ۇلتتىق ەكونوميكا مينيسترلىگىنىڭ ستاتيستيكا كوميتەتىنىڭ توراعاسى ءاليحان سمايىلوۆ حالىقتىڭ تابىسى تۋرالى مالىمەتتەردى جاريا ەتتى، - دەپ حابارلايدى Tengrinews.kz.

2014 جىلدىڭ ماۋسىم ايىندا ءبىر جۇمىسشىنىڭ ورتاشا ايلىق اتاۋلى جالاقىسى 124 مىڭ 780 تەڭگە بولدى، بۇل وتكەن جىلدىڭ وسىنداي كەزەڭىمەن سالىستىرعاندا، 13,5%-عا كوپ.

"استانادا، مىسالى، ول - 182 مىڭ تەڭگە، الماتىدا - 158 مىڭ. جوعارى جالاقى ماڭعىستاۋ (222 مىڭ تەڭگە), اتىراۋ (221 مىڭ تەڭگە) وبلىستارىندا دا قالىپتاسىپ وتىر. ءوندىرۋشى سالالار بولعاندىقتان، ورتاشا ايلىق جالاقىنىڭ جوعارىلىعى تاڭدانارلىق جايت ەمەس", - دەگەن ءاليحان سمايىلوۆ پرەزيدەنت جانىنداعى ورتالىق كوممۋنيكاتسيالار قىزمەتىندە بريفينگتە.

ستاتيستيكا كوميتەتى باسشىسىنىڭ ايتۋىنشا، سولتۇستىك قازاقستان وبلىسىندا ورتاشا ايلىق جالاقى مولشەرى - 85 مىڭ تەڭگە، قوستاناي وبلىسىندا - 92 مىڭ تەڭگە، الماتى وبلىسىندا - 94 مىڭ تەڭگە، جامبىل وبلىسىندا - 85 مىڭ تەڭگە. "اۋىل شارۋاشىلىعى ءوندىرىسى باسىم وڭىرلەردە، جالاقى مولشەرى ەل بويىنشا ورتاشا دەڭگەيدەن ايتارلىقتاي تومەن"

رەسمي مالىمەت بويىنشا، 2014 جىلدىڭ ماۋسىم ايىندا قازاقستاندا جۇمىسسىزداردىڭ سانى 463,4 مىڭ ادام بولدى. جۇمىسسىزدىق دەڭگەيى 5,1%-عا تەڭ. ەڭبەكپەن قامتۋ ورگاندارىنا جۇمىسسىز رەتىندە تىركەلگەندەردىڭ سانى 2014 جىلدىڭ ماۋسىم ايىنىڭ سوڭىندا 59,2 مىڭ ادام نەمەسە حالىقتىڭ ەكونوميكالىق بەلسەندى بولىگىنە قاراعاندا، 0,6% بولدى. جاسىرىن جۇمىسسىزدىق دەڭگەيى حالىقتىڭ ەكونوميكالىق بەلسەندى بولىگىنىڭ 0,3%-ىنا تەڭ.

اباي-اقپارات