ءبىرىنشى قىركۇيەك - ءبىلىم كۇنى ءبىر جارىم اي بۇرىنعى باس ۇستازبەن بولعان ينتەرنەت-كونفەرەنتسيامىزدىڭ جاۋاپسىز قالعان سۇراقتارى تۋرالى جازعان ەدىك. ازىرگە مينيستردەن ەشقانداي جاۋاپ جوق. سونىمەن،

جاۋابى جوق جەتىم ساۋال – 4

17/07/2014

قۇرمەتتى، اسلان اعا!

مەن قىتايدان جاقىندا كەلگەن قارىنداسىڭىزبىن. پەكيندەگى شەتەل ءتىلى ۋنيۆەرسيتەتىن اعىلشىن ءتىلى مەن ادەبيەتى بويىنشا ءتامامداپ، ماگيستراتۋرانى وسىندا وقۋعا كەلدىم. مەكتەپتى قىتايشا بىتىرگەم. ۋنيۆەرسيتەتتە اعىلشىن تىلىندە ءبىلىم الدىم. ياعني قىتاي، اعىلشىن تىلدەرىن جەتىك بىلەمىن جانە انا تىلىمنەن دە قۇرالاقان ەمەسپىن. ماقساتىم – اتاجۇرتتا ءبىرجولا قالۋ. بۇگىن ءال-فارابي اتىنداعى قازاق ۇلتتىق ۋنيۆەرسيتەتىنە بارىپ، وقۋ جاعدايىن ۇعىسىپ كەلدىم. ماماندىعىم بويىنشا فيلولوگيا فاكۋلتەتى مەن شىعىستانۋ فاكۋلتەتىندە وقۋعا مۇمكىندىگىم بار ەكەن. ولاردىڭ ايتۋىنشا، ەتنيكالىق قازاق رەتىندە ءوتىنىش جازىپ، قازاق ءتىلىنىڭ ورىنىنا اعىلشىن تىلىنەن تەست تاپسىرۋعا بولاتىن كورىنەدى. سىزدەن سۇرايىن دەگەنىم، مەن اعىلشىن ءتىلى سىناعىنان وتسەم دە، ماماندىقتان ەمتيحان تاپسىراردا كەدەرگىلەرگە ۇشىرامايمىن با؟ ارينە، وسىندا وقۋ بىتىرگەن قاتارلاستارىم دا كوپ. مەنىڭ قىتاي ەلىندە ءبىلىم العانىمدى، جاڭادان كەلىپ جاتقانىمدى ەسكەرىپ، نازاردا ۇستاۋىڭىزدى سۇرايمىن. قالاي بولعاندادا، ءوز ءبىلىمىمدى مۇمكىندىگىنشە دالەلدەپ، ماگيستراتۋرادا ءبىلىم العىم كەلەدى.

قىزمەتىڭىزگە ساتتىلىك تىلەيمىن!

سىزگە دەگەن ۇلكەن قۇرمەتپەن،
ۇلپان سەرىكقىزى