سەنبى, 27 اقپان 2021
46 - ءسوز 4623 0 پىكىر 23 ءساۋىر, 2014 ساعات 10:11

بەكبولات تىلەۋحاننىڭ بەينەۇندەۋىنە ۇندەس وي

بەكبولات تىلەۋحان اعامنىڭ بەينە ۇندەۋىن كوردىم. ايتۋىم كەرەك. بەكەڭدە التى الاسىم، بەس بەرەسىم  جوق. مەن دە ءار قازاق سەكىلدى بەكبولات اعانىڭ انشىلىگىن، بويىنا اللا دارىتقان تالانتىن سىيلايمىن، ازاماتتىعىن قۇرمەتتەيمىن. داستارحانىنان ءدام دە تاتتىم، اڭگىمەسىن دە تىڭدادىم. ەل سان ساققا جۇگىرتەتىن مازھابى مەن اقيداسىندا شارۋام جوق. اركىم اللانى قالاي تانيدى، جاراتۋشىعا قالاي عيبادات ەتەدى - ءوز ماسەلەسى. مەن ءۇشىن بەكبولات - ەڭ الدىمەن قازاق! بۇل پوستىمنان كەيىن اقبەرەن دە پالەن ەكەن، تۇگەن ەكەن دەگەن اڭگىمەنى قوزدىرماڭىزدار، قۇداي ءۇشىن وتىنەم.

الگى بەينە ۇندەۋىندە ءوز پىكىرىن بەكەڭ كومەيىنە وكسىك تىعىلىپ، ەموتسيامەن ايتىپ وتىر. كىسى تانيتىن ادامعا ءبىلىنىپ-اق تۇر. «اڭىز ادام» جۋرنالىنا قاتىستى كوزقاراسى ءوز الدىنا. اڭگىمە ول تۋرالى ەمەس. ماسەلە، ەلدىڭ ەرتەڭىنە الاڭداعان ازاماتتىڭ سوزىندە. ءيا، بىزگە قازىر بىرلىك كەرەك. قانداي جاعدايدا دا. ەلدىڭ اماندىعى كەرەك. بۇلىككە ۇندەپ، ارانداتۋشى بولۋ - ءوزىڭ بىلمەي، بىرەۋدىڭ قولشوقپارى بوپ سىلتەنۋ، ماريونەتكا بوپ جاۋلارىڭنىڭ جوسپارىنىنىڭ تەز ورىندالۋىنا كومەكتەسۋ دەپ تۇسىنگەنىمىز ابزال. مىستان كەلە جاتسا، جەزتىرناعىنا ىلىنبەۋدىڭ، سول شاقتا ودان دا سۇم، ودان دا ايلالى بولۋدى قاراستىرۋىمىز قاجەت. بيلىكتى ءسۇيىپ، تالىقسىعاندىقتان  ايتىپ وتىرعام جوق. شىنىمدى ايتايىن، كوڭىل كۇپتى بولعاننان ايتىپ وتىرمىن. ەڭ ءتاتتى قۇندىلىعىمىز - تاۋەلسىزدىگىمىزدەن ايىرىلىپ قالۋدان تۋعان ۇرەيدىڭ اسەرىنەن ايتىپ وتىرمىن. ەموتسيا كەرەك ەمەس، ول راس. قازاق قارا ورمانداي ءبىرتۇتاس، جاۋى شەتىنە كەلسە دە، ەل ىشىنە كىرگىزبەيتىن وزىنە ءوزى مىقتى قورعان بولۋى كەرەك. تاۋبەشىلىك، شۇكىرلىك تە دۇرىس، الايدا بىزگە قازىر وتە ساق، وتە اقىلدى بولۋ قاجەت. بۇل زاماندى دا وتكەرەرمىز. قازىر سەنەرىمىز دە، سۇيەنەرىمىز دە - ءبىر جاراتۋشى عانا. اللا الاشتى تاعى ءبىر قيىن-قىستاۋ كەزەڭنەن امان-ساۋ الىپ شىقسىنشى. ول ءبىزدىڭ نيەتىمىزگە بايلانىستى، اعايىن!

اقبەرەن ەلگەزەك

Facebook.com الەۋمەتتىك جەلىدەگى جەكە پاراقشاسىنان الىندى

0 پىكىر