بوداندىق قامىتتى ءۇزىپ شىققان كەز-كەلگەن مەملەكەت الدىمەن "بىرتىندەپ وتارسىزدانۋ" ساياساتىن جۇرگىزەدى. ونىڭ ەكى ءتۇرى بار. ءبىرىنشى - ەكونوميكالىق وتارسىزدانۋ. ياعني، مەتروپوليا يەمدەنىپ كەلگەن ۇلتتىق بايلىقتى مەملەكەتكە قايتارىپ الۋ. ەكىنشىسى - رۋحاني وتارسىزدانۋ. ياعني، تاريحي اقتاڭداقتارعا ءادىل باعا بەرىپ، تاريحتى ۇلتتىق مۇددە تۇرعىسىنان جازۋ. بىزدە وسى ەكى ءىستىڭ ەكەۋى دە جۇرگىزىلمەدى. جۇرگىزىلسە دە كەمشىن تۇسى كوپ. مىسالى، ەكونوميكادا - يگىلىگىن مەتروپوليا كورگەن ۇلتتىق بايلىق سول كۇيىندە قالدى نەمەسە ءونىمدى ءبولىسۋ تۋرالى شارتتى حالىقتان جاسىرىپ، شەتەلگە قايتا ساتىلدى. ال رۋحاني وتارسىزدانۋ بويىنشا - قازاق تاريحى اڭىز-افساناعا نەگىزدەلدى. ءتىپتى، ەلىمىزدىڭ تۇكپىر-تۇكپىرىنەن تابىلىپ جاتقان ارحەولوگيالىق قازبالاردى مەنشىكتەي الماي، وسى دالادا قايسىبىر عاسىردا ءومىر ءسۇرىپ- جوعالىپ كەتكەن بىزگە قاتىسسىز تايپالارعا جاتقىزىپ كەلدىك. ەكىنشى دۇنيەجۇزىلىك سوعىس تاقىرىبى - رەسەي كوزقاراسىنان اينىماي بەرىلىپ كەلدى. ۇلتتىق مۇددەنى كوزدەگەن ۇستازداردىڭ جاعاسىنا - شاكىرتتەرى جارماسىپ جاتىر. 

ەندى تاريح وقۋلىعىن رەسەي مەن قازاقستان تاريحشىلارى بىرىگىپ جازا باستادى. بۇل جەردە - رەسەيدىڭ يمپەريالىق امبيتسياسى قازاق تاريحشىلارىن تاعى دا تۇنشىقتىرىپ تاستايتىنى ءسوزسىز. ال ءبىر ايدان سوڭ - اتىن ەۋرازيالىق ەكونوميكالىق وداق دەپ وزگەرتكەن ۇلى مەتروپولياعا قوش كەلىپسىز!
وتارسىزداندىرىلماعاندىقتارىڭىزبەن، گوسپودا!

توقتار جاقاش