى دەگەندە، كوپشىلىكتىڭ كوز الدىنا كەشەگى تەلەۆيزيانىڭ «التىن عاسىرىنا» بالانعان كەزەڭ ەلەستەيدى. سەبەبى ول كەزەڭدە تەلەديدار ەلدىڭ اقىلشىسىنا، باتاگوي ابىزىنا، تىنىسى مەن قامقورشىسىنا اينالعان ەدى.

مۇنداي دارەجەگە كەنجەبولات شالاباەۆ، كامال سمايىلوۆ، شەرحان مۇرتازا، ساعات اشىمباەۆ سىندى بىلىكتى ماماندار قاتىسۋىمەن دايىندالعان تەلەونىمدەردىڭ ارقاسىندا جەتكەن بولاتىن. ال بۇگىنگى قازاق تەلەديدارى حالىق جۇرەگىن جاۋلاماق  تۇگىل، كورەرمەندى وتاندىق باعدارلا­مالارعا زار قىلىپ قويدى. تەلەارنا­لارىمىزدىڭ اكتسيا پاكەتتەرى سىرتقا ساتىلىپ، ەكرانىمىزدى مەنتاليتەتى مەن مادەنيەتى، ءتىلى مەن ءدىلى، وزەگى مەن ءوڭى باسقا دۇنيەلەر  جاۋلاپ الدى.

راسىندا دا، كوگىلدىر ەكراننان قازىر نە كورىپ ءجۇرسىز؟ تەلەارنالاردىڭ تەتىگىن باسىپ قالساڭىز، رەسەي، امەريكا مەن انگليا، فرانتسيا، جاپونيا مەن تۇركيا، قالا بەردى، لاتىن امەريكا ەلدەرىنىڭ تەلەسەريالدارى مەن باعدارلامالارىنان كوز سۇرىنەدى. وسى ەلدەردىڭ سالت-ءداستۇرى ءبىر-بىرىنە مۇلدەم ۇقسامايتىنى بەسەنەدەن بەلگىلى جايت. ياعني تەلەارنالارداعى ناعىز پرايم-تايم ۋاقىتتا جاڭاعى بوتەن ەلدىڭ تەلەونىمدەرى ءبىزدىڭ جاس ۇرپاقتىڭ ساناسىن جاۋلاۋ ءۇشىن جانتالاسىپ جاتىر دەگەن ءسوز. تەلەارنالار ءبىزدىڭ ۇرپاققا تاڭنان كەشكە دەيىن وزگە ەلدىڭ سالتىن، ءومىر ءسۇرۋ ءداستۇرىن ءوز انا تىلىندە (قازاقشا اۋدارمامەن) ساناسىنا ءسىڭىرىپ جاتىر. بۇدان كەيىن استانا مەن الماتىداعى بيىك مىنبەرلەردەن جاستارعا قاراتىپ وتانسۇيگىشتىك قاسيەت تۋرالى رەسمي ايتىلعان ءسوز «قۇلاقتان كىرىپ بويدى الادى» دەگەنگە سەنەسىز بە؟  وزگە سالت-سانانى وزىمدىكى ەكەن دەپ وزەگىنە قۇيعان جەتكىنشەكتەردىڭ ەرتەڭگى كۇنى «قاعىنان جەرىگەن قۇلانعا» اينالماسىنا كىم كەپىل؟
ءسوز ەتىپ وتىرعانىمىزداي، شەتەلدىك باعدارلاما مەن سەريالداردى قازاق تىلىنە اۋدارىپ تا، اۋدارماي دا حالىققا ۇسىناتىن تەلەارنالاردىڭ قاتارى كۇننەن-كۇنگە كوبەيىپ بارادى. بۇل قاتارعا «نتك»، «ستۆ»، «تاڭ»، «31-تەلەارنا»، «قازاقستان»، «ەل ارنا»، «كتك»، «استانا»، «جەتىنشى ارنا»، سەكىلدى تەلەارنالار كىرەدى. مىسالى، «نتك» تەلەارناسىندا وتاندىق ءونىم جوقتىڭ قاسى. رەسەيلىك نۇسقادان كوشىرىلگەن «تاكسي» مەن «رەۆيۋ»، «Juke box» سىندى بەرەرى از باعدارلامالاردان وزگە كوز ءسۇرىنىپ، كوڭىل توقتاتار ەشتەڭە بايقامايسىز. ولاردىڭ دا باسىم بولىگى ورىس تىلىندە ەكەندىگىن ەسكەرسەك، تەلەارنانىڭ ءتىل