الماتى قالاسىنداعى مايلين كوشەسىندە ورنالاسقان، رەسەيلىك «گازپرومنەفت» كومپانياسىنا قاراستى جانارماي بەكەتىندە اي-95 ماركالى بەنزيننىڭ ءبىر ءليترى 153 تەڭگەدەن ساتىلىپ جاتىر.

ال قالا ماڭىنداعى وتەگەن باتىر كەنتىندەگى ەكى جانارماي بەكەتىنىڭ بىرىندە وسى بەنزيننىڭ باعاسى - 163 تەڭگە، ال ەكىنشىسىندە - 153 تەڭگە. بۇل تۋرالى ازاتتىق راديوسى جازدى.

جانارماي بەكەتى قىزمەتكەرلەرى ازاتتىق تىلشىسىنە ماركاسى بىردەي بەنزين باعاسىنىڭ بۇلايشا ەكى ءتۇرلى بولۋىن «جانارماي ساپاسىنا بايلانىستى» دەپ تۇسىندىرگەن. ولاردىڭ ايتۋىنشا، «قۇرامىندا تەز جانە تازا جانعىش قوسپالارى بار بەنزيننىڭ باعاسى - 163 تەڭگە، ال قۇرامىندا مۇنداي قوسپالارى از ياعني ساپاسى ءسال تومەندەۋ اي-96-95 ماركالى بەنزين – 153 تەڭگە». بەنزيننىڭ بۇل تۇرى وسىعان دەيىن 145 تەڭگەدەن ساتىلىپ كەلگەن ەدى.

رەسەيلىك «گازپرومنەفت» كومپانياسىنىڭ الماتىداعى وفيسىنە تەلەفون شالعان ازاتتىق تىلشىسىنە ءوز اتى-ءجونىن اتاعىسى كەلمەگەن كومپانيا قىزمەتكەرى: «153 تەڭگەدەن ساتىلاتىن بەنزين ادەتتەگى اي-95 ماركالى بەنزين تالابىنا عانا جاۋاپ بەرەدى. ال 163 تەڭگەلىك بەنزيننىڭ ساپاسى اي-98 ماركالى بەنزين ساپاسىمەن بىردەي» دەپ جاۋاپ بەرگەن. ازاتتىق ءتىلشىسى بەنزين باعاسىنىڭ وزگەرۋىنە بايلانىستى باسەكەلەستىكتى قورعاۋ اگەنتتىگىنە دە حابارلاسىپتى. اگەنتتىك قىزمەتكەرلەرى بۇل ماسەلەنى بىلەتىندىكتەرىن، بىراق «باسشىلىقتاعى اۋىس-تۇيىسكە بايلانىستى ءالى ەشتەڭە شەشە الماي جاتقانىن» ايتىپتى.

شىلدە ايىنىڭ سوڭىندا استانادا وتكەن بريفينگتە قازاقستان مۇناي جانە گاز ءمينيسترى ۇزاقباي قارابالين تامىز ايىنان باستاپ جانارماي باعاسى ايتارلىقتاي قىمباتتايدى دەگەن اقپاراتتى جوققا شىعارعان. ەستەرىڭىزگە سالاتىن بولساق، سوڭعى اپتا ىشىندە الماتىدا اي-92 ماركالى بەنزيننىڭ تاپشىلىعى بايقالعان بولاتىن.

اباي-اقپارات