دەپۋتات تۇرسىنبەك ومىرزاقوۆ باستاپ ماجىلىستەگى حالىقتىق كوممۋنيستىك پارتيا فراكتسياسى جەرگىلىكتى بيۋدجەتتەرگە بولىنەتىن سۋبۆەنتسيالار مەن ترانسفەرتتەردىڭ دۇرىس بولىنبەيتىندىگىنە نارازىلىق ءبىلدىردى. ولار ەكونوميكا جانە بيۋدجەتتىك جوسپارلاۋ مينيسترلىگى جەرگىلىكتى بيۋدجەتكە تۇسەتىن تۇسىمدەردىڭ كولەمىن دۇرىس بولجاي الماي وتىر دەپ سوكتى. سونىڭ كەسىرىنەن دوتاتسيا كولەمى تۇسىمنەن الدەقايدا ارتىپ، ونى الاتىن ايماقتار ازايۋدىڭ ورنىنا كوبەيە تۇسۋدە دەيدى دەپۋتاتتار. بۇل ءسوزدىڭ شىندىعىنا قارجى ءمينيسترىنىڭ 2013 جىلعى دەرەكتەرى كەلتىرىلگەن. وعان سايكەس ەلىمىزدەگى 16 ايماقتىڭ 13-ءى دوتاتسيا الۋشىلار قاتارىندا ەكەن. سونىڭ ىشىندە اقمولا، الماتى، شىعىس قازاقستان، قوستاناي وبلىستارى بيۋدجەتتەرىنىڭ ۇشتەن بىرىنەن ارتىعىن، جامبىل، سولتۇستىك قازاقستان، قىزىلوردا وبلىستارى بيۋدجەتتەرىنىڭ جارتىسىنا جۋىعىن، وڭتۇستىك قازاقستان وبلىسى ءتىپتى 55 پايىزدان ارتىعىن رەسپۋبليكالىق بيۋدجەتتەن بەرىلەتىن سۋبۆەنتسيا مەن ترانسفەرتتەر ارقىلى جاباتىن كورىنەدى. وسىلاي، قالتىلداپ كۇن كورىپ وتىرعان ايماقتارعا بولىنەتىن اتاۋلى ترانسفەرتتەر مەن نەسيەلەر دە وراسان كوپ كورىنەدى. ورتالىققا قول سوزىپ، ابدەن سۇرانشاق بولىپ، قۇنىعىپ العان، ماسىلدىق پيعىلداعى ايماقتار وزدىگىنەن كۇن كورۋدى ويلامايدى دا. ال ەكونوميكا جانە بيۋدجەتتىك جوسپارلاۋ مينيسترلىگى ولارعا جەرگىلىكتى تۇسىمدەردەن بىرنەشە ەسە ارتىق سۋبۆەنتسيا بەرىلىپ جاتقانىنا كوڭىل اۋدارمايدى. سونىڭ كەسىرىنەن 2011-2013 جىلدارى 173 ملرد. تەڭگە ارتىق سۋبۆەنتسيا بولىنگەن. جانە مۇنداي جاعداي جىلدان جىلعا جالعاسىپ، ازايۋدىڭ ورنىنا كوبەيىپ كەلەدى. كورپوراتيۆتىك تابىس سالىعىن جەرگىلىكتى بيۋدجەتتە قالدىرىپ، شاعىن جانە ورتا بيزنەستىڭ جاندانۋىنا ىقپال ەتەمىز، ءسويتىپ ايماقتاردىڭ وزدىگىنەن كۇن كورۋىنە جاعداي جاسايمىز دەگەن ءسوز قايدا؟، - دەيدى دەپۋتاتتار. اشۋلى دەپۋتاتتار ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆقا دەپۋتاتتىق ساۋال جولداپ، وسى سۇراقتارعا جانە جەرگىلىكتى بيۋدجەتتىڭ ءتۇسىمى مەن رەسپۋبليكالىق بيۋدجەتتەن بولىنەتىن سۋبۆەنتسيا ايىرماسىنىڭ وراسان كوپتىگىنە جاۋاپ بەرۋدى تالاپ ەتتى. الدە بۇل جەردە ادامي فاكتور اسەر ەتۋدە مە دەيدى ارتىننەن حابارى بار دەپۋتاتتار.     

         شىنىندا، دوتاتسيامەن عانا كۇن كورەتىن ايماقتاردى بانكروتقا ۇشىراتىپ جاۋىپ، وزدىگىنەن كۇن كورەتىن ايماقتارعا قوسۋ كەرەك سياقتى. وسىنداي باستاما كوتەرىلگەن بولسا جەرگىلىكتى بيۋدجەتتىڭ دە تابىسى ارتارى ءسوزسىز ەدى. ورىنتاقتارىنان ايرىلىپ قالۋ مۇمكىندىگى تۋعاندا شەنەۋنىكتەر جانتالاسا قيمىلداپ، سالىق تولەيتىن كاسىپورىندار دا قۇرار ەدى، بيۋدجەتتىڭ قوسىمشا ءتۇسىم كوزدەرىن دە تابار ەدى. اتتەڭ وندايدى ويلايتىن ادام جوق، ءبارى دە «وگىز ولمەسىن، اربا سىنباسىنمەن» جۇرە بەرەدى. سونىڭ كەسىرىنەن دامىپ جاتقانىمىز شامالى.

ق.بالعوجين - ساراپشى

Abai.kz