شىنىمدى ايتسام، مەن كەيىنگى كەزدەرى رەسەي مەن ۋكراينا اراسى ۋشىققاننان بەرى وسى كورشىمىزدىڭ تەلەارناسىن، اسىرەسە، جاڭالىقتارىن كورۋدى مۇلدە دوعاردىم. جاڭالىق دەپ ات قويعاندارىنىڭ ءبارى شىلعي وتىرىك پەن وسەككە تولى، تەك ۋكراينانى جامانداۋعا قۇرىلعان اشىقتان-اشىق عايباتتاۋ عانا. مۇمكىن ول ابدەن زومبيلانعان رەسەيدىڭ قالىڭ جۇرتىنا ۇنايتىن شىعار. ال مەن مۇنداي حابارلارىن كوزىم شالىپ قالسا، قۇسقىم كەلەدى. سىڭارجاق، ءشوۆينيزمنىڭ ساسىق ءيسى مۇڭكىپ تۇرعان جاڭالىقسىماقتار ابدەن مەزى ەتكەندىگى راس.
    الايدا باياعىدا بىرەۋ "اكەسىن ساباعاندى كورىپ ەدىك، ايتسە دە اكەسىن ارباعا بايلاپ قويىپ ساباعاندى ءبىرىنشى رەت كورۋىم" دەگەن ەكەن. سول سەكىلدى رەسەي جۋرناليسيتەرىنىڭ تالاي كوكىگەندىگىن بىلەتىن ەدىك، مىناۋ ءتىپتى سوراقىسى ەكەن. ءبىزدىڭ قوستانايدا شىعاتىن "ناشا گازەتا" دەپ اتالاتىن اپتالىقتىڭ جازۋىنا قاراعاندا وسى ايدىڭ 12 شىلدەسى كۇنى، ياعني  سەنبىدە رەسەيدىڭ ء"بىرىنشى ارناسىنىڭ" "ۆرەميا" اتتى باعدارلاماسىندا ۋكراينانانىڭ سلاۆيانسك قالاسىنان بوسىپ كەلدىم دەگەن گالينا پىشنياكتىڭ سۇحباتىن جاريالاپتى. بۇل ايەلدىڭ اڭگىمەسىن ەستىسەڭىز توبە شاشىڭىز تىك تۇرادى. سلاۆيانسكىگە كىرگەن ۋكراينا اسكەرلەرىنىڭ جاۋىزدىعى شەكتەن اسىپتى. ولار قالانىڭ ورتالىق الاڭىنا جۇرتتى جيناپ الىپ قاتتى قيناعان. ءدۇيىم جۇرتتىڭ كوزىنشە ءبىر ايەلدىڭ بالاسىن باقانعا كەرىپ تاستاپ، ءوزىن تانكىنىڭ قۇيرىعىنا بايلاپ الىپ، سىلىكپەسى شىعىپ، ءولىپ قالعانشا قالا ىشىندە سۇيرەتىپ جۇرگەن كورىنەدى. مۇنداي سۇمدىقتى ەستىگەن كورەرمەننىڭ نە ويلايتىندىعى تۇسىنىكتى. "ويباي-اۋ، مىنالار شىنىمەن دە فاشيستەر ەكەن عوي، اناۋ ازاپقا تۇسكەن ازاماتتاردى قۇتقارۋعا اتتانايىق" دەپ ورە تۇرەگەلەتىندىگى ايدان-انىق.
    ال سۇمدىعى سول، بۇل ايەلدىڭ ايتقاندارىنىڭ ءبارى شىلعي وتىرىك بولىپ شىعىپتى. بىرىنشىدەن، بۇل ايەل سلاۆيانسكىدەن ەمەس، دونەتسكىدەن كەلگەن كورىنەدى. ەكىنشىدەن سلاۆيانسك قالاسىندا ورتالىق الاڭ دەگەن مۇلدە جوق ەكەن. ۇشىنشىدەن، وسى پىشنياكتىڭ وزىنەن باسقا، بۇل جايتقا كۋا بولاتىن جان تابىلماپتى. دەمەك، نە تەلەديدار ماسەلەنىڭ مانىسىنە بارماستان وسى سۇحباتتى بەرە سالعان دا، نەمەسە بۇل ۋكراينا جۇرتىن جاۋىز ەتىپ كورسەتۋ ءۇشىن ادەيى ىستەلىنگەن ارانداتۋشىلىق. بىزدىڭشە، بۇل ەكىنشىسىنە كەلىڭكىرەيدى. ويتكەنى قازىرگى رەسەيدەگى وتىرىك پەن وسەكتىڭ قاۋلاپ تۇرعاندىعىن ەسكەرسەك، مۇنداي اقپاراتتىق قاستاندىققا تاڭ قالۋعا بولماس.
    ال جالپى مۇنداي ارانداتۋشلىقتىڭ باستاۋ الىپ جاتقان جەرى بار كورىنەدى. وعان مىنا جايت سەبەپ بولسا كەرەك. 9 شىلدە كۇنى ءبىر فيلوسوفسىماق الەكساندر دۋگين دەگەن (كىم ەكەندىگىن شامالاپ وتىرعان بولارسىزدار) ءوزىنىڭ "فەيسبۋگىندە" بىرەۋلەردىڭ وزىنە "ۋكراينادا ءبىر جاس بالانى باقانعا بايلاپ كەتكەندىگى تۋرالى ايتقانى بار" دەگەن جازبا قالدىرعان. مىنە، ەشبىر فاكتىگە نەگىزدەلمەگەن، بازارداعى ءبىر شايپاۋىز ايەل ايتتى دەگەن وسەك رەسەي مەن ۋكراينانى ارالاپ كەتكەن. مىنا "اسىرە ەۆرازياشىل" دۋگيننىڭ ۋكراينادان بولىنەمىز دەپ قارۋ الىپ كۇرەسىپ جاتقان سەپاراتيستەردىڭ اراسىندا دا تىلەكتەستەرى كوپ ەكەندىگى ەسكەرسەك. بۇل ارانداتۋشىلىقتىڭ قايدان شىققاندىعىن باجايلاۋ قيىن بولماس.
  وسى ورايدا مىناداي وي تۋىندايدى. ءبىزدىڭ ەلدىڭ اقپاراتتىق كەڭىستىگىن رەسەيدىڭ ءبىرجولاتا جاۋلاپ العاندىعىن ەسكەرسەك، مۇنداي ارانداتۋشىلىقتىڭ قايدا اكەلىپ سوعاتىندىعىن ايتىپ جاتۋدىڭ ءوزى ارتىق.
      P.S.  ايتپاقشى، جاقىندا عانا بۇكىل ەلىمىزدى شۋلاتقان قوستاناي وبلىسى، قامىستى اۋدانى، درۋجبا اۋىلىنىڭ اكىمى شاقىرعان وسىنداي ۋكراينانالىق بوسقىنداردىڭ ىشىندە الگىندەي پىشنياكتاردىڭ بولماسىنا كىم كەپىل؟

مۇراتبەك داۋرەنۇلى.
قوستاناي.