الماتى قالالىق ءباسپاسوز قىزمەتىنىڭ حابارلاۋىنشا جاڭا قۇرىلعان ناۋرىزباي اۋدانىنىڭ اۋماعى 23 200 گەكتار. 

«قالاعا سوڭعى كەزدەرى قوسىلعان 23 200 گا. اۋماق بارىسىندا تۇرعىندار سانى دا ارتتى، تەك رەسمي مالىمەت بويىنشا عانا 1 ملن. 665 مىڭ ادامعا جەتىپ وتىر. ءبىز قازاقستان پرەزيدەنتىنە قالادا جاڭا اۋدان قۇرۋ تۋرالى ۇسىنىس جىبەرگەن بولاتىنبىز. مەملەكەت باسشىسى ءبىزدىڭ باستامامىزدى قولدادى. ناۋرىزباي اۋدانى قالاعا كوپتەگەن يگى ىستەردى جۇزەگە اسىرۋعا ىقپال ەتەتىن بولادى»، - دەدى احمەتجان ەسىموۆ.

ناۋرىزباي باتىر ەسىمىن يەلەنگەن اۋدان اۋماعىنىڭ جەرى 6 976 گا. وعان اۋەزوۆ اۋدانىنىڭ ءبىر بولىگى قوسىلعان. رەسمي مالىمەت بويىنشا اۋدان تۇرعىندارىنىڭ سانى 157 مىڭ ادام.

قالالىق ءماسليحاتتىڭ شەشىمىمەن ناۋرىزباي اۋدانىنىڭ اكىمى بولىپ قۋانىش قاشقىمباەۆ تاعايىندالدى، ول بۇعان دەيىن الماتى قالاسىنىڭ جەر قاتىناستارى باسقارماسىن باسقارعان.

بۇگىن الماتى اكىمى احمەتجان ەسىموۆ كوپشىلىككە ناۋرىزباي اۋدانىنىڭ جاڭا باسشىسىن تانىستىردى. قالا باسشىسى قالاعا جاڭا اۋماقتاردىڭ قوسىلۋى جونىندە باستاما كوتەرگەن قۇقىق قورعاۋ قۇرىلىمدارى ەكەندىگىن، ولاردىڭ الماتى وبلىسىندا ورىن العان بىرقاتار تەراكتىلەرگە الاڭداۋشىلىق بىلدىرگەندىكتەرىن جەتكىزدى.

قالا اكىمى جاڭا اۋداننىڭ پايدا بولۋى قالا اۋماعىندا جەدەل باسقارۋدى قامتاماسىز ەتىپ، الەۋمەتتىك-ەكونوميكالىق ماسەلەلەردى شەشۋگە جول اشاتىندىعىن ايتتى.

«قالاعا قوسىلعان اۋماقتى دامىتۋعا 3,3 ملرد. تەڭگە ءبولىندى، ونىڭ 1 ملرد. تەڭگەسى جول سالۋ مەن ولاردى جوندەۋگە جۇمسالاتىن بولادى. ۇلكەن جۇمىستار كۇتىپ تۇر، ونىڭ بارلىعى قالالىقتاردىڭ جاقسى ءومىر سۇرۋىنە باعىتتالادى»، - دەدى احمەتجان ەسىموۆ.

اباي-اقپارات