قازاقستاننىڭ سىرتقى ىستەر ءمينيسترى ەرلان ىدىرىسوۆ فرانتسياداعى  «La Vanguardia» گازەتىندەگى سۇحباتتا ءوز سوزدەرىنىڭ ورەسكەل بۇرمالانعانىن العا تارتادى. بۇگىن قر سىرتقى ىستەر ءمينيسترى ەرلان ىدىرىسوۆ پارلامەنت ماجىلىسىندەگى جالپى وتىرىسى اياسىندا جۋرناليستەر سۇراعىنا جاۋاپ بەرگەندە وسىلاي ءمالىم ەتتى.

ەستەرىڭىزگە سالا كەتەيىك، وسىدان ءبىراز بۇرىن ە. ىدىرىسوۆ فرانتسۋزدىڭ La Vanguardia گازەتىنە سۇحبات بەرىپ، وندا فرانتسۋزدىق ءجۋرناليستىڭ «قازاقستان «ستاننان» باس تارتا ما؟» دەگەن ساۋالىنا بۇنى جۋرناليستەردىڭ ءازىلى دەپ، ونى سالماقتى قابىلداماۋعا شاقىرعان. بۇل سۇحبات كەيىننەن قازاقستاندىق جۋرناليستەر قاۋىمى اراسىندا دا ۇلكەن شۋ تۋدىرعان ەدى.

«مەن ءجۋرناليستىڭ سوزىنە جاۋاپ بەرمەيمىن. ولار مەنىمەن فرانتسيادا كەزدەسكىسى كەلەتىنىن ايتتى، ءبىز كەزدەستىك. بىرىنشىدەن، شەتەلدىك جۋرناليست مەنىڭ ءسوزىمدى ورەسكەل بۇرمالاپ وتىر. مەن ەشقانداي دا «ستان» تۋرالى ايتقان ەمەسپىن. ول مەنەن ەلدىڭ اتاۋى وزگەرتىلە مە دەپ سۇرادى، مەن وعان بۇل تاقىرىپ باق-تا بەلسەندى تۇردە تالقىلانىپ جاتقانىن، دەگەنمەن مەنىڭ بىلۋىمشە جاقىن ارالىقتا ەلدىڭ اتاۋى وزگەرتىلمەيتىنىن ايتتىم. ال قالعانىن ولار وزدەرى ويدان قوسىپ وتىر. جالپى، جۋرناليستەر قاۋىمى شىعارماشىل عوي، وزدەرىنە ۇنامدى جاعىنا بۇرا تارتىپ كەتكەن شىعار»، - دەدى مينيستر جۋرناليستەر سۇراعىنا جاۋاپ بەرۋ بارىسىندا.

قازاقپارات