قازاقتىڭ ەڭ كوپ تاراعان رۋى - ارعىن. قازاقتاردىڭ رۋ بويىنشا بەيرەسمي ساناعىنىڭ وسىنداي مالىمەتى الەۋمەتتىك جەلىلەردە جاريالانعان. بۇل مالىمەتتەرگە قاراعاندا، ورتا ءجۇز - ارعىنداردىڭ سانى 509 مىڭ ادام ەكەن. ەكىنشى ورىندا - تاعى دا ورتا ءجۇز - نايمان (395 مىڭ ادام). ءۇشىنشى ورىندا ۇلى ءجۇزدىڭ وكىلى - دۋلات (334 مىڭ).

كىشى جۇزدەگى ۇرپاعى ەڭ كوپ رۋ شومەكەي (100 مىڭ) بولىپ شىقسا، ادايلار - 90 مىڭ ادام، تابىندار - 80 مىڭ بولعان. Tengrinews.kz سايتىنىڭ جازۋىنشا، 1896-1911 جىلى جۇرگىزىلگەن اۋىل شارۋاشىلىعى ساناعى مالىمەتتەرى بويىنشا دا ارعىنداردىڭ سانى 509 مىڭ ادام بولعان. ول ۋاقىتتا بۇل رۋ وكىلدەرى، نەگىزىنەن، كوكشەتاۋ، قارقارالى، اقمولا، تورعاي، اتباسار، پەتروپاۆل، ومبى ۋەزدەرى مەن سەمەي قالاسىندا تۇرعان.

مۇحامەدجان تىنىشباەۆتىڭ مالىمەتىنشە، 1917 جىلى ارعىندار قازاق رۋلارى اراسىندا سانى (890 مىڭ ادام) جونىنەن ەكىنشى ورىندى يەلەنگەن. ءبىرىنشى ورىندا بايۇلى (1 030 مىڭ ادام), ءۇشىنشى ورىندا نايماندار (830 مىڭ ادام) بولعان. 

كوكتەم ايلارىندا تۇركيالىق تاۋەلسىز زەرتتەۋشىلەر الەمدەگى قازاقتاردىڭ سانىن 18 ميلليونعا جەتتى دەپ جازعان بولاتىن. قازاقستاندا شىلدە ايىنداعى ستاتيستيكا بويىنشا حالىقتىڭ  11,2 ميلليونى قازاقتار ەكەنى حابارلانعان. 

1897 جىلعى ساناق بويىنشا قازاقستان اۋماعىنداعى 4,5 ميلليونداي حالىقتىڭ 80 پايىزى قازاقتار بولعان. 1920-1921 جىلعى جانە 1929-1933 جىلدارداعى اشتىقتان 4,3 ميلليونداي ادام اجال قۇشقان. اشتىققا ۇشىراۋشىلار تۇگەلدەي «مالىن جانىنا ساداعا» ەتكەن قازاق شارۋالارى ەدى.

Abai.kz