قاراعاندىدا جولاۋشىلار اۆتوبۋستارى جۇرگىزۋشىلەرىنىڭ ەرەۋىلى جالعاسۋدا دەپ حابارلايدى «قازاقپارات».

قاراعاندىدا بۇگىن تاڭەرتەڭنەن بەرى №3 اۆتوبۋس پاركىنىڭ جۇرگىزۋشىلەرى مەن كوندۋكتورلارى ەرەۋىلگە شىقتى، ولار جۇمىس شارتى بويىنشا بىرقاتار تالاپتاردى العا تارتتى، دەپ حابارلادى اگەنتتىكتىڭ ءتىلشىسى. اۆتوپارك باسشىلىعىنىڭ مالىمەتتەرى بويىنشا، جۇمىسقا 4 جولاۋشىلار باعىتى بويىنشا 50-گە جۋىق اۆتوبۋس شىقپاعان.

بۇدان كەيىن اۆتوپارك قىزمەتكەرلەرىمەن كاسىپورىن باسشىلىعى، قاراعاندى اكىمدىگىنىڭ، وبلىستىق پروكۋراتۋرا، ەڭبەك بويىنشا مەملەكەتتىك ينسپەكتسيا وكىلدەرى كەزدەستى. ء«بىزدىڭ تالابىمىز - جوسپاردى تومەندەتۋ، بەنزين بەرۋ نورماسىن كوتەرۋ، كونترولەرلار سالاتىن زاڭسىز ايىپپۇلداردى الىپ تاستاۋ»، - دەلىنگەن اۆتوپارك جۇمىسشىلارىنىڭ نارازىلىعىنىڭ سەبەپتەرى اتالدى.

الايدا كاسىپورىن باسشىلىعى قىزمەتكەرلەرىنىڭ بۇل ارەكەتتەرىن مادەنيەتسىزدىك دەپ سانادى.

«تاڭەرتەڭ ولار جينالىپ، داۋىس كوتەرە باستادى. مەن ولارعا: ماشينالارىڭدى قويىپ، جولعا شىعىڭدار دەدىم. بۇل مەنىڭ سوزدەرىم. ءتاريفتى كوتەرگەنمەن، قىزمەت كورسەتۋ مادەنيەتى وزگەرگەن جوق. زاڭبۇزىشىلىقتاردى ءبىز اكتىگە تىركەپ، جازالايمىز. ءتارتىپ بار!»، - دەپ مالىمدەدى №3 اۆتوپاركتىڭ باس ديرەكتورى ارۋتيۋن مانۋكيان.

قالا بيلىگى اكتسياعا قاتىسۋشىلاردى كەلىسسوزگە شىقاردى. «باستاماشى توپ قۇرىڭىزدار. تالاپتارىڭىزدى رەسمي تۇردە قاعازعا جازىپ، اكىمدىككە جولداڭىزدار. ءبىر تاۋلىكتىڭ ىشىندە قاراستىرىپ، جاۋابىن بەرەمىز»، - دەدى اۆتوپاركتىڭ كوتەرىلگەن جۇمىسشىلارىنا قاراتا ايتقان سوزىندە قاراعاندى اكىمىنىڭ ورىنباسارى قايرات بەگىموۆ.

كەزدەسۋدە بولعان قاراعاندى وبلىسى پركۋراتۋراسىنىڭ باسقارما باسشىسى رينات اقپاروۆ رەسمي مالىمدەمە تۇسكەننەن كەيىن بۇل ماسەلەنىڭ زاڭدى تۇردە قارالاتىنىن ايتىپ، سەندىردى.

«مۇندا قازىر ءوز ۇستانامىن بىلدىرەتىن كاسىپوداق ۇيىمى، نە باستاماشى توپ جوق. ادامدار ءا دەگەننەن شىعا سالعان»، - دەدى قاراعاندى وبلىسى ىشكى ساياسات باسقارماسى باسشىسىنىڭ ورىنباسارى نۇرلان بيكەنوۆ.

جۇرگىزۋشىلەر سوڭىنا دەيىن ءوز تالاپتارىنىڭ ورىندالۋىن كۇتەنىن مالىمدەدى. «جالعاستىرامىز. بۇگىن جولعا شىقپايمىز»، - دەدى جۇرگىزۋشىلەر ۇجىمىنىڭ اتىنان دانيار دوسوۆ.

اباي-اقپارات