ەلوردالىق پوليتسەيلەر اعىلشىن ءتىلىن مەڭگەرىپ جاتىر
استانالىق 160 پوليتسەي حالىقارالىق EXPO كورمەسى قارساڭىندا اعىلشىن ءتىلىن مەڭگەرىپ جاتىر، دەپ حابارلايدى Bnews.kz.
وتكەن ايدىڭ باسىنان بەرى قر ىشكى ىستەر دەپارتامەنتىندە اپتاسىنا 3 رەت وتەتىن ارنايى ساباق اشىلعان. بۇل شارا ەلوردالىق ءتارتىپ ساقشىلارى ەلىمىزگە كەلەتىن قوناقتاردىڭ بارلىق سۇراقتارىنا جاۋاپ بەرىپ، قاۋىپسىزدىگىن قامتاماسىز ەتۋ ءۇشىن ۇيىمداستىرىلدى. ۆەدومستۆو جەتەكشىلەرى پوليتسەيلەردىڭ ءتىل ءبىلىمى ءيميدجدى كوتەرۋگە سەپتىگىن تيگىزەدى دەيدى. ساباق 4 اي بويى جۇرەدى.
«كۋرستار اياقتالعان سوڭ، پوليتسەيلەر ەمتيحان تاپسىرادى. قولدارىنا سەرتيفيكات الادى. اعىلشىن ءتىلىن جاڭادان ۇيرەنىپ جاتقاندار ءۇشىن بەرىلەتىن تاپسىرما كولەمى كوبىرەك بولادى. سوندا ولار ەلوردامىزعا كەلگەن قوناقتاردىڭ بارلىق سۇراقتارىنا جاۋاپ بەرەتىن بولادى»، - دەيدى قالالىق ءىىد كادرلىق جۇمىس باسقارماسى باسشىسىنىڭ ورىنباسارى رۋستام قالين.