ساياساتىن اۋدارما ارقىلى عانا ورىنداپ وتىرعانىن اڭعارامىز. اۋدارما دەگەننەن شىعادى. قازىر قاي ارنانى اشىپ قالساڭىز دا، اۋدارمانىڭ «تاماشا» ءتاسىلىن تاۋىپ العان. ءوزى ورىسشا سويلەپ تۇرعانىمەن، جۇگىرتپە جولدا قازاقشا كەتىپ جاتادى. وسى ۋاقىتقا دەيىنگى تەلەەكرانداعى ءونىم 50 دە 50 بولۋى ءتيىس دەگەن زاڭدى ورىنداعان تۇرلەرى وسى. اقىرى جۇگىرتپە جولعا كەپ قالدىق قوي. ايتا كەتەيىن. جۋىردا تەلەارنالاردىڭ تەتىگىن باسىپ وتىرىپ، بەلگىلى رەسپۋبليكالىق ارنالاردىڭ بىرىندە ءوتىپ جاتقان رەسەيلىك فيلمگە كوزىم ءتۇستى. جىگىتتىڭ موينىنا اسىلىپ العان قىز «يا حوچۋ تەبيا» دەيدى. ەكراننىڭ استىنداعى جۇگىرتپە جولدا قازاقشا بىلايشا اۋدارىپتى: «مەن سەنىمەن جىنىستىق قاتىناسقا تۇسكىم كەلەدى». مىنە، ماسقارانىڭ كوكەسى. بۇل ءبىر عانا مىسال. ەگەر بارلىق ارنالارداعى جۇگىرتپە جولدارعا كوڭىل توقتاتساڭىز، ءتۇڭىلىپ كەتەسىز. ەندى الگى «نتك» ارناسىنداعى  تەلەونىمدەرگە قايتىپ ورالايىق. وسى ارنانى اينالامدا كىسى وتىرعاندا نەمەسە بالا-شاعامەن وتىرعاندا ابايسىزدا قوسىپ قالام با دەپ قاتتى قورقام. «دوم - 2» سەكىلدى جاس ۇرپاققا ۇسىنۋعا بولمايتىن، ادەپسىز قىلىقتار مەن ارزان كۇلكىگە قۇرىلعان باعدارلاما. ال «ستۆ» مەن «تاڭ» تەلارنالارى اقشا تابۋدىڭ سوڭىنا ءتۇسىپ كەتكەندەي. كۇنى بويى «تۆ-دۇكەن قازاقستان» ارقىلى ىدىس-اياق پەن تەمىر-تەرسەك جارنامالايدى دا جاتادى. جانە بۇلاردى كۇنىنە ەكى-ءۇش مارتە قايتالايتىنىن قايتەرسىز؟ ادىلدىگىنە كۇمان تۋدىراتىن،   ينتەراكتيۆتى شوۋلار تاعى بار. الەم-جالەم كيىنگەن قىزدارى ەفيرگە شىعىپ الىپ، كەڭىردەكتەرىن جىرتادى دا جاتادى. «ستۆ» ارناسىنىڭ ابىرويىن جاۋىپ وتىرعان رەسەيدىڭ «نتۆ-سى» ەكەنىنە ەشكىمنىڭ داۋى جوق شىعار. ءتىپتى وسى ارنادان مەيلى شەتەلدىك بولسا دا، دەنى دۇرىس فيلم دە كورسەتىلمەيدى.  «قازاقستان» ۇلتتىق ارناسىنىڭ ونىمدەرى بار. ايگەرىم دەگەن قىز جۇرگىزەتىن «مەنشىكتى مەكەن» حابارىنىڭ كورەرمەنى كوپ ەكەنىنە كۇمانىم جوق. سەرىك جانبولاتتىڭ پىكىرتالاس  «كوكپارى» مەن مۇرات قىدىرباەۆتىڭ شىن «كوكپارى» دا ءبىزدىڭ ءونىم دەۋگە تۇرادى. «سەن سۇلۋ» دا كوپشىلىكتىڭ كوزايىمىنا اينالدى. ءبىر سوزبەن ايتقاندا، ۇلتتىق ارنا ءوز ءونىمى جاعىنان وزگەلەردەن وق بويى وزىق دەۋگە بولادى. ارينە، ءوز ونىمدەرىنىڭ اراسىندا ساپاسى سىن كوتەرمەيتىن حابارلارى دا از ەمەس. ساپا جايلى بولەك اڭگىمە. تارالىم اۋقىمى جاعىنان تارشىلىق كورمەيتىن «حابار» ارناسىنىڭ ەفيرىندە تۇگەلگە جۋىق وتاندىق ءونىم دەگەنىڭىزبەن دەنى ۇكىمەتشىل، بيلىكشىل. سىن جوق. ارنانى اۋىستىرماي ەكى كۇن كورسەڭ، جۇماقتا تۇرىپ جاتقانداي كۇي كەشەسىڭ. «تارازىداعى» قىز-جىگىتتەردىڭ وزگە ويلىلىعى قۋانتسا، «ءبىز ايتساقتىڭ» دا ايتارى مول كورىندى. ال «31-تەلەارنانىڭ» جاڭالىقتار قىزمەتىن قوسا العاندا «ءتول» باعدارلامالارى بەسەۋ-اق. اتاپ ايتار بولساق، «ينفورمبيۋرو»، «ءازىل ستۋديو»، «سىرلاسايىق»، «جۇلدىزبەن جۇزدەسۋ» جانە دە قازاقشا بەس باعدارلاما جابىلعاننان كەيىن پايدا بولعان «ۇلكەن ولجا» ينتەراكتيۆتىك شوۋى. ءبىزدىڭ  زاڭىمىز بويىنشا شەتەلدىك اكتسيونەرلەر قانداي دا ءبىر ارنانىڭ جيىرما پايىزىن عانا يەمدەنۋگە قۇقىلى. ال ەفيردەگى دۇنيەلەرىنە كەلگەندە باسىم ءتۇسىپ جاتادى. ەلىمىزدىڭ تەلەارنالارىندا وتاندىق باعدارلامالار نەگە از؟ باعدارلاما جاساۋعا قارجى جوق پا، الدە تەلەارنالار يدەيا توقىراۋىنا ۇشىرادى ما؟ نە بولماسا كورەرمەن كوزايىمىنا اينالۋدان گورى، قارجىلىق قۇرىلىمى مىقتى، بىراق دۇنيەلەرى تارتىمسىز تەلەارنا بولعاندى قالايدى ما؟ تۇسىنىكسىز. ءبىر انىعى - قازاقشا باعدارلامالار جابىلىپ، باسقا ەلدەردىڭ تەلەجوبالارى بۇرىنعىدان بەتەر قاپتاي تۇسكەندىگى. سونىمەن قاتار مەملەكەتتىك تىلدە 50 پايىز حابار تاراتۋ  مەجەسىن اۋدارما ارقىلى ورىنداپ وتىرعانى. بۇل ءسوزىمىزدىڭ مىسالى رەتىندە جاڭا جىل ەنە سالىسىمەن «31-تەلەارنادا» قازاقشا باعدارلامالاردىڭ باسىم بولىگى جابىلىپ، قازاقتىلدى جۋرناليستەردىڭ كەيبىرى ۋاقىتشا، ەندى بىرەۋلەرى تۇبەگەيلى جۇمىستان بوساتىلعانىن ايتۋعا بولادى. ونسىز دا ورىستانىپ، كوپشىلىكتىڭ كوڭىلىن كونشىتپەي جۇرگەن تەلەارنانىڭ قازاقشا باعدارلامالاردى جابۋى كورەرمەندەردىڭ نارازىلىعىن تۋدىردى. «پىكىر الاڭى»، «بيىك ماقسات»، «زامانداستار»، «كاسىپكەر»، «بىلگىرلەر بايگەسى» سىندى قازاقشا باعدارلامالار جاقسىلى-جاماندى بولسا دا تەلەارنانىڭ قازاقتىلدى كورەرمەندەرىنىڭ سۇرانىسىن قاناعاتتاندىراتىن. ءمانسىز، ماعىناسىز، ارزان ازىلمەن كورەرمەن كوڭىلىن اۋلايتىن «ستس» دۇنيەلەرىنىڭ اراسىندا كورىنىپ قالاتىن باعدارلامالاردىڭ جابىلۋ سەبەبىن «31-تەلەارنانىڭ» باس ديرەكتورى نۇرجان جالاۋقىزى بىلايشا ءتۇسىندىردى:
