سيرياداعى ادام ءتۇسىنىپ بولمايتىن قالايماقان، قارۋلى قاقتىعىسقا «جيحاد» جاسايمىز دەپ اتتانعان قازاق جاستارى تۋرالى جانىمىز اۋىرا وتىرىپ العاشقى اقپاراتتى بەرگەن ءبىز بولاتىنبىز. سونداعى جاريالانىمنىڭ باس جاعىن قايتادان قاپەرلەرىڭىزگە ۇسىنىپ كورەيىك. قاراڭىز:

«الدىڭعى جۇمادا جەزقازعان قالاسىندا قر ءدىن ىستەرى اگەنتتىگى مەن قاراعاندى وبلىسى اكىمدىگىنىڭ بىرلەسە ۇيىمداستىرۋىمەن «تاكفىرشىلىك – ءدىني ەكسترەميزمنىڭ قاۋىپتى تۇرلەرىنىڭ ءبىرى» اتتى رەسپۋبليكالىق عىلىمي – تاجىريبەلىك كونفەرەنتسياعا ارنايى شاقىرتۋمەن باردىم. ءبىزدىڭ زەرتتەۋىمىزگە قاراعاندا جەزقازعان وڭىرىندە تاكفيرشىلدەر جوق ءتارىزدى ەدى. ارى كەتسە، سۋرۋريشىلدەر مەن مادحاليشىلدەر بار دەپ بىلەتىنبىز. ءبىرتالاي ادام باس قوسقان تەوريالىق تۇرعىداعى تانىمدىق جيىن، قاۋىپتىڭ الدىن-الۋ شارالارىنىڭ ءبىرى دەپ ويلاعانمىن. سويتسەم ماسەلەنىڭ ءمانى باسقادا ەكەن...

كەشقۇرىم شام نامازىن وقۋعا ورتالىق مەشىتكە باس سۇعىپ، جاماعاتپەن جۇزدەسكەنبىز. نامازحانداردىڭ نەگىزگى دەنى جاستار ەكەن. «كوكەيدە جۇرگەن قانداي ساۋالدارىڭىز بار؟» دەپ ەدىك، ءتۇرلى سۇراقتار قارداي بورادى. ەرەكشە ەسىمدە قالعانى، جاپ-جاس جىگىتتىڭ: «وزدەرىڭىزگە بەلگىلى ءبىزدىڭ ەلدەن سيرياداعى سوعىسقا 40  بالا «جيحاد» دەپ اتتاندى. ونداعى مۇسىلمان باۋىرلاعا كومەك قولىن سوزامىز دەپ ءتورت قارۋىن سايلاپ وتىرعاندار ىشىمىزدە ءالى دە بار. وسىعان نە ايتاسىزدار؟» دەگەنى بولدى. قاپەلىمىزدە نە ايتارىمىزدى بىلمەي، ازداپ ابدىراپ قالدىق. جەزقازعانعا بىزبەن بىرگە بارعان قمدب-نىڭ نايب-ءمۋفتيى، ازىرەت سۇلتان مەشىتىنىڭ باس يمامى، ق.جولدىبايۇلى: «سيرياداعى جاعدايدا مۇسىلمان مەن مۇسىلمان ءبىر-بىرىنە قارۋ كەزەنىپ، مايدانداسۋدا. كىمدىكى دۇرىس، كىمدىكى بۇرىس ەكەندىگى بەلگىسىز.  سوندىقتان، سيرياعا جيحاد دەپ اتتانداۋدىڭ ەش رەتى جوق» دەپ جاۋاپ بەرىپ، جاماعاتتىڭ كۇپتى كوڭىلىن ورنىنا تۇسىرگەندەي بولدى. الايدا، جاماعاتتىڭ ىشىندەگى قىسقا بالاق، قىرما مۇرت، قاۋعا ساقالدىلاردىڭ ايىلىن دا جيماعانىن اڭعاردىم. ءسويتىپ، اڭىرايىپ، ابدىراعان كۇيمەن مەشىتتەن شىقتىق.

بىزگە جولباسشى بولىپ جۇرگەن ساتباەۆ مەشىتىنىڭ يمامى باعداۋلەتتەن «جاڭاعىنىڭ ايتقانى اقيقات پا؟» دەسەم، ول: ء«يا، ايتقانى راس» دەيدى. مۇنى ەستىپ، قازاق جاستارىنا ايدىن كۇننىڭ امانىندا جىلى توسەگىنەن ءتۇڭىلىپ، قان مايدانعا اتتاناتىنداي نە كورىندى دەپ، ازا بويىم قازا بولدى» (مۇقان يساحان. «سيرياداعى سوعىسقا 40 بالا «جيحاد» دەپ اتتانىپتى...» http://abai.kz/node/39836)

كەشە پاۆلودار سوتى  سيرياداعى سوعىسقا بارىپ قايتقان ەكىباستۇزدىڭ قوس تۇرعىنىنا  ۇكىم كەستى دەپ حابارلايدى كتك ارناسى.

«ازامات قازباەۆ جازاسىن جالپى رەجيمدەگى كولونيادا وتكىزەتىن بولسا، ءابۋسالام مىرزاباەۆ جاساعان قىلمىسىنىڭ اۋىرلىعىنا بايلانىستى قاتاڭ   تارتىپتەگى تۇرمەنىڭ بىرىنە قامالماق. ال، وتكەندە عانا ايىپتىلار ورىندىعىنان توبە كورسەتكەن بەرىك جاقىپوۆ پەن بوريس مىرزاباەۆ ەكسترەميستىك توپتاردى قارجىلاندىرعانى ءۇشىن 3 جىل شارتتى مەرزىمگە كەسىلىپ وتىر. سوت زالىنان بوستاندىققا جىبەرىلگەن مىرزاباەۆتاردىڭ ۇلكەنى 30 جاستا، بۇرىن سوتتالماعان. ال ونىڭ 27 جاستاعى ءىنىسى ءابۋسالام 2008 جىلى الاياقتىق جاساپ، ەكى جىل جازاسىن وتەپ شىعىپتى. ايتا كەتۋ كەرەك، بۇل ءىس ءبىر جىلعا جۋىق تەرگەلدى. اداسقان تورتەۋدىڭ تۋىستارى ۇكىم شىعارىلعان ساتتە كوز جاسىنا ەرىك بەردى. سودىرلاردىڭ اراسىنا تۇسكەنىنەن بولەك، اسكەري جاتتىعۋدان وتكەن قوس ەكىباستۇزدىق تاياۋ شىعىسقا ءتۇپ-تۇقيانىن تۇگەلدەي كوشىرىپ الماق بولعان ەكەن.

http://www.ktk.kz/kz/news/video/2014/03/20/19341.

Abai.kz