ءدال وسى ساعاتتاردا ەلورداداعى تاۋەلسىزدىك سارايىندا مەملەكەت باسشىلارى دەڭگەيىندەگى جوعارى ەۋرازيالىق ەكونوميكالىق كەڭەستىڭ وتىرىسى بولىپ، استانا ەكونوميكالىق ءسامميتى ءوتىپ جاتىر. تاۋەلسىزدىك سارايىندا ەۋرازيالىق ەكونوميكالىق وداق تۋرالى  قر پرەزيدەنتى ن. نازارباەۆ:

ء«بىز ەۋرازيالىق ەكونوميكالىق وداق تۋرالى شارتتى ازىرلەۋ بويىنشا اۋقىمدى جۇمىستى تامامدادىق. وعان قول قويۋ ەۋرازيالىق كەڭىستىكتەگى ساپالى ينتەگراتسيالىق ۇدەرىستەردىڭ جاڭا كەزەڭىن بىلدىرەدى. شارت   وعان قاتىسۋشى مەملەكەتتەردىڭ بارلىعىنىڭ مۇددەلەرىن ەسەپكە الا وتىرىپ جاسالدى. اۋقىمدى جۇمىس اتقارىلدى. كەلىسپەۋشىلىكتەر دە بارشىلىق بولعانىمەن، ءبىز بارلىق تاراپتاردى قاناعاتتاندىراتىن ورتاق كونسەنسۋسقا كەلىپ وتىرمىز»، - دەدى.

ال، رف پرەزيدەنتى ۆ. پۋتين بولسا ەاەو-ءنىڭ تاريحي ماڭىزدىلىعى مەن ينتەگراتسياعا  توقتالىپ بىلاي دەدى:

ء«بىزدىڭ بۇگىنگى كەزدەسۋ تاريحي ماڭىزعا يە. قازاقستان، رەسەي جانە بەلارۋس ەۋرازيالىق ەكونوميكالىق وداق تۋرالى شارتقا قول قويادى. بۇل قۇجات مەملەكەتتەردىڭ ەگەمەندىگىن ساقتاي وتىرىپ، ءبىزدىڭ ەلدەردى ينتەگراتسيانىڭ جاڭا دەڭگەيىنە شىعارادى».

ەۋرازيالىق وداق يدەياسىنىڭ اۆتورى قازاق پرەزيدەنتى ەكەندىگىنە ەرەكشە ەكپىن تۇسىرە سويلەگەن پۋتين ءباسپاسوز وكىلدەرىنە وسى جايتتى قايتالاپ ايتتى.

«شارتقا قول قويۋ ءراسىمى قازاقستان استاناسىندا ءوتىپ جاتقانى سيمۆولدىق مانگە يە، - دەدى رف پرەزيدەنتى، -  سەبەبى، ەۋرازيالىق وداق يدەياسىنىڭ باسىندا نۇرسۇلتان ءابىشۇلى نازارباەۆ تۇرعانى بەلگىلى. 1994 جىلى ماسكەۋ مەملەكەتتىك ۋنيۆەرسيتەتىندەگى ءدارىسى بارىسىندا قازاقستان پرەزيدەنتى وسى يدەيانى العاش رەت جاريا ەتكەن بولاتىن».

بەلارۋس پرەزيدەنتى ا. لۋكاشەنكونىڭ اتاپ وتۋىنشە، قازاقستان، بەلارۋس جانە رەسەيدىڭ تاڭداعان جولىنىڭ دۇرىستىعىن ءومىر كورسەتىپ وتىر. پوستكەڭەستىك كەڭىستىكتەگى ەلدەردىڭ دەزينتەگراتسيالانۋىنا جول بەرمەۋ ءۇشىن تاۋەلسىز مەملەكەتتەر دوستاستىعى قۇرىلدى.

ء"بىز بىرلەسىپ، بىرنەشە جىل بويى ەۋرازيالىق ينتەگراتسيانىڭ ازاپتى جولىنان وتتىك. ءاربىر قادام وڭاي بولعان جوق. دەگەنمەن، ءبىزدىڭ حالقىمىز بەيبىتشىلىك پەن دوستىقتا ءومىر ءسۇرىپ، ولاردىڭ مەملەكەتتەرى ءوزارا ءتيىمدى ىنتىماقتاستىقتىڭ مىعىم نەگىزىندە جۇزەگە اسىرىلاتىندىعىنا نىق سەنىمدى بولۋىنا نەگىزدەلگەن باستى ماقساتىمىزدى كورە بىلدىك",-  دەدى ول ءوز سوزىندە.

بۇدان بۇرىن دا ايتىلعانداي ەۋرازيالىق ەكونوميكالىق وداق وعان قاتىسۋشى تاراپتاردىڭ جەكە قۇقىعىنا، سىرتقى جانە ىشكى ساياساتتاعى دەربەستىگىنە قۇل سۇقپايدى. وسى ورايدا قر پرەزيدەنتى: «ەۋرازيالىق ەكونوميكالىق وداقتىڭ قۇرىلۋى ءبىزدىڭ ەكونوميكامىزدى جان-جاقتى جاڭعىرتۋدىڭ قۋاتتى ىنتالاندىرۋ تەتىگىنە اينالاتىنىنا، ەلىمىزدى الەمنىڭ جەتەكشى مەملەكەتتەر قاتارىنا كوتەرىلۋىنە سەپتىگىن تيگىزەتىنىنە سەنىمدىمىن»، -دەدى. 

«ەۋرازيالىق ەكونوميكالىق وداق اياسىنداعى بارلىق حالىقارالىق كەلىسىمدەر، كوميسسيانىڭ مىندەتتى سيپاتتاعى كۇشى بار بارلىق شەشىمدەرى ورىس تىلىندە قابىلدانادى. ءبىز وسىلاي كەلىستىك. دەگەنمەن، ونداي قۇجاتتار بىردەن تاراپتاردىڭ ارقايسىسىنىڭ مەملەكەتتىك تىلدەرىنە اۋدارىلاتىن بولادى. سوندىقتان دا تىلدىك پرينتسيپتەر بويىنشا دا ەشقانداي كەمسىتۋشىلىكتەر ورىن المايدى»، - دەدى قر پرەزيدەنتى ن. نازارباەۆ.

 ەسكە سالا كەتەيىك، وتىرىستىڭ شاعىن قۇرامداعى كەزدەسۋىنە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ، رەسەي فەدەراتسياسىنىڭ پرەزيدەنتى ۆلاديمير پۋتين جانە بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو قاتىسۋدا.

 Abai.kz