الداعى جۋرناليستەردىڭ كاسىبي مەرەكەسى قارساڭىندا «زاڭ جانە ءبىز» باعدارلاماسىنىڭ رەداكتسياسى ماۋسىمنىڭ 23-ءى كۇنى «قازاقستان» ۇلتتىق تەلەارناسىنىڭ كونفەرەنتس-زالىندا كورەرمەندەرمەن سۇحباتتاسىپ، «قۇقىقتىق تانىم اكتسياسىن» وتكىزۋدى جوسپارلاپ وتىر. وسىلايشا ءبىر كۇن بويى تەگىن زاڭگەرلەردىڭ كەڭەسىن ۇسىنىپ، زاڭدىق ساۋاتتى كوتەرۋگە اتسالىسپاق نيەتتە.

وتكەن جىلدىڭ قىركۇيەك ايىندا «قازاقستان» ۇلتتىق تەلەارناسىندا «زاڭ جانە ءبىز» باعدارلاماسى اشىلىپ، ونىڭ جۋرناليستەرى تىكەلەي ەفير ارقىلى كوپشىلىكتىڭ كوكەيىندە جۇرگەن قۇقىقتىق ساۋالدارعا جاۋاپ بەرىپ، تۇيتكىلدى ماسەلەلەلەردى شەشۋگە سەپتىگىن تيگىزۋدى ماقسات تۇتقان ەدى. مىنە ودان بەرى 9 اي ءوتتى، 9 اي ىشىندە نە ىستەلدى، حابار ءوز ماقساتىنا جەتتى مە؟ قانشا كورەرمەننىڭ قۇقىقتىق-الەۋمەتتىك ماسەلەلەرىن شەشۋگە حابار سەپتىگىن تيگىزدى؟ مىنە وسى ساۋالدارعا جاۋاپ بەرۋ ءۇشىن، كورەرمەن الدىندا ەسەپ بەرۋ ءۇشىن «زاڭ جانە ءبىز» باعدارلاماسىنىڭ جۋرناليستەرى «قۇقىقتىق تانىم اكتسياسىن» وتكىزۋدى قولعا الدى.

اتالعان جوبانىڭ  پروديۋسەرى، قازاقستاننىڭ مادەنيەت قايراتكەرى، قازاقستان جۋرناليستەر وداعى سىيلىعىنىڭ لاۋرەاتى ساۋلە جيرەنشينانىڭ ايتۋىنشا، وسى ۋاقىتقا دەيىن 40-تان استام باعدارلاما ەفيرگە شىعىپ، 300-گە جۋىق كورەرمەن تىكەلەي ەفيرگە قوڭىراۋ شالعان. ودان وزگە حات جولداعان كورەرمەن سانى 200-دەن اسسا، رەداكتسياعا حابارلاسقان جاندار قانشاما.

«كۇندەلىكتى تۇرمىستا نە ىستەرىن بىلمەي، باسى داۋعا قالىپ جۇرگەن كورەرمەننىڭ حاتىنان، ءبىزدىڭ رەداكتسياعا جازىپ جاتقان وتانداستارىمىزدىڭ شاعىمىنان تۇسىنگەنىمىز – بىزدە الدە دە قۇقىقتىق ماسەلەلەردىڭ كەمشىن  تۇستارى كوپ. نەعۇرلىم بۇل تاقىرىپقا تەرەڭدەگەن سايىن، سوعىرلىم مۇنداي الەۋمەتتىك جوباعا حالىقتىڭ سۋساپ وتىرعانىن كوردىك. بىردە-ءبىر تەلەارنا، جالپى بىردە-ءبىر ءباسپاسوز قۇرالى ءوز كورەرمەنىنسىز، ءوز وقىرمانىنسىز ەشتەڭە ەمەس. ءبىزدىڭ باستى قىزمەتىمىز كورەرمەنگە ارنالعان»، دەيدى «زاڭ جانە ءبىز» حابارىنىڭ پروديۋسەرى ساۋلە جانىبەكقىزى.

«زاڭ جانە ءبىز» تەلەجوباسىنا كاسىبي مامان يەلەرى، پروكۋراتۋرا، ادۆوكات، سوت، ادىلەت قىزمەتى سالاسىنىڭ بىلىكتى ماماندارى قاتىسىپ، قۇقىقتىق تاقىرىپتى جان-جاقتى تالقىلايدى. ءار دۇيسەنبى كۇنى كەشكى ساع. 19:00-دە كورەرمەننىڭ ءوزىن مازالاعان ساۋالدى ستۋديا قوناقتارىنا تىكەلەي تەلەفون ارقىلى قويىپ، نەمەسە، ەلەكتروندىق پوشتاسىنا حات جازىپ، جاۋاپ الۋ مۇمكىندىگى بار.

قوسىمشا اقپارات بويىنشا «زاڭ جانە ءبىز» باعدارلاماسىنىڭ ءباسپاسوز حاتشىسى ايگەرىم اعىلتاەۆاعا حابارلاسۋعا بولادى

8 701 360 66 63, 8 (727) 354 06 07