- ءبىز باعدارلامالاردى جوسپارلاعان كەزدە قاي باعدارلامانىڭ تەلەكورسەتىلىم ۇلەسى جوعارى بولادى، سول باعدارلامالاردى عانا ءارى قاراي جالعاستىرامىز. مەن، مىسالى، ءبىزدىڭ تەلەارناداعى شىعارىلعان باعدارلامالاردى ساپا جاعىنان ناشار دەپ ايتا المايمىن. بىراق ولار ءبىز كۇتكەندەي كەرەمەت تەلەكورسەتىلىمدىك ۇلەس سالماعىنا يە بولا العان جوق. وسى سەبەپتەن ءبىز بۇل باعدارلامالاردى توقتاتۋعا شەشىم قابىلدادىق». بۇدان اڭعارعانىمىز، الداعى ۋاقىتتا تەلەارنا تەك اتالمىش ەكى ولشەمگە جۇمىس ىستەيدى دەگەن ءسوز. ياعني جاڭادان باعدارلاما اشىلادى. دەڭگەيى تومەن بولسا، ول دا جابىلادى. ال وسى تالاپقا ساي بولۋ ءۇشىن باعدارلاما پرايم-تايمعا قويىلۋى كەرەك. ياعني  ەل-جۇرت ورىنعا وتىرعان كەشكى ۋاقىتتاردا كورسەتىلگەنى ءلازىم. وسى تۇرعىدان قاراعاندا، تەك «31-ارنا» عانا ەمەس،   ەلىمىزدەگى كەز   كەلگەن كوممەرتسيالىق ارنالارداعى قازاقتىلدى باعدارلامالار ءوز ءونىمى بولسا دا، وگەيدىڭ كۇيىن كەشىپ وتىرعانى جاسىرىن ەمەس. ونداي «التىن ۋاقىتتا» «اكەسىنىڭ قىزدارى» («پاپينى دوچكي»), «مەنiڭ مەيىرىمدى كۇتۋشىم» («مويا پرەكراسنايا نيانيا»),  «6 كادر» («6 كادروۆ») سەكىلدى بوتەن جوبالار ۇسىنىلادى. وسى پرايم-تايم ماسەلەسىنە قاتىستى باس ديرەكتور «تەلەارنا ءۇشىن كەز كەلگەن ۋاقىت پرايم-تايم بولۋى كەرەك» دەيدى. الايدا تەلەونىم ون جەردەن قىزىق بولسا دا، ەشكىم دە تىرشىلىگىن تاستاپ، ول باعدارلامانى كورمەسى انىق. ونىڭ ۇستىنە، ازعانا ۋاقىتتا اشىلعان باعدارلامانىڭ دەڭگەيىن انىقتاۋ قيىن. بالا قۇرساقتا توعىز اي، ون كۇن دەگەندە جەتىلىپ، ونداعان جىلداردان كەيىن ەر-ازامات بولىپ، اتا-اناسىن اسىرايدى. سول سەكىلدى باعدارلاما دا - تەلەارنانىڭ «بەل بالاسى». ونىڭ جاقسى ناتيجە كورسەتىپ، تەلەارنانىڭ جۇمساعان قارجىسىن قايتارۋىنا دا جىلعا جۋىق ۋاقىت كەرەك. سول كەزدە «دەڭگەيى مەن تەلەكورسەتىلىم ۇلەسى تومەن بولسا، ەسىكتى قاعىپ تۇرعان قارجى باسقا تەلەارناعا كەتىپ قالادى» دەگەن پىكىردەگى كوممەرتسيالىق تەلەارنالاردىڭ باسشىلىعى دىتتەگەن ماقساتىنا جەتەر مە ەدى؟ «31-تەلەارنا» باسشىلىعىنىڭ باعدارلاماعا جۇمسالعان قارجى قايتۋى كەرەك دەپ شىر-پىر بولاتىن ءجونى بار. سەبەبى اتالمىش تەلەارنا - جەكەنىڭ مەنشىگى. سوندىقتان مەملەكەت ەمەس، ءوزىن-ءوزى قارجىلاندىرادى. جارنامادان قارجى تابۋ ماقساتىندا تەلەارنا دەڭگەيى مەن تەلەكورسەتىلىم ۇلەسىن كوتەرۋگە، ال ونى كوتەرۋ ءۇشىن ات توبەلىندەي رەسپاندەنتتەر كوڭىلىنەن شىعۋعا تىرىسادى. بىراق دەڭگەيى تومەن بولۋى سەبەپتى جۇمسالعان قارجىنى قايتارمادى ەكەن دەپ، كورەرمەندى كوز قىزىعىنان ايىرۋعا بولا ما؟ كورەرمەن دەمەكشى، جابىلعان باعدارلامالاردىڭ  كوپتەگەن قارارماندارى بولعانىن نۇرجان مۇحامەدجانوۆا دا مويىندايدى:
