«سامۇرىق-قازىنا» دەپۋتاتتارعا جەكەشەلەندىرۋ باعدارلاماسىن  ىسكە اسىرۋداعى نەگىزگى قاعيدالاردى ءتۇسىندىردى

 «سامۇرىق-قازىنا» اق جانىنداعى ساراپتامالىق-كونسۋلتاتيۆتىك كەڭەستىڭ كەزەكتى وتىرىسى ءوتىپ،  «حالىق IPO» جانە قوردىڭ كومپانيالار توبىنىڭ اكتيۆتەرىن جەكەشەلەندىرۋ باعدارلامالارىنىڭ ىسكە اسىرىلۋ ماسەلەلەرى تالقىلاندى.

كەڭەستىڭ وتىرىسى بارىسىندا قور جەتەكشىلەرى «كەگوك»، «كازاقستان تەمىر جولى» جانە «كازاتومپروم» كومپانيالارىنىڭ اكتسيالارىن اشىق ۇسىنىسقا شىعارۋدىڭ ەرەكشەلىكتەرى تۋرالى دەپۋتاتتارعا حابارلادى.  «حالىق IPO» ىسكە اسىرىلۋىنا اعىمداعى جاعدايدىڭ ازىرلىگى جايلى باياندالدى.

دەپۋتاتتارعا ءتۇسىندىردى

«بۇگىنگى تاڭدا كومپانيالاردى قور نارىعىنا شىعارۋدىڭ العىشارتتارى جاسالعان. تەك تاياۋدا شەشىلەتىن تەحنيكالىق ماسەلەلەرى عانا قالدى»، - دەدى وتىرىس بارىسىندا «سامۇرىق-قازىنا» اق باسقارما باسشىسىنىڭ ورىنباسارى ەلەنا باحمۋتوۆا.

كەڭەس بارىسىندا دەپۋتاتتار «حالىق IPO» باعدارلاماسىنىڭ ورىندالۋى ءتيىس اقپاراتتىق كامپانياسى ماسەلەسىن كوتەردى. ««حالىق IPO-نىڭ» ءبىرىنشى تولقىنىندا  ەكونوميكالىق تاجىريبە جيناقتاعان ادامداردى تارتساڭىزدار دۇرىس بولار ەدى دەپ ويلايمىن»، - دەدى د. نازارباەۆا

 «سامۇرىق-قازىنا» اق ساتىپ الۋ بويىنشا ديرەكتورى جۇماعالي مىڭجاساروۆ دەپۋتاتتارعا باعدارلامانى جەكەشەلەندىرۋدىڭ نەگىزگى قاعيدالارىن ءتۇسىندىردى جانە اكتيۆتەردى وتكىزۋدىڭ مەرزىمدەرى مەن تەتىكتەرى جايلى ايتىپ ءوتتى.  ج. مىڭجاساروۆ دەپۋتاتتاردىڭ سۇراقتارىنا دا جاۋاپ بەردى.

ساراپتامالىق-كونسۋلتاتيۆتىك كەڭەستىڭ مۇشەلەرىنىڭ ويىنشا، الدىدا تۇرعان جەكەشەلەندىرۋ باعدارلاماسىنىڭ نەگىزگى قاعيدالارى اشىقتىق جانە ەكونوميكالىق تيىمدىلىك بولۋى كەرەك.

«جەكەشەلەندىرۋ باعدارلاماسىن ىسكە اسىرۋ كەزەڭدەرى ەڭ الدىمەن ەكونوميكالىق ءتيىمدى بولعانىن قالار ەدىم. قور ەكونوميكالىق قاۋىپ-قاتەرلەردىڭ الدىن الىپ، بۇل ءىستىڭ بارلىق ءوربۋ ستسەناريلەرىن ەسەپتەيدى دەپ ۇمىتتەنەمىز»، - دەدى قر پارلامەنتىنىڭ ءماجىلىس دەپۋتاتى راۋان شاەكين. 

 «سامۇرىق-قازىنا» اق جانىنداعى ساراپتامالىق-كونسۋلتاتيۆتىك كەڭەس 2012 جىلى قۇرىلعان. كەڭەستىڭ نەگىزگى ماقساتى – قوردىڭ ەڭ باسىمدىلىققا يە باعىتتارىن دامىتۋدا ساراپتامالىق-كونسۋلتاتيۆتىك جاردەم بەرۋ. كەڭەس قوردىڭ جانە ونىڭ ەنشىلەس كومپانيالارىنىڭ قىزمەتتەرىنىڭ باسەكەگە قابىلەتتىلىگىن جانە تيىمدىلىگىن ارتتىرۋ بويىنشا ۇسىنىستار جاساۋ. كەڭەس قۇرامىندا ومىرزاق شوكەەۆتىڭ باسشىلىق ەتۋىمەن قازاقستان رەسپۋبليكاسىنىڭ پارلامەنتى دەپۋتاتتارى، ەلىمىزدىڭ كورنەكتى قوعام قايراتكەرلەرى، زاڭگەرلەر جانە زاڭگەر-عالىمدار كىرەدى.