«پاتريوتيزم – ەڭ ارلى، ەڭ سىپايى سەزىم... سوندىقتان، ءار ءسوزدىڭ قادىرىن ءبىل، وتانسۇيگىشتىك سەزىم تۋرالى كەز-كەلگەن ۋاقىتتا ايقايلاي بەرمە. ابزالى – ءوز ەلىڭنىڭ يگىلىگى مەن قۋاتتىلىعى ءۇشىن ءۇنسىز ءجۇرىپ، ەڭبەك ەت!». ورىستىڭ ويشىلى ۆاسيلي سۋحوملينسكيدىڭ وسىناۋ قاناتتى ءسوزى بارشا قازاقستاندىقتاردىڭ قاپەرىندە بولۋى ءتيىس. ويتكەنى، ءبىز جايباراقات ءومىر ءسۇرىپ جاتقان جوقپىز. ەلباسىمىز نۇرسۇلتان نازارباەۆ ءبارىمىزدىڭ الدىمىزعا ادۋىندى ماقسات قويدى. «قازىرگى شاقتا 2050 جىلى الەمدەگى دامىعان 30 ەلدەردىڭ قاتارىندا كىم بولاتىنىن ەشكىم ءدوپ باسىپ بولجاي المايدى، بىراق سول «وتىزدىقتىڭ» قۇرامى قانداي بولسا دا، قازاقستان الدىڭعى قاتارلى دامىعان مەملەكەتتەردىڭ توبىنان ورىن الۋعا مىندەتتى»،- دەدى ۇلت كوشباسشىسى «قازاقستان-2050» ستراتەگياسىندا.

جالپى العاندا، «قازاقستان-2050» ستراتەگياسى ەڭ الدىمەن، قازاقستان ازاماتتارىنىڭ ىسكەرلىك بەلسەندىلىگىنىڭ جاپپاي وسۋىنە ارقا سۇيەيدى. قازىردىڭ وزىندە قازاقستاندىقتار – تابىستى كاسىپكەرلەردىڭ ۇلتىنا اينالدى دەپ نىق سەنىممەن ايتۋىمىزعا بولادى. مىسالعا، جەكەشەلەندىرۋدىڭ ەكىنشى تولقىنىن الايىق. ۇلتتىق كاسىپكەرلەر پالاتاسىنىڭ جۇرتشىلىقپەن بايلانىس جونىندەگى دەپارتامەنتى حابارلاعانداي، 2014 جىلدىڭ 13 تامىزىنا دەيىنگى مالىمەتكە سايكەس، بيىلعى جىلى جەكەشەلەندىرىلۋى ءتيىس 300 نىساننىڭ 27-ءسى جالپى سوماسى 1 080 ملن. تەڭگەگە (1,1 ملرد. تەڭگە) ساتىلىپ ۇلگەرگەن. تىپتەن، ءبىر نىسان ەلەكتروندى بايقاۋ بويىنشا ءوزىنىڭ باستاپقى قۇنىنان 25 ەسە قىمبات باعاعا ساۋدالانعان. وسى مىسالدىڭ ءوزى قازاقستاندىقتاردىڭ تابىستى كاسىپكەرلەر ۇلتىنا اينالعانىن دالەلدەيدى.

مەنىڭ پايىمداۋىمشا، ءبىز الەمدەگى باسەكەگە قابىلەتتى ەلدەردىڭ، ۇلتتاردىڭ قاتارىنا قوسىلۋىمىز ءۇشىن، ارقايسىمىز جاڭا كوشباسشىلىققا ۇمتىلۋىمىز قاجەت. جەكەشەلەندىرۋ ۇدەرىسى وسىعان تاپتىرمايتىن مۇمكىندىك بەرىپ وتىر. قازىر ساياسات، ەكونوميكا، زاڭ، مەديتسينا سياقتى سالالارمەن قاتار ءوندىرىس سالاسىنا دا جاڭا كوشباسشىلار قاجەت ەكەنى داۋسىز. بۇل سالاعا كەلەتىن جاڭا باسشىلاردىڭ ءىسى وڭعا باسۋى ءۇشىن، ولار ءوزىن شەنەۋنىك-باستىق رەتىندە تانىتىپ، قول استىنداعىلارعا جايسىزدىق اكەلمەي، كەرىسىنشە، سولاردىڭ سەنىمىنە كىرۋدى ءوزىنىڭ نەگىزگى مىندەتى دەپ ءبىلۋى كەرەك. بۇل جەردە ءبىز جوعارىدا ءسوز ەتكەن وتانسۇيگىشتىك سەزىمنىڭ ۇلكەن ءرول وينايتىنى بەلگىلى.

سوندىقتان، اكتسيا وتە اشىق، جاريا جاعدايدا ءوتۋى كەرەك. سەبەبى، مەملەكەت باسشىسى 6 تامىزداعى ۇكىمەتتىڭ كەڭەيتىلگەن وتىرىسىندا جەكەشەلەندىرۋ كەزىندە مەملەكەتتىك نىسانداردىڭ شەنەۋنىكتەردىڭ تۋعان-تۋىستارىنا «بارماق باستى، كوز قىستىمەن» ۇلەستىرىلىپ كەتپەۋىن قاتاڭ ەسكەرتتى. «بۇرىنعىداي بىلىق-شىلىق ورىن الىپ جۇرمەسىن. قولىندا بيلىگى بارلار، قونىشىنان باستىپ قالدى. سول كەزدە زاڭسىز بولىنگەن جەر مەن مۇلىكتى قايتا تارتىپ الىپ جاتىرمىز. وسىنداي جاعداي قايتالانباسىن!»،- دەدى ن. نازارباەۆ. ياعني، ىسكەرلىك سەرپىن، جاڭاشىلدىق جانە پراگماتيزم بارشا قازاقستاندىقتاردىڭ ىسكەرلىك مادەنيەتىنىڭ اجىراماس بولشەگىنە اينالۋى ءتيىس. سول كەزدە عانا ءبىز ناقتى ناتيجەگە قول جەتكىزەمىز.

ايتپاقشى، ۇلتتىق كاسىپكەرلەر پالاتاسى مەملەكەتتىك ورگاندار مەن كاسىپكەرلەردى جەكەشەلەندىرۋ ۇدەرىسىندە اشىقتىق، جاريالىلىق قاعيداتتارىن ۇستانۋعا شاقىرۋدا. ەلىمىزدەگى بيزنەس قۇرىلىمداردىڭ مۇددەسىن قورعايتىن مەكەمە بىرىڭعاي ەلەكتروندىق ساۋدا الاڭىنداعى بىرقاتار تەحنيكالىق كەمشىلىكتەرگە نازار اۋداردى. ماسەلەن، ۇكپ-نىڭ توراعاسىنىڭ ورىنباسارى جاننات ەرتىلەسوۆانىڭ پىكىرىنشە، ايماقتاردا ساتىلىپ جاتقان نىساندار جونىندەگى اقپارات قولجەتىمسىز. – www.gosreestr.kz پورتالىنداعى ساۋدا تۋرالى ەسەپتىك مالىمەتتەر اشىق ەمەس. ول جەردە ەلەكتروندىق ساۋداعا قانشا ادام قاتىستى، قانداي سومانى ۇسىنىپ، نىسانداردى كىم ساتىپ الدى دەگەن قاراپايىم نارسەلەر جازىلماعان،- دەدى ول 13 تامىزدا استاناداعى بريفينگتە.

ءامىرلان ءالىمجان.