- «زامانداستاردىڭ» كورەرمەندەرى كەرەمەت كوپ ەدى، «كاسىپكەردىڭ» كورەرمەندەرى وتە كوپ. «بيىك ماقسات» وتە جاقسى، كەرەمەت باعدارلاما بولدى. بىراق ونىڭ كورەرمەندەرى كوپ بولسا دا، تەلەكورسەتىلىمنىڭ ۇلەس سالماعى تومەن بولدى. سوندىقتان ءبىز ولاردى توقتاتتىق». وسى ارادا كورەرمەنى كوپ بولا تۇرا، دەڭگەيى مەن تەلەكورسەتىلىم ۇلەسىنىڭ تومەن بولۋ سەبەبىنە از-كەم توقتالايىق. مىسالى، ءجۇز ادام تاڭدالىنىپ الىندى دەلىك. بۇل ءجۇز ادام ەلىمىزدە جانە رەسەيدە تەلەراديو ونىمدەرىنىڭ دەڭگەيى مەن شىعارىلىم، كورسەتىلىم ۇلەسىن، كورەرمەندەردىڭ جاس شاماسىن انىقتاۋمەن اينالىساتىن «Gullap-media» اگەنتتىگىنىڭ ساۋالناما جۇرگىزەتىن، انكەتالىق پاراقشالار تولتىراتىن نەمەسە باسقاشا تاسىلمەن زەرتتەۋ جۇرگىزەتىن ماقساتتى اۋديتورياسىنا اينالادى. وسىناۋ جۇزدىكتى رەسپاندەنتتەر دەپ اتايدى. دەڭگەي مەن تەلكورسەتىلىم ۇلەسى تاڭدالىنعان رەسپاندەنتتەردىڭ باعدارلامانى نەمەسە تەلەارنانى كورۋ-كورمەۋىنە بايلانىستى. ءبىر باعدارلامانى رەسپاندەنتتەر كورمەي، قالعان ميلليونداعان حالىق كورىپ، تاماشالاسا دا، ول باعدارلامانىڭ اتالمىش ولشەمدەر بويىنشا كورسەتكىشى تومەن بولىپ سانالادى. وسىلايشا، ازدىڭ ايتۋىمەن كوپتىڭ كوڭىلىن قالدىرادى. مۇمكىن، ول ادامداردىڭ باسىم بولىگى ءورىستىلدى كورەرمەندەر شىعار؟ مۇمكىن، رەسپاندەنتتەر تەك قالالىقتار شىعار؟ ول جاعىن ەلەپ-ەسكەرىپ جاتقان ەشكىم جوق. تەلەارنانىڭ تاعى ءبىر اقساپ تۇرعان تۇسى - ءتىل سايا­ساتى. مەملەكەتتىك تىلگە بولىنگەن ەلۋ پايىزدىق مولشەردى نازيراشىلىقپەن - وزگەنىكىن ءوز تىلىمىزگە تارجىمالاۋمەن تولتىرىپ وتىر. ونىڭ ءبىر بولىگى تيتر ارقىلى جۇزەگە اساتىنىن، ول جۇگىرتپە جولداردىڭ قانداي ەكەنىن جوعارىدا ايتتىق. كەيبىر اقپارات كوزدەرىنە سۇيەنسەك، تەلەارنالارداعى ءتىل ساياساتىنىڭ ءوزى 37,5 پايىزعا عانا ورىندالادى ەكەن. زاڭ بويىنشا بەلگىلەنگەن مەجەگە جەتپەيدى دە. بۇل قاتەلىك پە، الدە زاڭبۇزۋشىلىق پا؟ جيىرما ءتورت ساعات بويى مەملەكەتتىك تىلدە حابار تاراتاتىن ءۇش تەلەارنا اشامىز دەپ جاتىرمىز. ءجون-اق. الايدا جوقتان بار ەتكەننەن گورى باردىڭ ءوزىن جەتىستىرىپ العان ابزال شىعار. قالتالىلاردىڭ قانجىعاسىندا كەتكەن تەلەارنانى جات «قۇشاعىنان» الىپ، ءوز باۋىرىمىزعا باسۋىمىز كەرەك شىعار؟ وسى ماسەلەنى اقىن مۇحتار شاحانوۆ اعامىز بيلىككە قويعان توعىز تالابىندا كوتەرگەن بولاتىن.
