بۇگىن،  8-قىركۇيەك كۇنى قازاقستان جازۋشىلار وداعىنىڭ ادەبيەتشىلەر ۇيىندە قىتاي حالىق رەسپۋبليكاسى مەملەكەتتىك سىيلىعىنىڭ يەگەرى، قازاقستانداعى حالىقارالىق اقىندار ءمۇشايراسىنىڭ بىرنەشە رەت جەڭىمپازى اتانعان اقىن سەرىك قاپشىقبايۇلىنىڭ 80 جىلدىق مەرەيتويىنا ارنالعان «ايدان ارى، كۇننەن بەرى …» اتتى جىر كەشى وتەدى.

س.قاپشىقبايۇلى قىتاي حالىق رەسپبۋليكاسىندا تۋىپ، 1956 جىلى شىڭجاڭ ينستيتۋتىنىڭ ءتىل-ادەبيەت فاكۋلتەتىن تامامداعان. ەڭبەك جولىن «شىڭجاڭ وقۋ-اعارتۋ» جۋرنالىندا باستاپ، 1984 جىلى «تارباعاتاي» جۋرنالىنىڭ باس رەداكتورى بولادى. 1986 جىلى «جىلدار اراسىندا» اتتى تاڭدامالى ولەڭدەر جيناعى ءۇشىن قحر مەملەكەتتىك سىيلىعىن العان.  1994 جىلى اتاجۇرتقا قونىس اۋدارعان اقىن بىرنەشە جىر جيناقتارى مەن پروزالىق شىعارمالار جازدى. ەلىمىزدە «بالدىرعان» جۋرنالىندا ءبولىم رەداكتورى بولىپ قىزمەت اتقاردى. ول «قازاقستان تاۋەلسىزدىگىنە 10 جىل» مەرەكەلىك مەدالىمەن ماراپاتتالدى.

اقىننىڭ بۇعان دەيىن «تاس»، «جىلقى ىشىندە الا ءجۇر»، «جوق»، «كۇنشىعىس»، «جەر باسىپ جۇرگەندەر»، «بالا» اتتى كىتاپتارى جارىق كورگەن. قاپشىقبايۇلىنىڭ جىر كەشىنە ادەبيەتتەگى ۇزەڭگىلەستەرى مەن ءىزباسار ىنىلەرى، سونداي-اق بەلگىلى ونەر شەبەرلەرى قاتىسادى. كەلىڭىزدەر، كەشتىڭ قوناعى بولىڭىزدار.

اباي-اقپارات