- مۇحتار شاحانوۆ ءوزىنىڭ بيلىككە قويعان تالابىندا «ستس-مەدياعا اكتسياسى ساتىلعان «31-تەلەارنانى» قايتارىپ الۋدى جانە مۇنداي ارەكەتكە تىيىم سالۋ كەرەكتىگىن ايتقان ەدى. ءسىز ارنانىڭ اكتسياسىن قايتارىپ الۋدى قالايسىز با؟» دەگەن سۇراققا نۇرجان جالاۋقىزى:
- كەيدە ۇراندايمىن دەپ وسىنداي پىكىرلەر ايتىلىپ جاتادى. بۇل ءاربىر ازاماتتىڭ ءوزىنىڭ ازاماتتىق كوزقاراسى عوي. مۇحاڭمەن ەشقاشان پىكىر تالاستىرمايمىن جانە تالاستىرعىم دا كەلمەيدى. ەكىنشىدەن، ءبارىمىز دە - وسى ەلدىڭ ازاماتىمىز. ءبىز ءۇشىن قازاقستاننىڭ، قازاق ەلىنىڭ، قازاق جاستارىنىڭ، قازاقستاندىقتاردىڭ بۇگىنى مەن ەرتەڭى وتە قىمبات. ءوز باسىم وتانىم ءۇشىن قىزمەت جاساپ جاتىرمىن. ايتا كەتەتىن نارسە، «ستس-مەديا» - تەك رەسەيدىكى ەمەس، بۇل حالىقارالىق تەلەكومپانيا. ونىڭ قۇرىلتايشىلارىنىڭ قۇرامىندا رەسەيلىكتەر دە، امەريكالىقتار دا، شۆەدتەر دە بار. قر زاڭىنا سايكەس، «ستس-مەديا» تەك جيىرما پايىزعا عانا يە. سوندىقتان ءبىز ءوز ساياساتىمىزدى قازاقستان رەسپۋبليكاسىنىڭ زاڭنامالارىنا سايكەس جۇرگىزەمىز. سول سياقتى تەلەارنادا بىردە-ءبىر شەتەلدىك ازامات جۇمىس ىستەمەيدى. ءبارى - قازاقستاننىڭ ازاماتتارى. ەكى اكتسيونەردىڭ كەلىسىمى بويىنشا، ءبىزدىڭ ەلىمىزدە ويىن-ساۋىقتىق كوشباسشى تەلەارنا قولعا الىندى. ءبىز وسى ماقساتتا جۇمىس ىستەپ جاتىرمىز»، - دەپ جاۋاپ بەردى. «ستس-مەديا» حالىقارالىق تەلەكومپانيا بولسا دا، كورسەتىلىپ جاتقان تەلەباعدارلامالارى رەسەيلىك. بۇعان ەكى تەلەارنانىڭ باعدارلامالار جۇيەسىن سالىستىرعاندا كوزىمىز جەتتى. كەشەگى حالىق جۇرەگىنەن ورىن تەپكەن «31-تەلەارنا» بۇگىندە ەلىم دەگەن ەرلەردىڭ جۇرەگىن اۋىرتىپ جۇرگەن سىڭايلى.
جالپى، ءبىزدىڭ كورەرمەن دە ءتوزىمدى عوي. ەكرانىنا نە سالىپ بەرسە دە، قىڭق دەمەستەن كورىپ وتىرا بەرەدى. بىراق وسى مارعاۋلىق، بويكۇيەزدىك جاقسىلىققا اپارمايدى. جاڭا ارنالار اشامىز، بار ارنالاردى جاڭارتامىز دەپ ءجۇرىپ، ەسكىمىزدەن ايىرىلىپ قالماساق يگى ەدى.

«جاس قازاق»، 05.02.2010